३०.१२°C काठमाडौं
काठमाडौँ — दिवाकर भट्टराईको निर्देशमा बन्न लागेको फिल्म ‘नरसिंहा : अवतार’ मा नायिका निती शाह अनुबन्धित भएकी छन् । निर्माण पक्षले आइतबार नितीको एउटा लुक्स पनि सार्वजनिक गरेको छ ।
सार्वजनिक लुक्समा निती महँगो पहिरन र गहनामा सजिएकी देख्न सकिन्छ । यद्यपि, फिल्ममा उनको भूमिकाबारे भने निर्माण पक्षले केही उल्लेख गरेको छैन ।
‘नरसिंहा : अवतार’ बाट नायक राजेश हमाल लामो समयको ब्रेकपछि कमव्याक गर्दै छन् । उनी ८ वर्षपछि फिचर फिल्ममा देखिन लागेकाले पनि ‘नरसिंहा : अवतार’ चर्चामा आएको छ । निर्माण पक्षले बिहीबार फिल्म निर्माणको घोषणासँगै थिम पोस्टर सार्वजनिक गरेको थियो । फिल्म युद्ध र शान्तिको कथामा केन्द्रित रहेको निर्माण पक्षले जनाएको छ ।
फिल्म क्रिएटिभ सिने आर्टको प्रस्तुतिमा बन्न लागेको हो । निर्माण पक्षले फिल्मको कथा र अन्य कलाकारबारे भने केही खुलाएको छैन । फिल्मको लगानी तीन करोडभन्दा माथि हुने बताइएको छ । भट्टराईले निर्देशन गरेको फिल्म ‘मायावी’ प्रदर्शनको तयारीमा छ ।
प्रकाशित : श्रावण २८, २०८१ ०६:४२
