असोज दोस्रो सातादेखि हल खोल्ने तयारी - मनोरञ्जन - कान्तिपुर समाचार

असोज दोस्रो सातादेखि हल खोल्ने तयारी 

कान्तिपुर संवाददाता

काठमाडौँ — असोज दोस्रो सातादेखि हल खुल्ने भएका छन् । नेपाली निर्माताहरुले दसैं लक्षित गरेर फिल्म प्रदर्शन गर्ने तयारी थालेसँगै हल खोल्ने तयारी भएको हो । 

यसअघि काठमाडौं, भक्तपुर र ललितपुरका प्रमुख जिल्ला अधिकारीले उपत्यकाभित्रका हल खोल्ने अनुमति दिएको थियो । तर हलहरुको छाता संगठन चलचित्र संघले नेपालभरको हल खोल्ने अनुमति दिनुपर्ने भन्दै हल नखोल्ने निर्णय गरेको थियो ।

अब भने आफूहरु असोज दोस्रो साताबाट नेपालभरका हल खोल्ने तयारीमा पुगेको चलचित्र संघका अध्यक्ष मदुसुधन प्रधान बताउँछन् ।

'हामीले हल खोल्ने तयारी गरिरहेका छौं नै । पहिला पनि हामीले कोभिडको समयमा हल खोलेका थियौं । तर हलले फिल्म नै पाएन । तर यसपालि ढिला भए पनि तयारीका साथ खोलौं भन्ने हिसाबले छलफलहरु गरिरहेका छौं, 'प्रधानले भने, '८/१० फिल्मको प्रदर्शन क्यालेन्डर बनाएरै फिल्म हल खोल्ने तयारी हो । अब फिल्म हलमा नभएर बन्द गर्नु नपरोस् भन्ने उद्देश्यले हामी अगाडि बढाइरहेका छौं । जिल्ला प्रशासन कार्यालयले उपत्यकाभित्रको हल खोल्ने अनुमति दियो । उपत्यकाभित्रका हल खोल्दा निर्माता फिल्म दिँदैन । त्यसैले अहिले सबै जिल्लाका सिडिओलाई पत्राचार गर्दैछौं । धेरै ठाउँबाट सकारात्मक प्रतिक्रिया आइरहेको छ । यो असोज दोस्रो हप्ताभित्रमा हलहरु खुल्छ । हामी स्वास्थ्य मापदण्ड अपनाएर नै हल खोल्छौं ।'

हालै निर्देशक सोभित बस्नेतले असोज २६ फूलपातीको दिनलाई लक्षित गरेर आफ्नो नयाँ फिल्म 'डाँडाको वर पिपल' प्रदर्शन गर्ने घोषणा गरिसकेका छन् । कोरोनाको त्रास घटेसँगै महामारीअघि नै प्रदर्शन रोकिएका फिल्महरुले प्रदर्शनको तयारी अगाडि बढाएका छन् ।

'चपली हाइट–३', 'हिजोआज भोलि', 'लक्का जवान', 'म यस्तो गीत गाउँछु', 'प्रेमगीत-३', 'चिसो मान्छे' लगायतका फिल्महरुको प्रदर्शन पक्का गरेर फिल्म खोल्ने तयारीमा छ चलचित्र संघ । 'अब फिल्म हल खुल्छ । खोल्नै पर्‍यो । यो निर्माण, वितरण र प्रदर्शनले चलचित्र क्षेत्र चलायमान बनाउन चालेको प्रयास हो । अब अहिले त धेरैले खोप लगाइसके, बजारहरु खुलिसक्यो । अब हामीले आँट गर्न बाँकी हो,'संघका अध्यक्ष प्रधानले भने ।

प्रकाशित : आश्विन ७, २०७८ १३:०८
प्रतिक्रिया
पठाउनुहोस्

तालिबानलाई पाकिस्तानी प्रधानमन्त्रीको चेतावनी : समावेशी सरकार नबनाए गृहयुद्ध हुन सक्छ

कान्तिपुर संवाददाता

काठमाडौँ — पाकिस्तानी प्रधानमन्त्री इमरान खानले अफगानिस्तानमा तालिबानले समावेशी सरकार गठन गर्न नसके त्यहाँ 'गृहयुद्ध' हुनसक्ने चेतावनी दिएका छन् । 'यदि उनीहरुले समावेशी सरकार बनाएनन् भने क्रमश: त्यो गृहयुद्धमा परिवर्तन हुनेछ । र, त्यसले पाकिस्तानमासमेत असर पार्नेछ,' प्रधानमन्त्री खानले बीबीसीसँग भनेका छन् ।

अफगानिस्तानमा गृह युद्ध भएमा उत्पन्न हुनसक्ने मानवीय र शरणार्थी संकटबारे पाकिस्तानले चासो देखाएको खानको भनाइ छ । साथै पाकिस्तानसँग लडिरहेका हतियारधारी समूहले अफगान भूमिलाई प्रोग गर्नसक्ने सम्भावनाबारे समेत उनले चिन्ता व्यक्त गरेका छन् ।

'यसको मतलब अफगानिस्तान अस्थिर र अराजक हुनेछ । नियन्त्रण भएन वा लडाइँ जारी रह्‍यो भने त्यो आतंकवादीका लागि आदर्श स्थान हुनेछ । त्यो हाम्रा लागि चिन्ताको विषय हो,' खानले भनेका छन् । अफगान भूमिमा आतंकवाद र मानवीय संकट वा गृहयुद्ध पाकिस्तानका लागि शरणार्थी मुद्दा उत्पन्न हुनसक्नेमा उनले चिन्ता व्यक्त गरे ।

यसअघि अफगानिस्तानमा अन्तरिम सरकार परिवर्तन गर्ने इमरान खानको प्रस्ताव तालिबान सरकारले अस्वीकार गरेको थियो । खानलाई लक्षित गर्दै तालिबान नेताहरुले सरकार परवर्तनको आह्वान गर्ने अधिकार कसैलाई नभएको भन्दै जवाफ दिएका थिए । साथै अफगानिस्तानमा हाल समावेशी सरकार नै रहेको र आफूहरु पनि पाकिस्तान जस्तै स्वतन्त्र रहेको प्रतिक्रिया तालिबान नेताहरुले दिएका थिए ।

अफगानिस्तानमा सन् १९९६ देखि २००१ को बीचमा पाकिस्तान तत्कालीन तालिबान सरकारको प्रमुख सहयोगी थियो । तर पछिल्लो पटक गत अगस्ट १५ पछि बलपूर्वक बनेको तालिबान सरकारसँग पाकिस्तानको सम्बन्ध चिसिँदो छ ।

कुनै निर्णयका लागि क्षेत्रीय सहमति आवश्यक पर्ने भन्दै पाकिस्तानी नेताहरुले तालिबान सरकारको आलोचना गर्दै आएका छन् । पछिल्लो समय सरकार गठनको क्रममा महिलाहरु समावेश नगरेका कारण विभिन्न देश र अधिकार समूहबाट तालिबान सरकार आलोचित बनेको छ ।

प्रकाशित : आश्विन ७, २०७८ १२:५७
पूरा पढ्नुहोस्
प्रतिक्रिया
पठाउनुहोस्
×