फिल्म हल खुले तर छैन नयाँ रिलिज- मनोरञ्जन - कान्तिपुर समाचार
कान्तिपुर वेबसाईट
AdvertisementAdvertisement

फिल्म हल खुले तर छैन नयाँ रिलिज

रीना मोक्तान

काठमाडौँ — दसैं-तिहारमा फिल्म प्रदर्शन गर्नु व्यावसायिक हिसाबले सुखद मानिन्थ्यो । दसैं-तिहारको लामो बिदामा फिल्म प्रदर्शन गर्न नेपाली फिल्मका निर्माता 'तँछाडमछाड' नै गर्थे । चाडपर्वको समयमा हलमा दर्शकको भीड थामिनसक्नु हुन्थ्यो । तर कोरोना महामारीबीचको दसैं-तिहारमा उस्तै दृश्य देखिएन । अधिकांश निर्माता दसैं-तिहारमा फिल्म प्रदर्शन गर्न पछाडि हटे । एउटै मितिमा फिल्म प्रदर्शन गर्न हानाथाप गर्नेहरु त्यसबाट भागमभाग गर्न थाले ।

हालैको दसैंमा हल खुल्दा पनि एक निर्माताले मात्र फिल्म प्रदर्शन गर्ने आँट गरे । चलचित्र विकास बोर्डले पुस मसान्तसम्म प्रदर्शनमा आउने फिल्मको 'इन्कोडिङ', भर्चुअल प्रिन्ट कस्ट (भीपीसी), 'प्रसारप्रसार तथा छपाई'को रकम दिने घोषणा गर्दा पनि निर्माताहरुले फिल्म प्रदर्शनको जोखिम मोल्न सकेनन् ।

महामारीकै कारण दर्जन बढी फिल्मले प्रचारप्रसारपछि पनि फिल्म प्रदर्शन गर्न पाएनन् । ४ दर्जन बढी फिल्मको प्रदर्शन अझै अलमलमा छ । अंग्रेजी फिल्म 'फास्ट एण्ड फ्युरियस ९'को प्रदर्शनसँगै हल संचालनमा आयो । फूलपातीको दिनदेखि निर्देशक सोभित बस्नेतले 'डाँडाको वरपीपल' हलमा लगाए । तर फिल्मले हलसम्म दर्शक तान्न सकेन । मल्टिप्लेक्स चेनअन्तर्गत क्युएफएक्सले फिल्म प्रदर्शनको तेस्रो दिनदेखि नै हलबाट 'डाँडाको वरपिपल'लाई हटायो ।

फिल्मका निर्देशक सोभित बस्नेत हलमा जाने दर्शकको बानी छुटिसकेको बताउँछन् । आफूले 'हल खुल्यो है' भन्ने सन्देश दिनका लागि मात्र पनि कसैले नआँट्दा फिल्मको प्रदर्शन गरेको उनको भनाइ छ । 'हाम्रा निर्माताहरु यस्तो अवस्थामा फिल्म चलाउन डराउँछन् । तर मेरो अनुभवमा अबको ८/९ महिना अझै दर्शक हलमा आउँदैनन्,' उनले भने, 'महामारीबीच हल खोल्दा पनि दर्शक हलमा गएनन् । डराएर पनि होइन । क्लबदेखि रेस्टूरेन्टको भीडमा उनीहरु मिसिन पुगेकै हुन्छन् । खासमा हल पुगेर फिल्म हेर्ने दर्शकको बानी छुटिसकेको छ ।'

बस्नेतले ओटीटी लक्षित गरेर 'डाँडाको वरपिपल' निर्देशन गरेका थिए । तर फूलपातीको दिन हलमै लगाए । ५० लाख लगानीमा बनाइएको फिल्म हलमा चलाउँदा घाटामा नगएको उनको दाबी छ । 'बुढासुब्बा त आफैंमा व्यापारिक संस्था हो । त्यो संस्थाको लगानी छ फिल्ममा । फिल्मका लागि विकास बोर्डबाट ७ लाख आयो । हलबाट आउने आम्दानी गरेर १२/१५ लाख भइहाल्छ । त्यो त निर्माताका लागि बोनस हो। फिल्मले ओटीटीबाट पनि कमाइहाल्छ । फिल्म घाटामा जाँदैन । त्यसैले त तिहारपछि अर्को काम गर्ने सम्झौता गरिसकेका छौँ ।'

बलिउड फिल्मको पर्खाइमा फिल्मकर्मी

महामारीबीच नै प्रदर्शनमा आएको 'डाँडाको वरपिपल'ले नेपाली निर्मातामा खासै उत्साह थपेन । फिल्मले दर्शक तान्न नसक्दा प्रदर्शनको पर्खाइमा रहेका फिल्म अझै ढुक्क हुन सकेका छैनन् । दसैंमै प्रदर्शनमा आएको जेम्स बोन्डको फिल्म 'नो टाइम टु डाई'ले भने केही उर्जा थपिदियो । तर अझै पनि नेपाली फिल्मका निर्माता फिल्म प्रदर्शन गर्न डराइरहेका छन् । उनीहरु हिन्दी फिल्मको प्रदर्शनलाई पर्खिरहेका छन् । तिहारमा अक्षय कुमारको 'सूर्यवंशी' प्रदर्शनमा आउने चर्चा छ । 'सूर्यवंशी'ले नै नेपाली फिल्मको आगामी प्रदर्शन निर्धारण गर्ने चलचित्र संघका महासचिव अशोक शर्मा बताउँछन् ।

'यो तिहारमा ठूलै हिन्दी फिल्म आयो भने त्यसमा आउने दर्शक संख्याले नै नेपाली फिल्मको प्रदर्शन निर्धारण गर्छ । 'नो टाइम टु डाई' मल्टिप्लेक्समा चलिरहेको छ । मोफसलमा अंग्रेजी फिल्म त्यति चल्दैन । दसैंबाट मल्टिप्लेक्स सबै हलहरू खुलेका छन् । फिल्म नभएकै कारण सिंगल स्क्रिनहरु खुल्ने, बन्द हुने भइरहेका छन्,' शर्माले भने, 'दुर्भाग्य नेपाली फिल्मले सूर्यवंशी कुरेर बसेको छ ।'

'सूर्यवंशी'लाई नेपाल ल्याउने तयारी गरिरहेका वितरक मनोज राठी अझै अक्षयको फिल्म आउने/नआउने तय नभइसकेको बताउँछन् । 'अब हिन्दी फिल्मवालाहरू पहिला लिने गरेको रकममै फिल्म दिन चाहन्छन् । अब हलमा दर्शक पहिलाकै अवस्थामा आउला भन्न सकिँदैन । हामी प्रायस गर्दैछौं फिल्मलाई नेपाल ल्याउने । तर आज/भोलिमै फिल्म आउँछ भन्ने अवस्थामा कुरा पुगिसकेको छैन,'वितरक राठीले सुनाए ।

तिहारको छेकोमा 'चोर पुलिस' र 'धुम ४' प्रदर्शनमा आउने तयारी छ । पुसमा 'चुरीफुरी' प्रदर्शनमा आउने तय भएको छ । दर्शक तान्ने आस बोकेको ठूला ब्यानरका फिल्मले भने फागुनपछिका मितिलाई प्रदर्शनका लागि रोजेका छन् । 'लप्पन छप्पन २'फागुन १३, 'ए मेरो हजुर ४' चैत २५ र 'चिसो मान्छे`'ले वैशाख २० लाई प्रदर्शन मिति तोकिसकेका छन् ।

हलमा अंग्रेजी फिल्मले दर्शक तान्न सफल भएको सुनाउँछन् क्यूएफएक्सका प्रमुख कार्यकारी अधिकृत रोशन अडिगा । जेम्स बोन्डको फिल्मले ओपनिङमा ६० प्रतिशत दर्शक पाएको पनि उनको भनाइ छ । 'जेम्स बन्डको फिल्म त राम्रै चलिरहेको छ । यो हप्ता कुनै नयाँ फिल्म छैन । त्यही जेम्स बन्डको फिल्म र 'फास्ट एण्ड फ्यूरियस ९' छ । अंग्रेजी फिल्महरु ३०/३५ दर्शक क्षमतामा चलिरहेको थियो,'उनले भने ।

घटस्थापनाको दिनदेखि क्यूएफएक्स चेनअन्तर्गत काठमाडौंको लबिम, सिभिल, छायाँ र भक्तपुरको हल संचालनमा आयो । अहिले पनि १५/२० जना दर्शकको उपस्थिति रहेको उनी सुनाउँछन् । 'नेपाली फिल्म चलेको छैन अहिले । सायद नेपाली फिल्मकर्मी, सूर्यवंशी कत्तिको चल्छ त्यो हेर्न खोज्नु भएको जस्तो लाग्छ । दर्शक त सोचे भन्दा बढी आइरहेका छन् । २ अंग्रेजी फिल्म त झन्डै- झन्डै हाउसफूल नै भयो,'उनले थपे ।

प्रचारप्रसार सकेर प्रदर्शन गर्न नपाएका फिल्महरुको प्रदर्शनमा बोर्डले विशेष महत्वका साथ सहयोग गर्ने बताएको छ । '२०७६ चैत्र ५ गतेसम्म प्रचारमा आइसकेका २०७७ असार मसान्तसम्मको प्रदर्शनको तयारीमा रहेका ५/७ वटा फिल्म प्रदर्शनमा आउन पाएन । प्रदर्शनको मुखैमा रहेका फिल्म बन्द भयो । त्यस्ता फिल्म प्रदर्शनमा आएमा विशेष महत्व दिने भन्ने छ,'बोर्डका अध्यक्ष दयाराम दाहालले बताए ।

प्रकाशित : कार्तिक ९, २०७८ १९:४७
प्रतिक्रिया
पठाउनुहोस्

यसरी तयार भयो 'कालो केशमा रेलिमई...'

गायक दिनेश ढकाल भन्छन्- पहिलो गीत नै भाइरल हुन्छ भन्ने लागेको थिएन
रीना मोक्तान

काठमाडौँ — गितार बजाउँदै गीत गाउनु दिनेश ढकालको रुची हो । आफू कुनै दिन गायककै रुपमा चिनिनसक्छु भन्ने उनलाई कहिल्यै लागेको थिएन । तर गायकको रुपमा चिनिने रहर नभएको भने चाहिँ होइन । लकडाउनमा समय कटाउने मेलोको रुपमा आफूले लेखेको गीत 'कालो केशमा रेलिमई, बाँधेको रिबन...' युट्युव र टिकटकमा भाइरल भएपछि भने उनी दंगदास छन् ।

साथीभाइ माझ गितारको धुनसँगै गीत गुन्गुनाउँदा उनलाई कताकता 'म नि गीत रेकर्ड गर्न सक्छु कि !' भन्ने लाग्थ्यो । समयसँगै गायक बन्ने सपना अन्तै मोडिएपनि कोरोना महामारीबीच भएको लकडाउनमा उनले केही गीतका शब्द कोरे । त्यो मध्ये लोक लयमा कोरिएको 'कालो केशमा रेलिमई' अहिले युवापुस्ताको जिब्रोमा झुण्डिएको छ ।

खासमा कोरिएका गीतहरु मध्ये रेकर्डिङका लागि अन्तिम प्राथमिकतामा थियो, 'कालो केशमा रेलिमई' । पपगीत गाउन रुचाउने उनले पहिला पप शैलीकै गीतको रेकर्डिङलाई प्राथमिकतामा राखेका थिए । उनी आफ्ना गीत 'आर्टमाण्डु'सँगको सहकार्यमा निकाल्न चाहन्थे । संगीतमा छुट्टै खालको प्रयोग गरिरहेको आर्टमाण्डुका कामहरुले उनलाई तानेको थियो ।

आर्टमाण्डुसँग जोडिने हुटहुटीबीच उनको भेट अंकितबाबु अधिकारीसँग भयो । मनमा उब्जिएका अनेकौं संशयलाई पन्छाउँदै उनले आत्मविश्वास बटुलेर अंकितलाई भेटे । आफ्नै कम्पोजिसनमा तयार पारेका सबै गीतहरु सुनाए । सबै पप ट्युनका गीत सुनाइसकेपछि अन्त्यमा सुनाए 'कालो केशमा रेलिमई' । सो ट्युन सुनेपछि अंकितले अरुलाई थाँति राखेर त्यही गीतमा काम गर्न सल्लाह दिए ।

'उहाँले भन्नु भएपछि अलिकति गीतप्रति आत्मविश्वास बढ्यो । उहाँले यो गीत राम्रो छ भन्नुभयो,' दिनेश सम्झिन्छन् ।

गुल्मीका दिनेश लोकगायक झलकमान गन्धर्वबाट प्रभावित छन् । त्यसैले उनको गीतमा गन्धर्वकै मेलोडी झल्किन्छ । सारंगीको धुनको मिठासपूर्ण प्रयोग गरिएको छ । उनले आफ्ना गीतमा नेपालीपन दिन खोजेका थिए । मौलिक स्वाद पस्कन चाहन्थे । त्यसैले लामो समय गन्धर्वका गीतहरुको स्वअध्ययन पनि गरे ।

'त्यसैको नतिजा हो, यो गीत,' मुसुक्क हाँस्दै उनले भने । लोक भाकामा कम्पोज गरिएको गीतमा शार्दुल श्रेष्ठले पश्चिमा संगीतले सास भरे । 'म गुल्मीको भएकाले लोकगीत राम्रै गाउन सक्छु भन्ने थियो । कालो केशमा रेलिमई भनेको त टिपिकल मेलोडी भएको गीत । दर्शकले बुझुन् भनेर मैले सरल शब्दको प्रयोग गरें । गाउँ-ठाउँको मौलिक शब्दहरु खोज्दै जाँदा यो गीत तयार भयो,' दिनेशले सुनाए ।

उनले रेकर्डिङका लागि तयारी सुरु गरे । गीतको पहिलो डमी तयार भयो । तर, भिडियोलगायतका अन्य काम गर्न भने फेरि भएको लकडाउन बाधक भइदियो ।

गीत रेकर्ड गरिसकेपछि उनले निर्देशक मानव सुवेदीसँग भेटे । सुवेदी आफैं मौलिक काम गर्न रुचाउने व्यक्ति । नविन र राम्रो काम गर्न चाहने दुईको सोच मिल्यो । गीत सुनिसकेपछि सुवेदीले भने, 'गन्धर्वको कोखबाट आएको गीतजस्तो छ । काम पनि त्यही अनुसारले गर्नुपर्छ ।' त्यसपछि बन्यो भिडियोको कन्सेप्ट ।

भिडियोका लागि उनले कलाकारमा अल्का सुवेदी, राजन न्यौपानेलाई पक्का गरे । गीत राम्रो बनेकाले चलेका कलाकार राख्न सल्लाह दिनेहरु धेरै थिए । तर, गीत बलियो भए भिडियो आफैं चल्छ भन्नेमा आशावादी थिए दिनेश ।

'पहिलो गीत निकाल्दैछु ठूला स्टार ल्याउन सकिएन । अल्कालाई मैले नै अनुरोध गरें । राजन न्यौपाने मेरै जिल्लाको । म नयाँ छु । यदि म यो गीतबाट उठ्छु भने अरु २/३ जना नयाँहरुलाई उठाउनुपर्छ भन्ने आत्मविश्वास कता-कता थियो,' उनले सुनाए ।

दिनेशले भने झैं 'कालो केशमा' बोलको गीत चर्चामा आएसँगै गीतमा अभिनय गरेका कलाकारको खोजी गर्ने बढेका छन् । दिनेश आफैं पनि भिडियोमा देखिएका छन् । कहिल्यै क्यामेराको सामना नगरेका उनलाई भिडियोमा देखिन गाह्रो भएको थियो । नयाँ कलाकारहरुको अनुभव लगभग उस्तै थियो । सिनेमेटिक फिल्म झैं लाग्ने भिडियोमा प्रयोग गरिएका थुप्रै जम्पकट र दृश्यहरुको बिम्बात्मक प्रयोगले गीतसँगै कथा सरल रुपले बगेको छ ।

गीतको भिडियो खिच्न १५ दिन लागेको दिनेश बताउँछन् । 'गीत रेकर्डदेखि भिडियो तयार पार्न लामो समय लाग्यो । आर्थिक अभावकै कारण काम भनेको समयमै गर्न सकिएन । गीतको तयारी थालेको लगभग ९ महिनापछि मात्रै गीत सार्वजनिक हुनसक्यो,' यसोभन्दा उनको अनुहारमा छुट्टै उत्साह छाएको थियो । 'सुस्त गतिमै गीत बन्यो । पहिलो डमी पुसमा रेकर्ड भएको थियो । लगभग ९ महिना लाग्यो । ९ महिना त बच्चा पनि जन्मिन्छ,' उनले भने ।

अन्तत: फूलपातीको दिन गीत रिलिज भयो ।

भिडियो रिलिज भएको दोस्रो-तेस्रो दिनसम्म भ्यूज सुस्त थियो । टिकटकमा भटाभट भिडियो बनाउन सुरु भएपछि भने गीत भाइरल हुने बाटो तर्फ अग्रसर हुनथाल्यो ।

२५ गते गीत सार्वजनिक गरेर २६ मा दिनेश आफ्नो थलो गुल्मी हिँडे । उत्साहित मन र आशावादी सोचसहित घर लागेका उनलाई बाटोमै दाइले टिकटकमा गीत भाइरल भइरहेको भनेर बधाई दिएका थिए । त्यसपछि उनले पनि टिकटक इन्स्टल गरेर आफ्नो गीतको लोकप्रियतालाई पछ्याउन थाले । चलेका कलाकारले समेत आफ्नो गीतमाथि टिकटक बनाएको देख्दा उनको मन गर्वले ढक्क फुल्यो । जीवनको पहिलो गीत नै यसरी चर्चामा आएपछि उनी चकित बने ।

टिकाको दिनदेखि गीत युट्युबको ट्रेन्डिङमा आयो । एक्कासी चर्चामा आएपछि उनी नर्भस नै भए । 'खुसी त भइन्छ नै । नर्भस पनि भएँ । म्यासेजहरु यति धेरै आउन थाल्यो कि के गर्ने भनेर अलमल्लमा परें । पहिलो गीत नै चर्चामा आउँदा म आफैं अचम्मित छु । तर, अहिले विस्तारै आत्मसात गर्दैछु,' २६ वर्षीय दिनेशले दंग हुँदै भने ।

'रेलिमई' गीतका लागि नौलो शब्द होइन । उनको गीतको भाका संकलित सुनिन्छ । पश्चिमतिर 'रेलिमई', 'बरी लै' जस्ता शब्दहरुको प्रयोग व्यापक हुन्छन् । आफ्नो गीतमा मिठास भर्न आफूले उक्त शब्दको प्रयोग गरेको उनी तर्क गर्छन् ।

'यस शब्दको बनावट नै यति सुन्दर हुन्छ कि त्यो सुन्दा छुट्टै मिठास अनुभव हुन्छ । त्यसैले कता-कता संकलित भाका पो हो कि भन्ने पनि हुनसक्छ । मेरो गीत सुन्दा गन्धर्वकै गीत हो कि भन्ने पनि लाग्छ,' उनले भने, 'लोकगीतमा अन्त्यानुप्रासका शब्दहरु राखिन्छ । अगाडि र पछाडिको अन्त्यानुप्रास मिलाउन राखिएको शब्दहरुको मिठास बेग्लै सुनिन्छ । जस्तै, 'असनैको रातो साडी, चार पाङ्ग्रे गाडी । किनिदिउँला सुनको चुरा बरु ऋणै काढी ।' अन्त्यानुप्रास मिल्दा छुट्टै आनन्द मिल्दो रहेछ । हो यो गीतमा मैले अन्त्यानुप्रासमा मिलाउन खोजेँ ।'

दिनेश हाल गुल्मीमै छन् । उनको गीतको चर्चा सुनेर गाउँले छक्क छन् । जीवनमा कहिल्यै सार्वजनिक कार्यक्रममा नदेखिएका उनले गीत गाउँछन् भन्ने कुरा धेरैका लागि आश्चर्य बनेको छ गाउँमा । भिडियोमा देखिएको लामो कपाल उनले काटेका छन् । केहीले उनीसँग तस्बिर पनि खिचाउन थालेका छन् । कसैले तस्बिर खिचाउन अनुरोध गर्दा उनलाई सेलिब्रेटी नै भएको भान हुन थालेको छ । यस्तै तस्बिर खिचाईको माग अनि गीतमा आइरहेको प्रतिक्रियाले दिनेश फुरुंग छन् ।

आफ्नो गीतलाई सबै उमेर समूहका स्रोता-दर्शकले रुचाइदिएकोमा उनी खुसी छन् । सरल शब्द र मेलोडीकै कारण दर्शकले गीतलाई रुचाइदिएको उनको ठम्याइ छ ।

'यो गीत सरल छ । मेलोडी छ । गीतमा प्रयोग गरिएका शब्दहरु मन छुने किसिमका छन् भन्दै प्रतिक्रिया आइरहेका छन् । मैले पनि गीतलाई राम्रैसँग गाए जस्तो लाग्दैछ,' उनले भने, 'नयाँ पुस्ताका दर्शकले मलाई म्यासेज गरिरहनुभएको छ । लोकगीतको शब्दहरुमा पश्चिमा शैलीमा दिन खोजेकाले गीत राम्रो लागेको भन्नुहुन्छ । हुन त लोकगीत नै हो । गीत चल्नुको अर्को महत्वपूर्ण कुरा त यसमा मनिष गन्धर्वजीले एकदमै राम्रो सारंगी बजाइदिनुभयो । कानलाई आनन्द होस् भनेर गीत तयार पारेको थिएँ । सायद सफल भएँ ।'

प्रकाशित : कार्तिक ४, २०७८ २१:४९
पूरा पढ्नुहोस्
प्रतिक्रिया
पठाउनुहोस्
×