'ब्ल्याक एडम' चीनमा प्रतिबन्धित- मनोरञ्जन - कान्तिपुर समाचार

'ब्ल्याक एडम' चीनमा प्रतिबन्धित

कान्तिपुर संवाददाता

काठमाडौँ — ड्वेन जोनसन अभिनित 'ब्ल्याक एडम' चीनमा प्रतिबन्धित गरिएको छ । फिल्मका अर्का कलाकार पियर्स ब्रोजननले तिब्बती आध्यात्मिक नेता दलाई लामालाई भेटेको प्रसंग बाहिरिएसँगै चीनले 'ब्ल्याक एडम' लाई प्रतिबन्ध गरेको अन्तर्राष्ट्रिय सञ्चारमाध्यमहरूले उल्लेख गरेका छन् ।

व्यावसायिक रुपले सफलता कमाइरहेको 'ब्ल्याक एडम'ले प्रदर्शनको दिनदेखि अहिलेसम्म २ सय मिलियन अमेरिकी डलर कमाइसकेको छ । तर, हलिउडका लागि सबैभन्दा ठूलो बजार मानिने चीनमा भने फिल्म प्रदर्शनमा आउने/नआउने अझै टुंगो भइसकेको छैन ।

यसअघि फ्यान फोरमहरूमा यो फिल्म चीनमा प्रतिबन्धित गरिने हल्ला फैलिएको थियो । त्यसपछि फिल्मका लागि प्रदर्शन अनुमति नदिएको खबर बाहिरिएको द हिन्दुस्तान टाइम्सले उल्लेख गरेको छ ।

अभिनेता ब्रोजननले भने जिक्यूसँगको एक अन्तर्वार्तामा आध्यामिक नेता लामालाई भेटेको कुरा सुनाउँदै उनको प्रशंसासमेत गरेका थिए । यही कारणले नै यो फिल्मलाई प्रदर्शन अनुमति नदिइएको चर्चा चलेको छ । यद्यपि यसबारे कुनै आधिकारिक घोषणा सार्वजनिक भइसकेको छैन ।

हरेक वर्ष चीनले विदेशी फिल्मको प्रदर्शनमा निश्चित संख्यालाई मात्रै प्रदर्शन अनुमति दिँदै आइरहेको छ । अधिकांश ठूला स्टुडियो यही सीमितताभित्र आफ्नो फिल्म पार्ने कोसिसमा रहने गर्छन् ।

प्रकाशित : कार्तिक २०, २०७९ १९:११
प्रतिक्रिया
पठाउनुहोस्

देश ठूलो आर्थिक संकटमा : पूर्वअर्थमन्त्री पौडेल

अमृता अनमोल

बुटवल — पूर्वअर्थमन्त्री विष्णुप्रसाद पौडेलले देशलाई आर्थिक संकटबाट पार लगाउन एमाले सरकार आवश्यक रहेको बताएका छन् । बुटवलमा आइतबार आयोजित अगुवा कार्यकर्ता भेलामा बोल्दै पौडेलले वर्तमान सरकारको असफलताका कारण मुलुक डरलाग्दो आर्थिक संकटमा पुगेको बताए ।

‘देशको आर्थिक अवस्था डरलाग्दो अवस्थामा छ । देशलाई श्रीलंका हुनबाट जोगाउन पुन: एमालेको जित र एमाले नेतृत्वको सरकार आवश्यक छ’,उनले भने ।

एमाले उपाध्यक्ष रहेका पौडेलले नाकाबन्दी, भुकम्प र कोरोना महामारीको अवस्थामा समेत नदेखिएको आर्थिक संकट अहिले देखिएको बताए । ‘एमाले सरकार र म अर्थमन्त्री हुँदा ४ दशमलव २ प्रतिशतमा रहेको मूल्यवृद्धि दर अहिले ८ दशमलव १ प्रतिशमा पुगेको छ । यो डरलाग्दो अवस्था हो,’उनले भने ।

रुपन्देही २ का उम्मेदवार पौडेलले आर्थिक समस्याको निकास, देशको विकास र संमृद्धि एमालेबाट मात्रै सम्भव रहेको दोहोर्‍याए ।


प्रकाशित : कार्तिक २०, २०७९ १८:५५
पूरा पढ्नुहोस्
प्रतिक्रिया
पठाउनुहोस्
×