लोफाइ आर्टिस्ट सगुनलाई गोल्ड अवार्ड - मनोरञ्जन - कान्तिपुर समाचार
कान्तिपुर वेबसाईट
AdvertisementAdvertisement

लोफाइ आर्टिस्ट सगुनलाई गोल्ड अवार्ड 

कान्तिपुर संवाददाता

काठमाडौँ — लोफाइ आर्टिस्ट सगुनले रेर्डिङ इन्डस्ट्री एसोसिएसन अफ अमेरिका(आरआईएए) बाट गोल्ड अवार्ड पाएका छन् । साइलो डायनास्टीसँगको सहकार्यमा तयार भएको 'आई विल किप यु सेफ'ले नै सगुनलाई गोल्ड अवार्ड दिएको हो।

'आई विल किप यु सेफलाई गोल्ड सर्टिफिकेट प्राप्त भएको छ । म सबैलाई धन्यवाद दिन चाहन्छु, जसले यो सम्भव बनाउन सहयोग गर्नुभयो । प्लटुन, प्रोफ्लोगिक, जोर्डन स्मिथलाई धन्यवाद । अझै अगाडि बढ्नुछ,' सगुनले खुसी हुँदै सामाजिक सञ्जाल इन्स्टाग्राममा लेखेका छन् ।

आरआईएएले कुनै संगीत ५० हजार युनिट बिक्री भइसकेपछि गोल्ड अवार्ड दिने गरेको छ । गायक/गायिकाका लागि आरआईएएको अवार्ड सफलताको अर्को मानक मानिन्छ ।

यसअघि नेपाल मुलका कर्टिस वाटर्स अर्थात अभि बास्ताकोटीले पनि गोल्ड अवार्ड पाएका थिए । 'स्टनिन'बाट उनले यो अवार्ड जितेका थिए ।

नेपालमै बसेर गोल्ड अवार्ड जितेका सगुन स्पटलाइटमा आउन रुचाउँदैनन् । त्यसैले उनलाई लोफाइ आर्टिस्टका रुपमा चिन्ने कम छन् । सगुनको 'आइ विल किप यु सेफ' सुनेसँगै अमेरिकाको एक रेडियोेले उक्त लोफाइ संगीत बजाउन अनुमति मागेको थियो । त्यही रेडियोमार्फत सगुन एप्पल म्युजिकमा काम गर्ने प्रोफेटसँग उनी नजिकिए र 'प्लटन'सँग जोडिए । 'प्लटन'ले नै सगुनका लोफाइ वितरण गरिदिन्छन् ।

प्रकाशित : श्रावण १८, २०७९ १९:१३
प्रतिक्रिया
पठाउनुहोस्

दृष्टि फर्किएका चित्रकारहरूले बनाए भित्तेचित्र

कान्तिपुर संवाददाता

काठमाडौँ — दृष्टि फर्किएका मिथिला चित्रकारहरूले ‘दृष्टिको चमत्कारले परिवर्तित जीवनहरू’ शिर्षकमा तिलगंगा आँखा प्रतिष्ठानमा भित्तेचित्र बनाएका छन् ।

जनकपुरका मिथिला चित्रकारहरू निर्मला झा, राजकुमारी सिंह र अन्जिना यादवले तयार पारेको यो भित्तेचित्रलाई मंगलबार नेपालका लागि अष्ट्रेलियाका राजदूत फेलिसिटी भोल्क र प्रतिष्ठानका प्रमुख कार्यकारी अधिकृत डा. रिता गुरुङले संयुक्त रुपमा अनावरण गरेका थिए ।

मिथिला चित्रकारद्वय राजकुमारी सिंह र अन्जिना यादव आँखाको समस्याबाट गुज्रिएर उपचारपछि आँखा देख्न सक्ने भएका व्यक्ति हुन् ।

चित्रकार सिंहले मोतिविन्दु भएर चित्रकला कार्यमा धेरै गाह्रो भएको र शल्यक्रियापछि अहिले एकदम सहज भएको बताइन्। अर्का चित्रकार यादवले भित्तेचित्रमा आँखाको महत्त्वलाई चित्रित गराउन पाउँदा खुसी लागेको बताइन् ।

यो भित्तेचित्रको मुख्य सन्देश उपचार भएमा धेरै प्रकारका अन्धोपनहरू निवारण गर्न सकिन्छ भन्ने रहेको चित्रकारहरू बताउँछन् ।३० वर्षदेखि अनवरत रुपमा नेपाल र विश्वमा अन्धोपन निवारण र नियन्त्रण गर्न पुर्‍याएको योगदानको कदर स्वरुप भित्तेचित्र निर्माण गरिएको हो ।

प्रतिष्ठानले मिथिला कलाकृतिबाट पुनः प्रयोग योग्य प्लाष्टिकका बोत्तलहरू रेसाबाट निर्मित चश्माका खोलहरू बनाएर स्थानीय रोजगारी सिर्जना गर्ने र सो उत्पादनलाई विश्वव्यापी रुपमा बेच्ने लक्ष्य राखेको चित्रकारहरूको भनाइ छ ।

प्रकाशित : श्रावण १८, २०७९ १९:०९
पूरा पढ्नुहोस्
प्रतिक्रिया
पठाउनुहोस्
×