'चपलीहाइट-३' : क्राइम थ्रिलरमा निकेशको औसत प्रयास- मनोरञ्जन - कान्तिपुर समाचार

'चपलीहाइट-३' : क्राइम थ्रिलरमा निकेशको औसत प्रयास

रीना मोक्तान

काठमाडौँ — ब्रान्ड बेचेर कमाउनु सिक्वेल फिल्महरूको प्रमुख उद्देश्य नै भएको छ । 'लुट', 'कबड्डी', 'नाइ नभन्नु ल', 'ए मेरो हजुर', 'छक्कपञ्जा'का सिक्वेल व्यापारिक नाफाकै लागि बने । कतिले व्यवसायिक सफलता पाए, कसैले प्रचारको खर्च उठाउन पनि सकेनन् ।

गायनबाट निर्माणमा होमिएका अर्जुन कुमारले पनि 'चपलीहाइट'को ब्रान्ड बेचेर 'चपलीहाइट २' बनाए । तर फिल्मले न 'चपलीहाइट'ले झैं प्रशंसा कमायो न पैसा । कोभिड महामारीकै कारण झन्डै २ वर्ष अलमलमा परेको फिल्महरूको सूचीमा पर्छ -'चपलीहाइट ३' । अनन्त: क्राइम थ्रिलरमा आधारित यो फिल्म यो शुक्रबारदेखि हलमा प्रदर्शनमा आयो ।

दक्षिण भारतीय फिल्मका अल्लु अर्जुनको 'पुष्पा'सँग भिड्नुपर्दा निर्माण टिमले 'चपलीहाइट ३'को प्रदर्शन पुस १५ का लागि सारे । तर त्यही मितिमा 'कठपुतली'ले पहिल्यै प्रदर्शन तय गरिसकेका हुनाले यो फिल्म पुस ३० मा सर्‍यो । यसबीच आउने भनिएको बलिउडको प्रतिक्षित फिल्म 'आरआरआर'को प्रदर्शन पनि सरेपछि भने यी दुई नेपाली फिल्मले ढुक्कको सास फेर्न पाए ।

राम्रा बलिउड र हलिउड फिल्म नभएपछि क्युएफएक्सले पनि सजिलै शो दिने गर्छन् । तर हलमा शो पाउनु नै मुख्य कुरा होइन, फिल्मको कन्टेन्ट कत्तिको बलियो छ, त्यसैले पाएको शो बढ्ने/घट्ने निर्धाण हुन्छ ।

निकेश खड्का निर्देशित यो फिल्मको कन्टेन्ट भने अन्य सिरिजभन्दा माथि उक्लेको छ । क्राइम थ्रिलर हेरिरहने दर्शकका लागि कथा नौलो छैन । तर फिल्मको प्रस्तुतिकरणले 'चपलीहाइट ३'लाई अन्यभन्दा केही हदको राम्रो बनाएको छ । कति कुरा पहिल्यै नै अनुमान गर्न सकिने भए पनि सस्पेन्स र थ्रिलरले १ घण्टा ४६ मिनेटसम्म दर्शकलाई फिल्मले बाँधेर राख्छ । यसअर्थमा निर्देशक निकेश खड्काको निर्देशनलाई 'वाह' भन्न नसके पनि नराम्रो भनिहाल्न सकिँदैन ।

एक दिन क्लबबाट फर्कने क्रममा श्रद्धा रायमाझी (स्वस्तिमा खड्का)को गाडी 'चपलीहाइट'मा पुगेर बिग्रन्छ । तीनजना युवा सहयोग गर्न आउँछन् तर उनीमाथि दुर्व्यवहारको प्रयास हुन्छ । उनलाई पच्छ्याउँदै चपलीहाइट पुगेका धनाढ्य व्यापारीका छोरा 'पारस'(आमिर गौतम) त्यहीँ मारिन्छन् । घटना प्रहरीकहाँ पुग्छ । व्यापारीका परिवारले ती तीनजनाको खोजी सुरु गर्छ । व्यापारीका परिवारले प्रहरीमा नराम्रो छवि बनाएका एक इन्सपेक्टर (महेश त्रिपाठी)लाई ती तीनलाई खोज्न मोटो रकममा किन्छन् ।

व्यापारी, प्रहरी र मिडिया जोडिएपछि घटनाले अर्कै रुप लिँदै जान्छ । 'पारस'को हत्यारा पत्ता लगाउन प्रहरीको कदम कस्तो होला, त्यो घटनामा प्रहरीलाई श्रद्धाले कसरी सहयोग गर्लिन् ? ती तीनको पहिचान कसरी होला ? भन्ने प्रश्नको जवाफ 'चपलीहाइट ३' हेरेपछि पाइन्छ ।

निर्देशकले इमान्दार भएर फिल्मको कथा भन्न खोजे पनि केही कुरामा फिल्मको कथा चिप्लिएको छ । कति मसिना तर महत्वपूर्ण कुरालाई ध्यानै दिइएको छैन । क्लबको एउटा दृश्यमा फिल्मको साउन्ड 'जर्क' सुनिन्छ । सामान्य सइले स्कर्पियो चढेको देखाइएको छ । प्रिया(सुपुष्पा भट्ट)ले क्लबको दृश्यलाई दोहोर्‍याइरहँदा उनले लगाउने पहिरण भने उस्तै देखाइँदैन । एउटै घटनामा किन पहिरन फेरियो भन्ने कुराको कारण प्रष्ट छैन । क्लबको दृश्य दोहोर्‍याइरहँदा श्रद्धाको पहिरन भने एउटै हुन्छ ।

फिल्मको अर्को दृश्यमा इन्स्पेक्टरलाई उनको टुकटुके फोनमा 'ससपेक्टर'को फोन आउँछ । तर इन्सपेक्टरले आफ्नो फोनमा आएको कल उठाउन श्रद्धालाई दिन्छन् । सस्पेक्टरले श्रद्धालाई नै प्रत्यक्ष मोबाइलमा फोन नगरेर किन इन्सपेक्टरमार्फत् गरे भन्ने कुराको कुनै लजिक फिल्ममा भेटिँदैन ।

फिल्मका यी सब दृश्यलाई 'फिल्म लिबर्टी' भनेर पक्कै दर्शकले पत्याउँदैनन् । पटकथामा कमजोरी थुप्रै छन् । संवादमा मेहनत आवश्यक थियो । श्रद्धा र आश्रमकी बहिनीको सम्बन्धलाई विश्वासिलो ढंगले स्थापना गर्न फिल्म चुकेको छ । कथाको प्रमुख गुदी अड्किएको विषयमै लापरवाही देखाएपछि दोस्रो हाफमा दर्शकलाई फिल्ममा अडिरहन गाह्रो पर्छ ।

थ्रिलर र सस्पेन्स सिर्जना गर्नतिरै ध्यान दिँदा प्रिया हराएको कुरा लामो समयसम्म दर्शकले बिर्सिसक्छन् । अर्थात् यसले कुनै उत्सुकता दिँदैन । यद्यपि प्रियाको कथालाई हतार-हतार अन्य दृश्यसँग तालमेल मिलाउन खोजेको देखिन्छ । प्रियासँगकै अर्को दृश्यमा भने श्रद्धा भक्कानिन्छिन् । तर उनी दुईबीचको सम्बन्ध नै प्रष्ट नहुँदा फिल्ममा उक्त दृश्यले खासै अर्थ राख्दैन । उक्त दृश्य नै क्लिसे छ ।

त्यस्तै, अचानक श्रद्धाको निकट हुन खोजेका प्रहरी सइको व्यवहार पत्याइहाल्न सकिने किसिमले लेखिएको छैन । नराम्रा छवि देखाइएका इन्स्पेक्टरले श्रद्धामाथि तुरुन्तै विश्वास गर्नु, अनि व्यवहारमा झट्ट बदलाव ल्याउने कुरा राम्रोसँग स्थापना गर्न नसक्दा कथालाई दर्शकले महसुस गर्न सक्दैनन्।

दोस्रो हाफपछि फिल्म सक्ने हतारमा क्लाइमेक्स नै बिग्रिएको छ । क्लाइमेक्समा जति तनाव सिर्जना हुन्छ त्यसले उत्साहको स्तरलाई त्यही उचाइमा पुर्‍याइदिन्छ । तर क्लाइमेक्समै पटकथाकारले फिल्म सक्न हतार गरिदिँदा 'चपलीहाइट ३'ले त्यो तनाव सिर्जना गर्दैन जुन अक्सर क्राइम थ्रिलर फिल्महरूमा देख्न सकिन्छ । क्लाइमेक्समै फिल्म बिग्रिएपछि फिल्म सतही बन्न पुग्छ ।

यसकारण 'चपलीहाइट ३'को क्लाइमेक्स खल्लो र क्लिसे छ । डिएसपी(दीपाश्री निरौला)को चरित्रलाई खासै महत्व दिइएको छैन । जे होस्, देखाउन खोजिएको थ्रिलर र सस्पेन्स अनि कलाकारको अभिनयले फिल्मका कमजोरीसँग दर्शक सम्झौता गर्न बाध्य बन्छन् ।

इन्सपेक्टरको भूमिकामा कलाकार महेश त्रिपाठीको अभिनय भने प्रशंसनीय छ । दाम्पत्य जीवनको समस्या, कामप्रतिको जिम्मेवारी र चुनौतिलाई उनले आफ्नो अभिनयबाट इन्स्पेक्टरको पात्रमा बाँचिदिएका छन् । श्रद्धाको भूमिकामा स्वस्तिमाले आफ्नो अब्बल अभिनय देखाएकी छन् । केही ठाउँमा लाउड लागे पनि 'बुलबुल'को अभियनलाई उनले बिर्साइदिएकी छैनन् ।

अभिनेत्री लक्ष्मी बर्देवाले भने छोटो अवधिको दृश्यमै आफ्नो अभिनय कौशल पुष्टि गरेकी छन् । उनले आफ्नो भूमिकालाई इमान्दार भएर निर्वाह गरेकी छन् । सुपुष्पाको अभिनय 'रणवीर'मा देखिएको भन्दा फरक छैन । उनको चरित्रलाई ग्ल्यामरकै लागि देखाइएको छ । दीपाश्रीले सानो भूमिकामा पनि आफ्नो चरित्र असल तरिकाले निभाएकी छन् ।

तर उनको भूमिका नै प्रष्टसँग लेखिएको छैन । डिएसपीजस्तो व्यक्तिको भूमिकालाई घटनामा एकपटक मात्र चासो राखिएको देखाइएको छ । अर्पन थापाको अभिनय तारिफलायक नै छ । फिल्ममा साउन्डको काम उत्कृष्ट छ । उत्तम न्यौपाने 'सिएएस'को साउन्डले फिल्ममा नै थ्रिलर सिर्जना गर्न महत्वपुर्ण भूमिका खेलेको छ । साउन्डमा उनले देखाएको प्रखरता प्रशंसाको विषय हो ।

प्रकाशित : पुस ३०, २०७८ २१:२३
प्रतिक्रिया
पठाउनुहोस्

रिस पोख्‍ने थलो- तोडफोड

रीना मोक्तान

काठमाडौँ — 'भँडास, माया, जात, धोका, पागल, रिलिज द एङ्गर, म्याडनेस, डर लाग्यो, तनाव, बुम!' यस्तै-यस्तै अक्षरहरुले भरिएको सानो कोठा । दुईवटा टायर र एउटा ड्रम, छेउमा फलामका रड । कोठाको ठीकबाहिर पीपीई सुट ।

दुई युवाहरु पीपीई सुट, ग्लोब्स, चस्मा, मास्क, ह्याटमा कोठाभित्र छिर्नेबित्तिकै चर्को आवाजमा गीत बज्यो । उनीहरु उफ्रँदै, खुसी हुँदै बियरका बोतल फुटाउँदैछन् । छेउमा भएका टायरलाई सक्दो बल लगाएर चुट्दैछन् । करिब ८-१० वटा बोतल फोडेर उनीहरु बाहिर निस्के । यो बन्द कोठाको नाम हो, तोडफोड- रेजरुम ।

बन्द कोठाभित्र विभिन्न वस्तुहरु फुटाएर आफूभित्रको आक्रोश हटाउन प्रयोग गरिने 'रेजरुम'को कन्सेप्टमा तोडफोड पुस २३ बाट काठमाडौंको त्रिपुरेश्वरमा खुलेको छ ।

'जसलाई फ्रस्टेसन हुन्छ । रमाइलोका लागि यहाँ आउँदा हुन्छ । यस्तो ठाउँहरु फ्रस्टेसन कम गर्नभन्दा पनि रमाइलोका लागि खोल्नुपर्छ भन्ने लाग्छ,' कोठाभित्रबाट बाहिर निस्कँदै गर्दा २१ वर्षीय दिवस अधिकारीले सुनाए । दिवसको कुरा सकिनेबित्तिकै स्वयम ढकालले थपे,'कलेजको व्यवस्थापन, देश, सरकार, बेरोजगार हुनुको फ्रस्टेसन थियो । हामीले त्यो रिस सिसामा पोख्यौं।'

उनी दुवैले टिकटक भिडियोबाट तोडफोडबारे थाहा पाएका रहेछन् । सिसा फुटाउँदै भिन्नै अनुभव भएको स्वयमले सुनाए । 'पहिलो पटक सिसा त्यसरी फुटाउँदा आएको आवाजले त त अर्कै अनुभव भयो । मज्जा आयो । त्यसरी पहिला कहिल्यै सिसा फुटाएका थिएनौं,'उनले भने ।

तोडफोडमा आएका दुई सहभागीको प्रतिक्रिया सुनेर उत्साहित छन् सञ्चालक विभूषण शर्मा । तनाव हटाउनभन्दा पनि मनोरञ्जनका लागि 'तोडफोड' खोलेको बताउँछन् । 'रेज रुमको विषयमा मैले एउटा लेखबाट थाहा पाएँ । सुरुमा यसको कन्सेप्ट सुन्नेबित्तिकै प्रश्नहरु मनमा आयो । मैले यसको बारेमा धेरै खोजेँ । काठमाडौं उपत्यकामा यति तनावमा छन् । तनाव त भइहाल्यो, काठमाडौंमा मनोरञ्जनका लागि सीमित स्थान मात्रै छन् । त्यसैले मनोरञ्जनका लागि केही नयाँ गरौं भन्ने सोचेरै रेज रुमको कन्सेप्टमा काम गर्यौं ,' उनले सुनाए ।

रिस उठ्दा विभूषणलाई पनि सामानहरु फुटाउन मन लाग्थ्यो । एकपटक रिसमा मोबाइल फुटाइदिए । कम्युटर ह्याङ्ग हुँदा कम्प्युटर नै फुटाइदिए । आफ्नो सामान फुटाउँदा त आफैलाई घाटा । बरु फुटाउनै मिल्ने स्थानमा गएर फुटाउनुको मज्जा कस्तो होला भन्ने कौतुहलताले पनि विभूषणलाई रेज रुमको स्टार्टअप व्यवसाय खोल्न प्रेरित गर्‍यो ।

'तोडफोडको प्याकेज किनेर भएको जति रिस त्यसमा पोख्दा भइहाल्यो । तपाईंलाई त्यसले राहत मिल्नेछ,'उनले भने । सहभागी हुन चाहनेहरु सजिलै तोडफोडको कोठाभित्र छिर्न पाउँदैनन् । उनीहरुलाई सुरुमा स्वीकृति पत्रमा हस्ताक्षर गर्न लगाइन्छ । सहभागी हुन चाहनेले टिभी, फ्रिजदेखि अन्य भान्साका सामग्रीलाई फोड्न चाहेमा तोडफोडले त्यसको पनि व्यवस्थापन गरिदिन्छ।

झट्ट हेर्दा तोडफोड जोखिमपूर्ण देखिन्छ । यस्तो जोखिमपूर्ण कुरामा मनोरञ्जन लिन मानिसहरु आउलान् त ?

प्रश्नको जवाफ दिँदै शर्माले भने,'हामीले जसरी यसको प्रचार गरेका छौं, त्यो हेर्दा त मानिसहरु आउँछन् भन्ने नै लाग्छ । अर्को कुरा हामी पीपीई, ह्याट, चस्मा, वेल्डिङ ग्लोब्स, जुत्ता लगाएको व्यक्तिलाई मात्र भित्र छिराउँछौं । तोडफोडमा सहभागी हुनेको सुरक्षामा त्यत्तिकै ध्यान दिने प्रयास गरेका छौं । उहाँहरुलाई चोटपटक नलागोस् भन्ने नै हाम्रो मुख्य उद्देश्य हो ।'

तोडफोडमा ३ सय ५० देखि १५ सय रुपैयाँसम्मको प्याकेज छन् । सोच कम्पनीमार्फत तोडफोड खुल्यो । अहिले तोडफोडको कन्सेप्ट बुझाउन आफूहरुलाई चुनौती भएको अनुभव सुनाउँछन् विभूषण । भन्छन्,'सुरुमा त आफ्नो परिवारलाई नै कसरी बुझाउने भन्ने थियो । मैले आमाबुवालाई कन्सेप्ट सुनाएँ । तर उहाँहरुको प्रतिक्रिया एकदम सकारात्मक थियो । बुवाले त सामग्री फुटाइसकेका व्यक्तिलाई मन्द संगीतमा आराम गर्ने अर्को कोठा पनि हुनुपर्छ भन्दै सल्लाह दिनुभयो । मैले त उहाँले साथ दिनुहुन्न भन्ने लागेको थियो । तर रेज रुम बुझ्न धेरै गाह्रो हुँदैन रहेछ ।'

'रेज रुम'को कन्सेप्ट पहिलो पटक सन् २००८ मा जापानमा खोलेको थियो । त्यसपछि उक्त कन्सेप्ट विभिन्न देशहरुले पछ्यायो । अमेरिकामै पनि सयभन्दा बढी 'रेज रुम' खुलेका छन् । रेजरुमलाई लिएर चिकित्सकदेखि विभिन्न व्यक्तिहरुले मिश्रित प्रतिक्रिया दिएका छन् । कतिले यसले मानिसको रिस हटाउन मद्द नगरी, रिस बढाउनेको काम गरेको अध्ययन पेस गरेका छन् भने कतिले यसको आवश्यकताबारे प्रतिक्रिया दिएका छन् । भारतको 'भँडास क्याफे' रेज रुमकै कन्सेप्टमा तयार पारिएको हो ।

विभूषण रेज रुमको कन्सेप्टलाई तोडफोडमार्फत पहिलो पटक नेपालमा आफैले सुरु गरेको दाबी गर्छन्। यसअघि उनले नै टर्किस आइसक्रिमको कन्सेप्टलाई नेपालमा भित्र्याएका थिए ।

३ लाख बढीको लगानीमा सुरु गरेको तोडफोडमा उनले५ जना कर्मचारी राखेका छन् । तोडफोडका प्रचारका लागि उनीहरुले टिकटकलाई प्रयोग गरेका छन् । 'कतिले टिकटकमार्फत सजिलै बुझ्नु भएको छ । यस्तो पनि गर्ने र भन्नेहरु पनि छन् । तर त्यही त हाम्रो व्यवसायको चुनौती हो । मनोरञ्जनका लागि क्लब, रेस्टुरेन्टमा मानिसहरु गइरहेकै हो । तर यो त सबैका लागि नयाँ हो,'उनी सुनाउँछन्,'मैले पनि रेज रुमभित्र बोतल फोडेँ । पहिला फोड्दा त डर नै लाग्यो । जब त्यो रडले त्यसलाई पड्काइन्छ । अर्कै किसिमको अनुभव हुँदो रहेछ । अर्कै किसिमको रमाइलो हुन्छ ।'

एक वर्षको तयारीपछि विभूषणले तोडफोड खोले । उनले फुटेका सिसाको टुक्रा रिसाइकल गर्ने मेसिनलाई भारतबाट मगाएका छन् । '२ लाख बढी पर्ने त्यो मेसिनलाई मगाएका छौं । त्यो मेसिनले बोतललाई बालुवा बनाउँछ । त्यसलाई अर्कै तरिकाले प्रयोग गर्ने हाम्रो सोच छ,'उनले भने,'पहिला म तोडफोड गर्थें अहिले अरुलाई गराउँछु । यो वर्षभित्र ३ ठाउँमा तोडफोडको ब्रान्च खोल्ने योजना छ ।बन्द गर्ने त सोचेकै छैन ।'

प्रकाशित : पुस २४, २०७८ १४:४०
पूरा पढ्नुहोस्
प्रतिक्रिया
पठाउनुहोस्
×