१० चलचित्रकर्मीलाई सांस्कृतिक रूपान्तरण पुरस्कार
काठमाडौँ — चलचित्र विकास बोर्डले १० चलचित्रकर्मी र एक संस्थालाई ‘सांस्कृतिक रूपान्तरण पुरस्कार २०८०’ प्रदान गरेको छ । संविधान दिवसको अवसर पारेर बोर्डले सामाजिक तथा सांस्कृतिक रूपान्तरणमा योगदान पुर्याएको भन्दै प्रदान गरेको पुरस्कार ५० हजार रुपैयाँ राशिको छ ।
राजधानीमा मंगलबार आयोजित समारोहमा कलाकार मदनकृष्ण श्रेष्ठ, पत्रकार तथा निर्देशक विजयरत्न तुलाधर, अभिनेत्री मिथिला शर्मा, निर्देशक दयाराम दाहाल, मुकुन्द किशोर भट्टराई, श्याम सापकोटा, रेखा थापा, दीपाश्री निरौला, मनोज पण्डित, मीनबहादुर भाम पुरस्कृत भएका हुन् । सँगै चलचित्रकर्मी कल्याण कोष सञ्चालन समितिलाई पनि पुरस्कृत गरिएको छ । पुरस्कार सञ्चार तथा सूचना प्रविधिमन्त्री रेखा शर्माले हस्तान्तरण गरिन् ।
सामाजिक रूपान्तरणमा चलचित्रकर्मीको महत्त्वपूर्ण भूमिका हुने भन्दै मन्त्री शर्माले ठूलो पर्दामार्फत दर्शकलाई सुसूचित गर्न आग्रह गरिन् । उनले भनिन् 'अवस्थामा परिवर्तन आउनु आवश्यक छ । समाजलाई सही गतिमा डोर्याउन चलचित्रले महत्त्वपूर्ण भूमिका खेल्छ । अहिलेको अवस्था ल्याउन परिवर्तनकारी भूमिका निर्वाह गर्नुहुनेलाई हामीले सम्मान गर्यौ ।'
आगामी दिनमा पनि चलचित्रकर्मीलाई विशेष अवसर पारेर सम्मानित र पुरस्कृत गर्ने उनले बताइन । कलाकर्मीलाई मनोरञ्जनसँगै समाजलाई सही दिशामा डोर्याउने दायित्वलाई सम्झिएर अगाडि बढ्न उनले आग्रह गरिन् ।
पुरस्कृत व्यक्तित्वका तर्फबाट कलाकार श्रेष्ठले कामको मूल्यांकन भएकामा धन्यवाद दिए । 'नगद राशिसहितको पुरस्कारले पाउने व्यक्तिलाई ऊर्जा मिल्छ । बोर्डले आगामी दिनमा पनि चलचित्र र चलचित्रकर्मीको हितमा विभिन्न कार्यक्रम गर्नेमा विश्वस्त छु,' उनले भने, 'यस क्षेत्रलाई सरकारले अगाडि बढ्न मद्दत गर्नुपर्छ ।'
बोर्डले आगामी दिनमा चलचित्रकर्मीलाई प्रोत्साहन मिल्ने कार्यक्रमलाई निरन्तरता दिने बोर्ड अध्यक्ष भुवन केसीले बताए । कार्यक्रममा निर्देशक लक्ष्मीनाथ शर्मा, अभिनेत्री चैत्यदेवी, बसुन्धरा भुसाल, लक्ष्मी गिरीलगायतको उपस्थिति थियो ।
प्रकाशित : आश्विन २, २०८० २२:००
