रजनीकान्तलाई 'दादासाहेब फाल्के अवार्ड'

सूचना तथा प्रसारणमन्त्री प्रकाश जावेडकरले बिहीबार रजनीकान्तलाई यो अवार्ड दिने घोषणा गरेका हुन् । 'यो घोषणा गर्न पाउँदा निकै खुसी लागिरहेको छ । सन् २०१९ को दादासाहेब फाल्के अवार्डबाट भारतीय फिल्म क्षेत्रको महान् कलाकार रजनीकान्तलाई सम्मान गरिने भएको छ । अभिनेतासँगै उनले निर्माता र पटकथाकार भएर फिल्म क्षेत्रलाई पुर्‍याएको योगदान ठूलो छ,' जवाडेकरले ट्विटरमा लेखेका थिए ।

सन् १९६९ मा स्थापना भएको यो अवार्ड भारतको सबैभन्दा प्रतिष्ठित सम्मान हो । हरेक वर्ष प्रदान गरिने यो अवार्ड भारतको नेसनल फिल्म अवार्डसँगै सरकार र अवार्डका आयोजकबाट संयुक्त रुपमा प्रदान गरिन्छ ।

यो पटक आशा भोस्ले, निर्देशक सुवास घई, अभिनेता मोहनलाल, गायक शंकर महादेवन र विश्वजीत च्यटर्जीको जुरीले रजनीकान्तलाई अवार्ड दिने निर्णय गरेको हो । सन् २०१८ को यो अवार्ड अभिनेता अमिताभ बच्चनले पाएका थिए ।

राजनीतिमा प्रवेश गरेको तीन वर्षपछि हालै रजनीकान्तले आफ्नो स्वास्थ्यको कारण देखाउँदै नयाँ पार्टी नखोल्ने घोषणा गरेका थिए । सन् १९७५ मा तामिल फिल्म 'अपूर्व रागङ्गल'बाट अभिनयमा डेब्यु गरेका उनले त्यसपछि 'बाशा', 'पडयप्पा' र 'एन्धीरन'लगायतका ब्लकबस्टर फिल्म खेलेका थिए ।