वन्यजन्तुको पछिपछि

विपिन श्रीस

काठमाडौँ — बाघ गर्जिरहेको छ, मयूर नाचिरहेको, चराहरू उडिरहेका छन्, एकसिंगे गैंडा मस्तसँग पानीमा पस्दै छ । साँच्चिकै हैन, तस्बिरमा । राजधानीको भृकुटी मण्डपस्थित पर्यटन बोर्डमा जारी ‘वाइल्ड लाइफ फोटो प्रदर्शनी’ मा राखिएका तस्बिरहरू भने साँच्चिकै जस्ता छन् । यी तस्बिर खिचेका हुन् चितवनका वाइल्ड लाइफ फोटोग्राफर सागर गिरीले । 

राजधानीको भृकुटीमण्डपस्थित पर्यटन बोर्डमा जारी 'वाइल्ड लाइफ फोटो प्रदर्शनी’ मा राखिएका वन्यजन्तुका तस्बिर । तस्बिर : विपिन/कान्तिपुर

उनले वाइल्ड लाइफ फोटोग्राफी गर्न थालेको धेरै भएको छैन । आधा दशककै बीचमा उनले चितवन राष्ट्रिय निकुञ्ज, बर्दिया राष्ट्रिय निकुञ्ज, शुक्लाफाँटा राष्ट्रिय निकुञ्जलगायत तराई विभिन्न भूभागमा पुगेर अनगिन्ती तस्बिर खिच्न भ्याएका छन् । तीमध्ये एक सिंगेगैंडा, हात्ती, पातेबाघ, चितुवा, भालु, कृष्णसार, बाह्रसिंहे, गौरलगायतका जंगली जनावरसँगै मयूर, सारस, डार्टर, पोन्ड हेरोनलगायतका पक्षीहरूको ३८ थान तस्बिर यति बेला प्रदर्शनीमा हेर्न सकिन्छ ।

नेपालको तराई भूभागमा पाइने जंगली जनावर एवं पक्षीहरूलाई विश्वमाझ चिनाउने उनको खास ध्येय हो । यसमा उनको आफ्नै धारणा पनि छ । ‘फोटो र भिडियोहरूमा देखिने जनावर भन्नेबित्तिकै अफ्रिकाका जंगलको हो भन्ने नेपालीकै बुझाइ छ,’ उनले भने, ‘हाम्रै मुलुकमा पनि सुन्दर वन्यजन्तु छन् भन्ने देखाउन चाहना पूरा गर्न वन्यजन्तु फोटोग्राफी रोजेको हुँ । नेपालको पर्यटन भन्नेबित्तिकै सामान्यतः हिमाली पर्यटन बुझिने अवस्था रहेकोमा त्यसलाई विविधीकरण गर्न पनि आफूले तराई क्षेत्र रोजेको उनले बताए । उनले खिचेका तस्बिरहरू निकै कलात्मक छन् । कलात्मक फ्रेमिङमा वन्यजन्तुको चाल पकडन उनी सफल छन् ।

प्रदर्शनी अवलोकन गर्न पुगेका फोटो पत्रकार मीनरत्न बज्राचार्यले सागरले खिचेका तस्बिरहरू अन्तर्राष्ट्रिय स्तरको भएको दाबी गरे । ‘जनावर एवं पक्षीहरूको चाललाई राम्रोसँग खिचेका छन्,’ उनले भने, ‘यसले उनको फोटोग्राफी क्षमता त देखाउँछ नै, उनका तस्बिरहरूले नेपाललाई विश्वमाझ चिनाउन पनि मद्दत पुर्‍याउँछ ।’ तस्बिर नियाल्दै गर्ने क्रममै भेटिए, रत्नराज्य लक्ष्मी क्याम्पसका फोटो पत्रकारिता अध्यापक नरेश श्रेष्ठ । उनले पनि सागरको फोटोग्राफी कम्पोजिसन ‘सिर्जनात्मक र माझिएको’ भन्दै प्रशंसा गरे । ‘सागरको फोटो हेरेपछि फोटो खिचेकै स्थानमा गएर ती जनावर एवं पक्षीहरू हेर्न मन लाग्छ,’ उनले भने ।

पर्यटन बोर्ड र भिजिट नेपाल टान्टी टान्टीले प्रदर्शनी गरेको हो । बोर्डका प्रमुख कार्यकारी निर्देशक दीपकराज जोशीले फोटो प्रदर्शनीले नेपालको जैविक विविधतालाई चिनाउँदै पर्यटन प्रवर्द्धनमा टेवा पुग्ने बताए । ‘जैविक सम्पदाबारे विश्वले थाहा पाउन यस्ता तस्बिरहरूले सघाउँछन्,’ उनले भने । प्रदर्शनी चैत २८ गतेसम्म जारी रहनेछ ।

प्रकाशित : चैत्र २६, २०७५ ०८:३०
प्रतिक्रिया
पठाउनुहोस्

‘क्याप्टेन’ लाई बेलायतमा रेड कार्पेट

नवीन पोखरेल

लन्डन — ‘पहिला म हिरोइनका लागि फाइट गर्थें अहिले देशका लागि,’ तालीको गडगडाहटसँगै उनी थप्छन्, ‘हुन त म क्रिस्टियानो रोनाल्डो पनि हैन, र मेस्सी पनि । केवल चलचित्रमार्फत खेल क्षेत्रको संघर्ष र यसमा देखिएका विकृति विसंगति अन्त्यका लागि प्रयत्न गरेको हुँ ।’ 

बेलायतको अन्डरसटस्थित प्रिन्सेस हलमा आयोजित क्याप्टेनको प्रिमियर सोका क्रममा अभिनेता भुवन केसी र अनमोल केसी । तस्बिर सौजन्यः कुशल श्रेष्ठ

सप्ताहन्त प्रिन्सेस हल अल्डरसटमा अभिनेता बाबु भुवन केसीले बनाएको फिल्म ‘क्याप्टेन’ को रेड कार्पेट प्रिमियर सोमा आकर्षण बने वर्तमान पुस्ताका चर्चित नायक अनमोल केसी । साथमा थिए, अभिनेता तथा निर्माता भुवन केसी । ‘यति टाढा आएर पनि तपाईंहरूले देखाउनुभएको माया र साथले खुसी छु,’ लजालु स्वभावमा स्टेजमा भन्दै थिए अनमोल ।

पूर्वक्याप्टेन हरि खड्कासँग तीन महिना प्रशिक्षण लिएर ‘क्याप्टेन’ को अभिनय थालेको अनुभव पनि सुनाए अनमोलले । सो सुरु हुनुअघि प्रमुख अतिथि राजदूत दुर्गाबहादुर सुवेदीले अनमोललाई नेपाली फिल्मकै क्याप्टेनका रूपमा उदाएको कलाकारका रूपमा चित्रण गरे । ‘एउटा अग्लो, सग्लो र उज्ज्वल नक्षत्रको रूपमा स्थापित अभिनेता भुवन र अनमोल हामीमाझ हुनु गौरवको विषय हो,’ राजदूतले भुवन–अनमोलको प्रशंसामा केही समय खर्चिए ।

त्यसो त यहाँका नेपाली फिल्मप्रेमी दर्शक बाबु–छोरा हल प्रवेश गर्नेबित्तिकै झन्डै दस मिनेट उनीहरूसँग सेल्फी लिन तँछाडमछाड गरे । सोपछि पनि उनीहरू दर्शकको घेराउमा परे । सपन इन्टरटेन्मेन्ट लिमिटेड यूकेका निर्देशक सपन राईले क्याप्टेन सो आयोजना
गरेका हुन् ।

बेलायतवासी नेपालीलाई गुणस्तरीय फिल्म देखाउने आफ्नो उद्देश्य रहेको जनाउँदै उनले बेलायतका अन्य सहरमा पनि उक्त सिनेमा देखाइने जनाए । करिब अढाइ वर्ष अघि पनि भुवन केसी आफू निर्देशित पहिलो फिल्म ‘ड्रिम्स’ को रेड कार्पेट प्रिमियर सोका लागि छोरा अनमोलका साथ बेलायत आएका थिए । ‘क्याप्टेन’ ले नेपालमा पनि राम्रो चर्चा बटुलेको थियो । उक्त फिल्म प्रधानमन्त्री केपी ओलीले समेत सपरिवार कमलपोखरीस्थित सिटी सेन्टरमा गएर हेरेका थिए ।

प्रकाशित : चैत्र २६, २०७५ ०८:२८
पूरा पढ्नुहोस्
प्रतिक्रिया
पठाउनुहोस्