मिस युनिभर्स नेपालको आवेदन खुला- मनोरञ्जन - कान्तिपुर समाचार

मिस युनिभर्स नेपालको आवेदन खुला

कान्तिपुर संवाददाता

काठमाडौँ — ‘ओरिफ्लेम मिस युनिभर्स नेपाल २०२२’का लागि आवेदन खुला गरिएको छ । मिस युनिभर्स फ्रेन्चाइज अन्तर्गत उमंग क्रिएसनद्वारा तेस्रो पटक आयोजना हुने प्रतियोगितामा समावेशिता र अवसरको सिर्जना गरिने मिस युनिभर्स नेपालकी राष्ट्रिय निर्देशक नग्मा श्रेष्ठले बताइन् ।

यसअघि झैं यस वर्ष पनि प्रतियोगितामा उचाइ र तौलको मापदण्ड हुने छैन । समलैंगिक महिलाहरूले समेत सहभागिता जनाउन पाउने यस प्रतियोगितामा देश बाहिर रहेका अन्य नेपाली युवतीहरूले पनि आवेदन दिन सक्ने बताइएको छ ।

मिस युनिभर्स नेपालको ताज पहिरेर आफ्नो देशलाई ७१ औं मिस युनिभर्सको मञ्चमा प्रतिनिधित्व गर्न चाहने सबै साहसी, सशक्त र सुन्दर युवतीहरूले मिस युनिभर्स नेपालको आधिकारिक एपमार्फत दर्ता गरी प्रतियोगितामा भाग लिन सक्ने नग्मा बताउँछिन् ।

प्रतियोगिताका लागि ५ मे देखि दुई महिनासम्म आवेदन खुला रहनेछ । यो दुई महिनामा उमंग क्रिएसनले नेपालभर विभिन्न कार्यक्रम तथा कार्यशाला गर्ने घोषणा गरेको छ।

अघिल्लो वर्षकी मिस युनिभर्स नेपाल सुजिता बस्नेत र आयोजक समूहले काठमाडौंका कलेजसँगै विराटनगर, वीरगन्ज, भरतपुर, बुटवल, नेपालगन्ज, पोखरा, सुर्खेतलगायत सबै प्रदेशका सहरहरूको पनि भ्रमण गर्ने बताइएको छ ।

अगस्ट १९ मा सुन्दरीहरुबीच अन्तिम प्रतिस्पर्धा हुनेछ । विजेताले मिस युनिभर्सको ७१ औं संस्करणको मञ्चमा नेपाललाई प्रतिनिधित्व गर्ने अवसर प्राप्त गर्नेछिन्। साथै १० लाख नगदसँगै अन्य उपहार पनि प्राप्त गर्नेछन् ।

प्रकाशित : वैशाख २५, २०७९ १४:५५
प्रतिक्रिया
पठाउनुहोस्

जेठ ३ गते बजेट अधिवेशन बोलाउन सिफारिस

कान्तिपुर संवाददाता

काठमाडौँ — सरकारले जेठ ३ गते बजेट अधिवेशन बोलाउन सिफारिस गर्ने निर्णय गरेको छ । आइतबार बसेको मन्त्रिपरिषद् बैठकले जेठ ३ गते अपरान्ह ४ बजे बजेट अधिवेशन बोलाउनका लागि राष्ट्रपति समक्ष सिफारिस गर्ने निर्णय गरेको भूमि व्यवस्था, सहकारी तथा गरिबी निवारण मन्त्री शशी श्रेष्ठले जानकारी दिइन् ।

सरकारले हरेक वर्षको जेठ १५ गते बजेट ल्याउनुपर्ने संवैधानिक व्यवस्था छ । अघिल्लो वर्ष सरकारले अध्यादेशबाट बजेट ल्याएको थियो ।

प्रकाशित : वैशाख २५, २०७९ १४:५४
पूरा पढ्नुहोस्
प्रतिक्रिया
पठाउनुहोस्
×