ब्रिटनी स्पियर्स र स्याम असगरीले गरे ‘इन्गेजमेन्ट’- मनोरञ्जन - कान्तिपुर समाचार
कान्तिपुर वेबसाईट
AdvertisementAdvertisement

ब्रिटनी स्पियर्स र स्याम असगरीले गरे ‘इन्गेजमेन्ट’

कान्तिपुर संवाददाता

काठमाडौँ — अमेरिकी गायिका ब्रिटनी स्पियर्सले स्याम असगरीसँग ‘इन्गेज्मेन्ट’ गरेकी छिन् । उनले ‘इन्गेजमेन्ट’ औंठी देखाउँदै इन्स्टाग्राममा एउटा भिडियो पनि सेयर गरेकी छिन् । असगरीले पनि इन्स्टाग्राममा छुट्टै फोटो सेयर गरेका छन् । 

३९ वर्षीय स्पियर्स १३ वर्षदेखि संरक्षणको मामिलामा कानुनी लडाइँ लडिरहेकी छिन् । केही दिनअघि मात्र स्पियर्सको जीवन र आर्थिक पक्षमा गर्दै आएका बुवा जेमी स्पियर्सले कन्जरभेटरसिप(कानुनी अभिभावकत्व) समाप्त गर्न अदालतमा निवदेन दिएका थिए ।

आफूलाई असगरीसँग विवाह गर्न नदिनका लागि हस्तक्षेप गरिँदै आएको स्पियर्सले आरोप लगाउँदै आएकी थिइन् । २७ वर्षीय असगरीसँग २०१६ सालदेखि प्रेम सम्बन्धमा रहेकी छिन् । असगर पर्सनल ट्रेनर तथा अभिनेता हुन् । इरानमा जन्मिएका असगरी १२ वर्षको उमेरमा लस एन्जलस गएका थिए । उनीहरूबीच सन् २००८ मा एउटा म्युजिक भिडियोको सेटमा भेट भएको थियो ।




स्पियर्सले यसअघि दुई पटक विवाह गरिसकेकी छिन् । सन् २००४ मा उनले बाल्यकालदेखिकै साथी जेसन अलेक्जेन्डरसँग विवाह गरेकी थिइन् । तर उनीहरूबीचको वैवाहिक सम्बन्ध ५५ घण्टामात्रै टिकेको थियो । उनीहरूबीच विवाह भएको केही घण्टामै उक्त विवाहलाई खारेज गर्न भन्दै अदालतमा मुद्दा परेको थियो ।

त्यसपछि ब्रिटनीले डान्सर केभिन फेडरलाइनसँग २००४ मै विवाह गरिन् । केभिन र ब्रिटनीका दुई जना छोरा छन् । ब्रिटनी र केभिनले सन् २००७ मै सम्बन्धविच्छेद गरे ।

प्रकाशित : भाद्र २८, २०७८ १०:३२
प्रतिक्रिया
पठाउनुहोस्

राप्ती लोकमार्गमा सधैं सास्ती

हरि गौतम

रुकुम पश्चिम — ढाँरेगैरा र पितिबाङ खोलाका कारण राप्ती लोकमार्गमा यात्रा गर्ने यात्रुले बर्सेनि ठूलो सास्ती भोग्दै आएका छन् । ढाँरेगैरामा त यात्रुले हिउँदमा पनि दुःख झेल्नुपर्ने बाध्यता छ । ढाँरेगैरामा वर्षामा हिलो र हिउँदमा धूलोका कारण यात्रुले सास्ती भोग्ने गरेका हुन् ।

पितिबाङ खोलामा पुल नबन्दा यात्रुको दुःख थपिएको हो । पहिरो झरिरहने र हिलाम्मे हुने ढाँरेगैरामा सधैं गाडी फस्ने गरेको स्थानीय कमल केसीले बताए । उनका अनुसार पितिबाङमा सानो पानी पर्दा पनि खोला बढेर यात्रा गर्न कठिन हुने गरेको छ । ‘सानो खोलो देखेर तर्न खोज्दा कतिपय गाडी नै खोलाले बगाएको छ,’ उनले भने, ‘सडक बनेको लामो समय भइसक्दा पनि पुल नबन्दा जोखिमपूर्ण यात्रा गर्नुपर्ने बाध्यतामा छौं ।’

ढाँरेगैरामा हरेक वर्ष बनाइएको सडक तल झर्छ । माटो मात्रै भएकाले हरेक वर्ष सडक पनि पहिलाको भन्दा माथि बनाइने स्थानीय प्रमिला ओलीले बताइन् । ‘भगवान् भरोसामा यात्रा गरिरहेका छौं,’ उनले भनिन्, ‘सडककै दुरवस्थाले घण्टौं अलपत्र पर्नुपर्ने बाध्यता छ ।’ ढाँरेगैराको सडकको विकल्प खोजिए पनि सम्भव नभएको त्रिवेणी गाउँपालिका–६ का वडाध्यक्ष राजेन्द्र पुनले बताए । ‘वातावरणीय अध्ययन तथा अरू प्राविधिक कारणले पनि अर्को सडक बनाउन सकिएको छैन,’ उनले भने, ‘अरू ठाउँमा पनि त्यस्तै समस्या हुने देखिएपछि सडक बनाउन समस्या भएको हो ।’ दुई वर्षअघि उक्त सडकको विकल्प खोज्न भन्दै जिल्लास्तरीय टोलीले अनुममन गरेको थियो । तर समितिको प्रतिवेदन कागजमै सीमित भएको छ ।

राजमार्ग खुलेको १७ वर्षपछि पितिबाङखोलामा पुल निर्माणको काम सुरु भए पनि निर्माणले गति लिन सकेको छैन । सडक डिभिजन कार्यालय चौरजहारीले पुल निर्माणका लागि ५ करोड २८ लाख रुपैयाँमा संरक्षण निर्माण सेवासँग सम्झौता गरेको छ । कम्पनीले २०७८ को वैशाख ८ गतेभित्र पुल निर्माण गर्ने गरी सम्झौता गरे पनि बेवास्ता गरेको हो । लकडाउन र कोरोना महामारीको निहुँमा निर्माण कम्पनी पन्छिएको मुसीकोट नगरप्रमुख देवीलाल गौतमले बताए । ‘अहिलेसम्म एकापट्टिको पिलर मात्र निर्माण गरिएको छ,’ उनले भने, ‘छिटो काम सक्न ठेकेदार कम्पनीलाई ताकेता गरिरहेका छौं ।’


प्रकाशित : भाद्र २८, २०७८ १०:३०
पूरा पढ्नुहोस्
प्रतिक्रिया
पठाउनुहोस्
×