'लालसिंह चड्ढा'को व्यापार २० प्रतिशतले बढ्यो- मनोरञ्जन - कान्तिपुर समाचार

'लालसिंह चड्ढा'को व्यापार २० प्रतिशतले बढ्यो

कान्तिपुर संवाददाता

काठमाडौँ — आमिर खान अभिनीत फिल्म 'लालसिंह चड्ढा' व्यावसायिक हिसाबले माथि उक्लन थालेको छ । प्रदर्शनको पहिलो दिन निकै कम ओपनिङ व्यापार गरेको फिल्मको तेस्रो दिनको कमाइ २० प्रतिशतले बढेको 'बक्स अफिस अफ इन्डिया डटकम'ले उल्लेख गरेको छ । 

फिल्मले तेस्रो दिनसम्म आइपुग्दा जम्मा २७ करोडको व्यापार गरेको छ । हलिउड फिल्म 'फरेस्ट गम्प'को हिन्दी रिमेक यो फिल्मले तेस्रो दिन भारु रकम ८ करोड ७५ लाखमाथिको कमाइ गरेको भारतीय संचारमाध्यमहरुले उल्लेख गरेका छन् । 'सेक्रेट सुपरस्टार'का निर्देशक अद्भेत चन्दनले निर्देशन गरेको यस फिल्ममा अभिनेता आमिरसँगै करिना कपुरको प्रमुख अभिनय छ ।

'बक्स अफिस अफ इन्डिया डटकम'ले शनिबार फिल्मले ४० प्रतिशतले व्यापार गर्ने अनुमान गरेको थियो । तर, फिल्मले शनिबार पनि २० प्रतिशत व्यापार गरेको थियो ।

सामाजिक सञ्जालमा फिल्मलाई ब्वोइकट गर्न थालेपछि 'लालसिंह चड्ढा'को यो हालत भएको हो । धार्मिक भावनालाई खलल पुर्‍याएको र भारतीय प्रहरीलाई गलत प्रस्तुत गरिएको भन्दै फिल्म विवादमा समेत तानियो । तर, यस्तै बेला अभिनेता आमिरले भने 'हर घर तिरंगा' अभियानमा सहभागी जनाउँदै आफ्नो घरमा भारतको झन्डा फहराएका छन् । आमिरले भारतको झन्डा फहराउन थालेसँगै के दर्शकको भीड हलमा उनको फिल्म हेर्न ओइरिएला ? त्यो त पछि नै थाहा हुनेछ ।

प्रकाशित : श्रावण २९, २०७९ १७:११
प्रतिक्रिया
पठाउनुहोस्

दुई हिमालको फेदमा दूधकुण्ड

भानुभक्त निरौला

सोलुखुम्बु — समुद्री सतहबाट ४ हजार ६ सय मिटर उचाइमा रहेको प्रसिद्ध धार्मिकस्थल दूधकुण्ड पोखरी सोलुखुम्बुको सोलुदूधकुण्ड नगरपालिका वडा नम्बर १ मा अवस्थित छ । नुम्बुर र कार्यालुङ हिमालको काखमा अवस्थित दूधकुण्ड पोखरी हिन्दु र बौद्ध धर्मावलम्बीहरुको आस्थाको केन्द्र हो ।

सत्य युगमा शिवजी तपस्या गरेको र समुन्द्र मन्थन समेत भएको स्थानको रुपमा रहेको दूधकुण्डको दर्शन गर्न बर्सेनि हजारौंको संख्यामा तीर्थालुहरु यहाँ पुग्ने गरेका छन् । जिल्ला सदरमुकाम सल्लेरीबाट २ दिनको पैदलमा पुग्न सकिने यस ठाउँको प्राकृतिक मनोरम विशिष्ट प्रकृतिको छ । यहाँ हिमालबाट बग्ने पानीबाट बनेको मनोरम ताल, त्यही तालबाट बग्ने सोलुखोलाको सुस्केरा अनि ठाउँ ठाउँमा जमेका हिमाली तालहरुले जोकोहीको पनि मन लोभ्याउने गरेको छ । अन्य सिजनमाभन्दा जनै पूर्णिमाको अवसरमा बर्सेनि हजारौं पर्यटक पुग्ने गर्दछन् ।


प्रकाशित : श्रावण २९, २०७९ १७:१०
पूरा पढ्नुहोस्
प्रतिक्रिया
पठाउनुहोस्
x
×