'ऐना झ्यालको पुतली' अस्ट्रेलिया र न्युजिल्यान्डमा पनि प्रदर्शन हुने- मनोरञ्जन - कान्तिपुर समाचार

'ऐना झ्यालको पुतली' अस्ट्रेलिया र न्युजिल्यान्डमा पनि प्रदर्शन हुने

कान्तिपुर संवाददाता

काठमाडौँ — समीक्षात्मक रुपमा रुचाइएको फिल्म 'ऐना झ्यालको पुतली'लाई अस्ट्रेलिया र न्युजिल्याण्डमा देखाइने भएको छ । ९५ औं संस्करणको एकेडेमी अवार्ड (अस्कर)का लागि नेपालबाट सिफारिस भएको यस फिल्मको अस्ट्रेलिया र न्युजिल्यान्ड अधिकार पनि हालै बिक्री भएको छ ।

यसअघि जापानमा पनि फिल्मको अधिकार बिक्री भइसकेको छ । निर्माता आकाश पौडेल फिल्मले नेपाली दर्शकबीच चर्चा कमाएसँगै विदेशमा पनि डिमान्ड बढ्न थालेको हो ।

निर्माता पौडेलले अस्ट्रेलिया र न्युजिल्यान्डमा फिल्म प्रदर्शनको अधिकार जान्बी इन्टरटेनमेन्टले लिएको जानकारी गराएका छन् । दुई देशका लागि १५ लाख हाराहारीमा प्रदर्शन अधिकार विक्री भएको उनले बताए । त्यसैगरी अरब, कोरिया र अमेरिकामा पनि प्रदर्शन हुने तयारीमा छ । सुजित बिडारी निर्देशित यस फिल्मले '२० औं अन्तर्राष्ट्रिय ढाका फिल्म फेस्टिभल'मा उत्कृष्ट निर्देशकको अवार्ड जितेको थियो ।

त्यस्तै, यो फिल्म बुसानको न्यु करेन्ट सेक्सनमा छनौट भएको थियो ।फिल्मलाई आकाश पौडेलसँगै प्रविन स्याङ्बो, रामकृष्ण पोखरेल र सुजित बिडारी मिलेर निर्माण गरेका हुन् ।

प्रकाशित : आश्विन १३, २०७९ १०:४७
प्रतिक्रिया
पठाउनुहोस्

घर पोत्ने माटो खोज्न सास्ती

‘पक्की घर हुनेहरु चुनाले घर पोत्छन्, कच्ची घरमा रातो माटो र कमेरो नै लगाउँछौं’
मेनुका ढुंगाना

अछाम — गाउँमा चाडबाडसँगै बर्खे बाली भित्र्याउन सबै व्यस्त देखिन्छन् । अध्ययन र रोजगारीको सिलसिलामा घरबाहिर भएकाहरू गाउँमा आउँदा चहलपहल बढेको छ । विशेषगरी रोजगारीका लागि भारत गएकाहरू दसैंको मौकामा घर फर्किने गर्छन् ।

हिउँदेबाली लगाएर फेरि कामको खोजीमा जान्छन् । दसैंलाई धार्मिक रूपले पूजाआजाका माध्यमबाट शुद्ध बनाउनका लागि यो बेला महिलाहरू घर पोत्न रातो माटो र कमेरो माटो पाउने ठाउँमा लाइन लागेर पालो पर्खन्छन् । बर्सेनि दसैंमा पूरै घर पोत्नुपर्ने प्रचलन भएकाले घण्टौं हिंडेर माटो ल्याउने गरेको कमलबजार नगरपालिका ५ की कुन्ता विकले बताइन् । ‘कमेरो माटो त घर छेउमै पाइन्छ तर रातो माटो लिन ४/५ घण्टा नै हिंड्नुपर्छ’ उनले भनिन् , ‘घरमा कोही बितेको छ भने पूरै घर पोत्न मिल्दैन । घरलाई चोख्याउन कमेरो र रातो माटाले पोत्नुपर्छ ।’

मंगलसेन ५ की लल्ता भाटलाई माटो ल्याउन जाने चहलपहल भएपछि मात्रै दसैं आए जस्तो लाग्छ । नजिकै रातो माटो नपाइने भएपछि गाउँका सबै महिलाहरू जम्मा भएर मंगलसेन नगरपालिका–३ मा रहेको गाद्धेमा माटो लिन जान्छन् । ‘पक्की घर हुनेहरू चुनाले घर पोत्छन्, कच्ची घरमा रातो माटो र कमेरो नै लगाउँछौं,’ उनले भनिन्, ‘माटो निकाल्दा बोटबिरुवा सुक्न थालेको भन्दै कतिपय ठाउँमा माटो खन्न बन्द गरेपछि भने हामीलाई दुःख थपिएको छ ।’ घर शुद्ध पार्न वनजंगलमा माटो खोज्दै भौंतारिनुपरेको भाटले बताइन् । ‘घर पोत्ने रातो माटो र सेतो कमेरो जहाँसुकै पाइँदैन,’ उनले भनिन्, ‘दसैंमा कसको घर चिटिक्क छ भनेर दाँजिन्छ । त्यही भएर वर्षाभरि पानीले पखालेको भित्तो टाढाबाट हेर्दै टलक्क टल्किने गरी पोत्न थालेकी छु ।’


गाउँमा पक्की घर छिटफुटमात्रै छन । घटस्थापनाअघि नै घर चोख्याइन्छ । टपरीमा जमरा नयाँ माटोमा उमारिन्छ । त्यसैले पनि अहिलेदेखि नै आफूहरू माटोको जोहोमा लागेको स्थानीयले सुनाए ।

घरको माथिल्लो भागमा सेतो र तल रातोले भित्ता पोतिन्छ । कतिपयले धार्मिक मान्यताले पूरै घर रातो माटोले पोत्ने विरपथकी नमिता शाहीले बताइन् ।उनी घर पोत्ने तयारीमा छिन् । ‘हामीले सधैं पूरै घर रातो माटोले पोत्छौं,’ उनले भनिन्, ‘खाल्डोबाट आफैं खनेर ल्याउछौं । बजारको रंग लगाएर हामीलाई शुभसंकेत हुँदैन ।’ माटोको खानी सुरक्षित राखेपछि कतै हराउने र पुरिने गरेको उनले बताइन । माटोले पोत्नुपर्छ भन्ने धार्मिक मान्यता छ ।

घरबाट पन्ध्र किलोमिटर टाढाको खानीबाट रातो माटो घरमा ल्याइसकेको उनले बताइन छन् । ‘एक/दुई दिनमा घर पोत्ने हो । पोतेपछि घर पवित्र हुन्छ । दसैंमा टीका लगाएपछि मनै शान्ति हुन्छ,’ शाहीले भनिन्, ‘झ्याल, ढोकामा कालो रंग लगाइन्छ । विस्तारासहित सबै कपडा धोइन्छ ।’ उनका अनुसार कसले घर राम्रो पोतेको छ र चिटिक्क पारेको छ भन्ने छिमेकीबीच चर्चा चल्छ ।

खाल्डा असुरक्षित

माटो खन्दा धेरै ठुलो खाल्डो भएका ठाउँमा पुग्दा मात्र डर लाग्ने तर सामान्य खाल्डामा कुनै डरको महसुस नहुने मंगलसेन ४ की नैना केसीले बताइन् । ‘हतार हतार हुन्छ , कतीखेर माटो खनेर घर फर्किने र केटाकेटी हेरबिचार गर्ने भन्ने नै चिन्ता हुन्छ’ उनले भनिन् । माटो पोत्न महिलाले नै जानुपर्ने बाध्यात्मक अवस्थाले उनीहरू जोखिममा पर्ने गरेको उनको ठहर छ ।

प्रकाशित : आश्विन १३, २०७९ १०:४०
पूरा पढ्नुहोस्
प्रतिक्रिया
पठाउनुहोस्
×