सरोज खनाल र दीपाश्री निरौलाको फेसबुक ह्याक- मनोरञ्जन - कान्तिपुर समाचार

सरोज खनाल र दीपाश्री निरौलाको फेसबुक ह्याक

ह्याकर्सले अकाउन्टबाट पैसा असुल्दै
रीना मोक्तान

काठमाडौँ — अभिनेता सरोज खनाल र अभिनेत्री दीपाश्री निरौलाको फेसबुक ह्याक भएको छ । ठगी गर्ने उद्देश्यले फेसबुक ह्याक गरेको पत्ता लागेपछि दुवै जनाले बिहीबार साइबर ब्यूरोमा उजुरी दिएका छन् ।

तस्बिर : खनाल र निरौलाको फेसबुकबाट

आफ्नो अकाउन्टबाट ह्याकर्सले २५ हजार ठगीसकेको बताउँछन् सरोज खनाल । 'मेरो फेसबुक ह्याक भएको २४ घण्टा भयो । हुन त अहिले साइबर ब्यूरोले यसमाथि अनुसन्धान गरिरहेको छ,' उनले भने, 'हाम्रो अकाउन्टबाट ती ह्याकर्सले पैसा माग्ने काम गरेका छन् । मेरो दुईजना साथीले १० र १५ हजार रूपैयाँ पठाइसकेका रहेछन् । उनीहरुले मलाई अप्ठ्यारो परेको रहेछ भनेर पैसा हालिदिएछन् । मलाई ६० जना जतिले फोन गरेर पैसा चाहिएको भन्दै फोन गरिसक्नु भएको छ ।'

ह्याकर्सले आफ्नो फेसबुकको दुरूपयोग गरेर म्युचल फ्रेन्डलाई न्यूनतम ८० हजारदेखि एक लाख रूपैयाँसम्म मागेको सरोज सुनाउँछन् । '२५ हजार फसिसकेको थाहा पाएपछि साथीहरुलाई फेसबुक ह्याक भएको जानकारी त दिएको छु,' सरोज भन्छन्, 'उनीहरुले कसैलाई के फन्ड खोल्ने भनेर पैसा मागेका छन् । कतिलाई मलाई अप्ठ्यारो पर्‍या छ भनेर पैसा मागेको छन् । बैंकको कार्ड पनि फरक-फरक बैंकको छ ।'

साइबर ब्यूरोले फलोअर्स धेरै भएकाले अकाउन्ट रिकभर गर्न सकिन्छ कि सकिँदैन भन्ने दोधार भएको सुनाएपछि सरोज तनावमा छन् । 'त्यो फटाहाको हातमा पैसा नजाओस् भनेर मेरो कोसिस भइरहेको छ, 'उनले भने ।

सरोजका अनुसार पत्रकार दयाराम पाण्डेको अकाउन्टबाट उनलाई एउटा टेलिभिजन कार्यक्रमको विषयबारे छलफल गर्न भन्दै जुम मिटिङमा निम्तो दिए । जुम मिटिङमा आइडी राख्ने बित्तिकै आफ्नो अकाउन्ट ह्याक भएको सरोज बताउँछन् । 'मेरो अकाउन्टबाट दीपालाई पनि मेसेज गएको रहेछ । ह्याकर्सले फेसबुकको दुरूपयोग गरेर ठगी गरिरहेको छ,' सरोजले भने ।

सरोजको अकाउन्टबाट मेसेन्जरमा आएको कोड नम्बर डायल गर्ने बित्तिकै आफ्नो अकाउन्ट ह्याक भएको बताउँछिन् दीपाश्री निरौला । 'सरोज दाइको फेसबुक ह्याक भइसकेको रहेछ । सरोज दाइले एउटा कोड पठाएको छु गफ गरौं न भनेर मेसेज गर्नु भयो । मैले गफ गर्न नम्बर डायल गर्ने बित्तिकै ह्याक भयो,' दीपा भन्छिन्,'त्यसपछि शंका लाग्यो मलाई । अनि मैले सुमन भान्जालाई भने । उसले मेरो अकाउन्टमा मेसेज गरेपछि ह्याकर्सले आपत परेको भन्दै एक लाख रूपैयाँ माग्यो । अनि हामी पक्का भयौं ।'

दीपा थप्छिन्,'मेरो अकाउन्टबाट को-कसको ह्याक हुने हो भनेर थाहा छैन ।' उनलाई पनि फेसबुकमा रहेको २ लाख बढी फलोअर्सकै चिन्ता छ । 'हामी डिजिटल प्लेटफर्ममा मख्ख हुन्छौं तर यो त्यति सुरक्षित हुँदो रहेनछ, 'उनले भनिन् ।

एक महिनायता अकाउन्ट ह्याक गर्ने ट्रेन्ड बढेको बताउँछन् साइबर ब्यूरोका प्रवक्ता नविन्द अर्याल । 'सरोज र दीपाको मुद्दामा हामी सामाजिक सञ्जालको सम्बन्धित कार्यालयसँग समन्वय गर्दैछौं । पछिल्लो समयमा ह्याक गर्ने ट्रेन्ड एकदमै बढेको छ । विगत एक महिनादेखि ह्याक गर्ने र म्युचल फ्रेन्डलाई पैसा डिपोजिट गरिदिन भन्ने ट्रेन्ड एकदमै बढेको छ, 'उनी भन्छन्, 'हामी आफ्नो पक्षबाट सबैलाई सजकता अपनाउन सल्लाह पनि दिन चाहन्छौं । हामीले चलाउने सामाजिक सञ्जाल नेपाल बाहिरबाट सञ्चालित छन् । यसको विश्लेषण र अनुसन्धानको विषयहरु सम्बन्धित कार्यालयसँग हुन्छ ।' उनका अनुसार सम्बन्धित कार्यालयको प्रतिक्रियासँगै कार्यान्वयनको काम अगाडि बढ्नेछ । त्यसैले अनुसन्धान कहिले सकिन्छ भन्ने एकिन नभएको उनको भनाइ छ । 'कुनै मुद्दामा अपराधी ७ घण्टामै पत्ता लागेको छ । कुनैलाई १५ दिन पनि लागेको छ,'उनले भने ।

कानुनमा के छ ?

यो मुद्दामा वित्तिय कारोबार ऐन २०६३ को परिच्छेद ९ का दफाहरु आकर्षित हुने अर्याल बताउँछन् । परिच्छेद ९ मा कुनै व्यक्तिले कुनै कम्प्युटरमा रहेको कुनै कार्यक्रम, सूचना वा तथ्यांकमा पहुँच प्राप्त गर्ने मनसायबाट सो कम्प्युटरको धनी वा जिम्मेवार व्यक्तिबाट कुनै अख्तियारी नलिइ सो कम्प्युटरको प्रयोग गरेमा वा अख्तियारी लिएको अवस्थामा पनि अख्तियारी दिइएको भन्दा भिन्न कुनै कार्यक्रम, सूचना वा तथ्यांकमा पहुँच प्राप्त गर्ने उद्देश्यले कुनै कार्य गरेमा निजलाई कसूर ठहरिने उल्लेख गरिएको छ । यो दफाविपरित जानेलाई दुई लाख रुपैयाँसम्म जरिवाना वा तीन वर्षसम्म कैद वा दुवै सजाय हुनेछ ।

अभिनेत्री दीपाश्री यस किसिमको अपराधीलाई सजाय कम भएको बताउँछिन् । ' ह्याकर्सहरु धेरै नै अराजक भए । यो एकदमै नै ठूलो समस्या हो । ह्याकर्सले एकजनाबाट एक लाख उठाइरहेको हुन्छ । उनीहरुलाई सजाय २ लाख जरिवाना त न्यायोचित भएन नि, 'उनले भनिन्, 'हाम्रो कानुन कडा हुनुपर्‍यो । यस्तो सजाय होस् कि दोस्रोपटक अपराधीले अपराध गर्ने नसोचोस् ।'

प्रकाशित : चैत्र १३, २०७७ १४:४६
प्रतिक्रिया
पठाउनुहोस्

हलमा अझै ५० प्रतिशतमात्र अकुपेन्सी नियम, फिल्म रिलिज गर्न हच्किए निर्माता 

रीना मोक्तान

काठमाडौँ — ठूला ब्यानरका हिन्दी फिल्मको प्रदर्शनसँगै नेपाली फिल्म हलमा दर्शकको चहलपहल बढेको छ । कोरोना महामारीले बन्द हल गत पुस १० देखि खुले पनि दर्शकको उपस्थिति खासै थिएन । सरकारको निर्देशनबिना नेपाल चलचित्र संघले हल खोल्ने स्वघोषणा गरेसँगै हलमा पूरानो नेपाली फिल्म प्रदर्शन गरिएका थिए । तर, यी फिल्मले दर्शकलाई हलसम्म तान्न सकेका थिएनन् । 

यसबीच नयाँ नेपाली फिल्म 'एउटा यस्तो प्रेम कहानी' र 'गोर्खे' प्रदर्शनमा आए । यी दुवै फिल्मले उत्साहजनक व्यापार गर्न नसकेको हलवाला बताउँछन् । अहिले बलिउड फिल्महरुले हल लक्षित गरेर धमाधम प्रदर्शन मिति तोक्न थालेसँगै हल सञ्चालक उत्साहित बनेका छन् । यसअघि अधिकांश फिल्म कोभिडका कारण पछाडि धकेलिए थिए भने कतिले डिजिटल प्लेटफर्म रोजे ।

पछिल्लो समय हलमा प्रदर्शनमा आएको 'रुही'ले दर्शकको उपस्थिति बढाएको बताउँछन् क्युएफएक्सका कार्यकारी निर्देशक रोशन अडिगा । 'गएको शिवरात्रीदेखि दर्शकको उपस्थिति बढेको छ । रुहीले राम्रो गरिरहेको छ अहिले । अरु फिल्मको औसत नै छ,'अडिगाले भने ।

वान सिनेमाजका म्यानेजर उमेशराज गिरी भन्छन्, 'रुहीले दर्शक तानेको छ । त्योभन्दा अगाडि त ठप्प नै थियो । त्यसअघि त दिनमै १०/१२ जना हुन्थे । अहिले एउटा सोमा ३०/४० जना हुन थालेको छ ।'

राजकुमार राव र जाहन्वी कपुरले अभिनय गरेको 'रुही'को ओपनिङ व्यापारले बलिउडलाई सामान्य अवस्थामा डोर्याेएको भन्दै विश्लेषण पनि भएको थियो ।'रुही' पछि जोन अब्राहमको 'मुम्बई सागा' हलमा प्रदर्शनमा आयो । बलिउडले हल लक्षित गरेर लगातार फिल्महरुको प्रदर्शन मिति सार्वजनिक गरे पनि नेपालमा अझै त्यस्तो अवस्था सिर्जना हुन सकेको देखिँदैन।

हलमा अझै ५० प्रतिशत दर्शक अकुपेन्सी राख्ने मापदण्ड कायम रहेका कारण निर्माताहरुले फिल्म प्रदर्शन गर्न नचाहकेको हल संचालक बताउँछन् । 'सरकारले हलको ५० प्रतिशत अकुपेन्सीलाई लिएर केही गरेकै छैन । भारतमा त सय प्रतिशत नै बनाइसकेको छ । नेपालमा त्यो कायम भएकाले पनि वितरकले फिल्म दिइरहनु भएको छैन,' क्यूएफएक्सका अडिगा भन्छन्, 'सय प्रतिशत बनाइसकेपछि त फिल्म आइहाल्छन् नि ।'

उनी सरकारले हलमा तोकेको यो मापदण्ड हटाउनु पर्ने बताउँछन् । वान सिनेमाजका उमेशको माग पनि उस्तै छ । 'नेपाली फिल्मका निर्मातामा हलमा अझै दर्शक आउनुहुन्न भन्ने विश्वास छ । त्यसैले पनि फिल्म हलमा लगाइरहनु भएको छैन। त्यहीमाथि ५० प्रतिशत अकुपेन्सी छ । सायद नेपाली फिल्महरु ठूलो फिल्मको व्यापार हेरेरै मात्र आफ्नो फिल्म लगाउनु हुन्छ होला,'उमेशले भने, 'अब हाम्रो हलमा पनि सय प्रतिशत दर्शक अकुपेन्सी बनाउन दिनु पर्यो ।'

नेपाल चलचित्र संघका अध्यक्ष मदुसुधन प्रधान यातायात, रेष्टूरेन्टमा यस किसिमको अकुपेन्सी नतोकिए पनि हलमा अझै ५० कायमै रहेको गुनासो सुनाउँछन् । 'खासमा अहिले नयाँ नेपाली फिल्म हलमा नचलाउनुको खास कारण ५० प्रतिशत अकुपेन्सी नै हो । हुन पनि लगानीको सुरक्षाको हिसाबले त निर्माता जोखिम मोल्न कसरी तयार हुनु, 'उनले भने, 'यस्तो अकुपेन्सीको कुरा कुनै पनि होटल रेष्टुरेन्ट, पर्यटन र विद्यालयमा छैन । गाडी खचाखच छ । हामीकहाँ मात्र ५० प्रतिशतको कुरा छ । यो ५० प्रतिशत अकुपेन्सीको कुरा हट्नैपर्छ ।'

हालै आफूले विकास बोर्डमार्फत् हलको सय प्रतिशत अकुपेन्सी बनाउन पहल गरिसकेको बताउँछन् प्रधान । 'संघले मन्त्रालयमा पत्राचार पठाइसकेका छौं । आश्वासन पनि पाएका छौं । अब नतिजा चाँडै आउँछ,' उनले भने ।

५० प्रतिशत अकुपेन्सीबीच पनि केही नेपाली फिल्म हलमा प्रदर्शनमा आउने तयारीमा छन् । सौगात मल्ल अभिनित 'लप्पन छप्पन २' र पुष्प खड्काको 'कृष्ण लीला' आगामी चैत्र २७ मा प्रदर्शनमा आउने घोषणा भइसकेका छन् ।

'हुन त फेरि लकडाउन हुने हल्ला छ । तैपनि हामी ५० प्रतिशतमै फिल्म देखाउन तयार छौं । तर खोइ अब यस्तै हल्लाले अलमलमा पारेको छ । अहिलेसम्म त फिल्म प्रदर्शन गर्ने नै हाम्रो जमर्को हो,' कृष्णलीलाका निर्देशक दीपक ओलीले बताए ।

कोभिडअघि नै प्रदर्शनमा आउनुपर्ने फिल्मका निर्माताहरु अझै फिल्म रिलिज गर्न तयार छैनन् । हलमा दर्शक नभएकै कारण 'चपली हाइट ३'को प्रदर्शन तोक्न सकिरहेका छैनन् निर्माता अर्जुन कुमार । 'खोइ त दर्शक । हलमा दर्शक नै छैनन् । हलमा दर्शक आउन थालेपछि मात्र फिल्म प्रदर्शन गर्नेबारे सोचौंला,' उनले भने ।

निर्माता सन्तोष सेनको ध्यान भने प्रदर्शनतिर गइसकेको छैन । स्वर्गीय निर्देशक छेतेन गुरुङसँग मिलेर सेनले निर्देशन गरेको फिल्म 'प्रेमगीत ३'को प्रदर्शन कोभिडकै कारण पछाडि धकेलिएको थियो । 'अहिले म फिल्मको पोस्ट प्रोडक्सनको काम सक्न मुम्बई आएको छु । फिल्मको काम लगभग दुई हप्तामा सकिन्छ । सायद दसैं नजिकतिर फिल्म प्रदर्शन गर्छु होला,' सेनले भने ।

प्रकाशित : चैत्र ११, २०७७ १४:१२
पूरा पढ्नुहोस्
प्रतिक्रिया
पठाउनुहोस्
×