अनुराग भन्छन्, 'अवस्था ठीक रहे अर्को वर्ष फिल्म सुटिङ गर्न नेपाल आउँछु'- मनोरञ्जन - कान्तिपुर समाचार
कान्तिपुर वेबसाईट
AdvertisementAdvertisement

अनुराग भन्छन्, 'अवस्था ठीक रहे अर्को वर्ष फिल्म सुटिङ गर्न नेपाल आउँछु'

कान्तिपुर संवाददाता

काठमाडौँ — बलिउड निर्देशक अनुराग कश्यपले फिल्म सुटिङका लागि नेपाल आउने चाह व्यक्त गरेका छन् । बिहीबारबाट सुरु भएको नेपाल अन्तराष्ट्रिय चलचित्र महोत्सव (नीफ)को पहिलो दिन 'च्याट विथ अनुराग'मा बोल्दै कश्यपले नेपाल आउने चाह व्यक्त गरेका हुन् । 

'म धेरै वर्षअघि नेपाल आएको थिएँ । अब मलाई नेपालमा फिल्म सुटिङ गर्ने मन छ । एभरेस्ट बेस क्याम्पमा जाने भित्री सपना छ । मसँग हिमालमा खिच्नुपर्ने एउटा फिल्मको स्क्रिप्ट छ । अवस्था सामान्य भयो भने अर्को वर्ष यो फिल्म सुटिङ गर्न म नेपाल आउँछु,' कश्यपले भने।

महोत्सवको भर्चुअल छलफलमा कश्यपले आफूले दुई नेपाली फिल्म हेरेको पनि जानकारी गराए । उनले दीपक रौनियारको 'सेतो सूर्य' र मीन भामको 'कालो पोथी' हेरेको बताए । छलफलको क्रममा उनलाई मनपर्ने स्वतन्त्र फिल्मकर्मी को-को हुन् भनि प्रश्न गर्दा उनले दीपक र मीनको नाम पनि लिए ।

उनले नेपालले नेपालकै कथामा फिल्म निर्माण गर्नुपर्ने पनि सल्लाह दिए । 'कलालाई विश्वले हेर्न सक्छ । स्थानीय कथामा फिल्म बनायो भने त्यो विश्वको लागि नयाँ हुन जान्छ । जब तपाईंले आफ्नो कथामाथि फिल्म बनाउन सुरु गर्नुहुन्छ, त्यसपछि आम्दानीको ढोका खुल्दै जानेछ,' उनले भने, 'यहाँ फिल्म उद्योग नभएको देशहरु खासै छैनन् । तपाईंले बनाउने नेपाली फिल्मले विश्वमा अर्थ राख्छ। त्यस किसिमको फिल्म बनाउने हुटहुटी हुनुपर्‍यो ।'

प्रकाशित : वैशाख २३, २०७८ १९:४०
प्रतिक्रिया
पठाउनुहोस्

रुपन्देहीमा खाद्यान्‍न र अत्यावश्यकबाहेकका सबै उद्योग बन्द

अमृता अनमोल

बुटवल — रुपन्देही जिल्लामा खाद्यान्न र अत्यावश्यकबाहेकका सबै उद्योग बन्द गर्न जिल्ला प्रशासन कार्यालयले निर्देशन जारी गरेको छ ।बिहीबार जिल्ला कोभिड प्रकोप व्यवस्थापन समिति र जिल्ला सुरक्षा समितिको बैठकको निर्णयअनुसार अर्को निर्णय नभएसम्मका लागि उद्योग बन्द गर्न निर्देशन गरेको प्रमुख जिल्ला अधिकारी अस्मान तामाङले बताए  । 

खाद्यान्न तथा अत्यावश्यक वस्तु उत्पादन गर्ने उद्योगबाहेक सबै प्रकृतिका उद्योग अर्को निर्णय नभएसम्मका लागि बन्द गर्ने र त्यस्तामा उद्योगबाट उत्पादित वस्तुहरु ढुवानीमा समेत रोक लगाउने निर्णय भएको उनले बताए ।

यस्तै बैंक तथा वित्तीय संस्थाहरुमा अत्यावश्यक तथा मानवीय सेवाका लागि १/१ जनाले सेवा प्रवाह गर्न मिल्ने प्राविधिक जनशक्तिबाट व्यवस्था गर्ने गरी वैशाख ३० गतेसम्म सबै सेवाहरु बन्द गर्ने निर्देशन भएको छ ।

पूर्वाधार एवम् निर्माण सम्बन्धमा निर्माणस्थलमै क्वारेन्टाईन बनाएको बाहेक विकास निर्माण कार्य बन्द गर्न प्रशासनले निर्देशन दिएको छ । हरियो तरकारी एवम् कृषि उपजहरु उत्पादक र उपभोक्ताबीच कृषि एम्बुलेन्समार्फत उपलब्ध गराउन सम्बन्धित स्थानीय तहले व्यवस्था मिलाउनु पर्ने बताइएको छ । अत्यावश्यक उपभोग्य वस्तु वा सेवाको आपूर्तिमा कृत्रिम अभाव सिर्जना गरेमा, मूल्यवृद्धि गरेमा, जम्माखोरी गरेमा, लुकाउने वा सहज आपूर्तिमा अवरोध गरेमा सो कार्य गर्ने उपर कानुनबमोनिम कारबाही हुने जिल्ला प्रशासन कार्यालयले जनाएको छ ।

कोरोना भाइरसको संक्रमण रोकथाम एवम् नियन्त्रणका लागि रुपन्देहीमा वैशाख १६ देखि ३० गते बिहान ६ बजेसम्मका लागि निषेधाज्ञा जारी गरेको छ ।

प्रकाशित : वैशाख २३, २०७८ १९:२०
पूरा पढ्नुहोस्
प्रतिक्रिया
पठाउनुहोस्
×