गोल्डेन ग्लोब अवार्ड : चाड्विक बोसम्यान मरणोपरान्त उत्कृष्ट अभिनेता - मनोरञ्जन - कान्तिपुर समाचार

गोल्डेन ग्लोब अवार्ड : चाड्विक बोसम्यान मरणोपरान्त उत्कृष्ट अभिनेता 

क्लोए चाओ सन् १९८४ यता उत्कृष्ट निर्देशकको अवार्ड पाउने पहिलो महिला
इकान्तिपुर डेस्क

काठमाडौँ — अभिनेता चाड्विक बोसम्यान मरणोपरान्त गोल्डेन ग्लोबमा उत्कृष्ट अभिनेता ठहरिएका छन्  । उनलाई ‘मा रेनीज ब्ल्याक बटम’ चलचित्रबाट उत्कृष्ट अभिनेताको अवार्ड दिइएको हो ।

चाड्विक बोसम्यान फाइल तस्बिर : रोयटर्स

‘ब्ल्याक प्यान्थर’ अभिनेता बोसम्यानको गत अगस्ट २८ मा ४३ वर्षको उमेरमा कोलोना क्यान्सरका कारण निधन भएको थियो । आइतबार राति न्युयोर्कमा सेमिभर्चुअल रुपमा अवार्ड समारोह आयोजना भएको थियो । प्रस्तोताहरू कार्यक्रमस्थलमै थिए भने मनोनयनमा परेकाहरू भने घरबाट भर्चुअल रुपमा जोडिएका थिए ।

त्यस्तै क्लोए चाओले ‘नोम्याडल्यान्ड’ का लागि उत्कृष्ट निर्देशकको अवार्ड जितेकी छिन् । चाओ सन् १९८४ पछि गोल्डेन ग्लोबमा उत्कृष्ट निर्देशकको अवार्ड जित्ने पहिलो महिला निर्देशक हुन् ।

सन् १९८४ मा बारबारा स्ट्राइस्यान्डले ‘येन्टल’ का लागि उत्कृष्ट निर्देशकको अवार्ड जितेकी थिइन् । यस पटक उत्कृष्ट निर्देशकको मनोनयनमा चाओसँगै ‘प्रमिसिङ योङ वुमेन’ बाट इमराल्ड फेनेल, ‘म्यांक’ बाट डेभिड फिन्चर, ‘वान नाइट इन मायामी’ बाट रेजिना किङ र ‘द ट्रायल अफ द सिकागो ७’ बाट आरोन सोर्किन थिए ।

गोल्डेन ग्लोब २०२१ मा कसलाई कुन अवार्ड ?

बेस्ट एक्टर – चाड्विक बोसम्यान(मा रेनीज ब्ल्याक बटम)

बेस्ट डिरेक्टर – क्लोए चाओ(नोम्याडल्यान्ड)

बेस्ट मोसन पिक्चर(ड्रामा) – नोम्याडल्यान्ड

बेस्ट एक्ट्रेस मोसन पिक्चर(ड्रामा) – आन्ड्रा डे(द युनाइटेड स्टेट्स भर्सेस बिल्ली होलिडे)

बेस्ट मोसन पिक्चर(म्युजिकल/कमेडी) – बोराट सब्सिक्वेन्ट मुभीफिल्म

बेस्ट एक्टर मोसन पिक्चर (म्युजिकल/कमेडी) – सासा बरोन कोहेन, बोराट सब्सिक्वेन्ट मुभीफिल्म

बेस्ट टिभी मुभी/लिमिटेड सिरिज – द क्विन्स ग्याम्बिट

बेस्ट एक्ट्रेस (टिभी मुभी/लिमिटेड सिरिज) – आन्या टेलर जोय(द क्विन्स ग्याम्बिट

बेस्ट टिभी सिरिज(ड्रामा) – द क्राउन

बेस्ट फरेन फिल्म – मिनारी, अमेरिका

बेस्ट एक्टर(टिभी सिरिज–ड्रामा) – जोस ओ’कोनर(द क्राउन)

बेस्ट एक्ट्रेस मोसन पिक्चर(म्युजिक/कमेडी – रोजामन्ड पाइक(आई केयर अ लट)

बेस्ट टिभी सिरिज(कमेडी) – सिट्स क्रिक

बेस्ट एक्टर टिभी सिरिज(कमेडी) – जेसन सुडिकस(टेड लासो)

बेस्ट ओरिजिनल स्कोर – जोन ब्याटिस्टे, एटिकस रोस र ट्रेन्ट रेजनौर(सोल)

बेस्ट ओरिजिनल सङ – आई ओ सी(सीन) द लाइफ अहेड

बेस्ट एक्ट्रेस (टीभी सिरिज, ड्रामा) – एम्मा कोरिन, द क्राउन

बेस्ट स्क्रिनप्ले – आरोन सोर्किन, द ट्रायल अफ द सिकागो सेभेन

बेस्ट एक्टर(टीभी मुभी, लिमिटेड सिरिज) – मार्क रफालो, आई नो दिस मच इज ट्रु

बेस्ट एनिमेटेड फिचर फिल्म – सोल

प्रकाशित : फाल्गुन १७, २०७७ १०:२०
प्रतिक्रिया
पठाउनुहोस्

स्वयंसेवाका पर्याय थिए शंकर डाक्टर

पर्वत पोर्तेल

काँकडभिट्टा — करिब पाँच दशक जति गाउँमै बिरामीको सेवामा बिताउनु चानचुने थिएन । डा. शंकर उप्रेतीले भने आफ्नो आधाभन्दा बढी जीवन गाउँलेको उपचारमा खर्चिए । उनले प्रण गरेका थिए, ‘५० वर्ष उपचार सेवा गर्छु र रिटायर्ड हुन्छु ।’

गाउँमा बसेर ५० वर्ष लामो सेवा गरेपछि उप्रेतीले २०७६ मा स्वैच्छिक अवकाश लिए । सेवाबाट रिटायर्ड हुने समयमा उनी काठमाडौं जाने कि गाउँमै सेवामा लाग्ने भनेर अक्मकिए । ‘कतै गाउँलेले सरल र सुलभ उपचार नपाउने पो हुन् कि !’ भन्ने चिन्ताले उनलाई सतायो । ‘तर, विशाल शिवाकोटीलगायत स्थानीय व्यवसायीले जनतालाई सुलभ स्वास्थ्य सेवा उपलब्ध गराउने प्र्रतिबद्धता गरेपछि उहाँ काठमाडौं जान मन्जुर हुनुभएको थियो,’ स्थानीय बासिन्दासमेत रहेका आख्यानकार कुमार भट्टराईले भने, ‘जनताको स्वास्थ्यप्रति उहाँ सदैव चिन्तित हुनुहुन्थ्यो ।’

देहाती जनताको उपचारमा जीवनभर निःस्वार्थ सेवा गर्ने गुनिला ‘शंकर डाक्टर’ ले शनिबार मध्यराति काठमाडौंमा अन्तिम सास फेरे । मधुमेहका बिरामी उनको बोली मस्तिष्कघातका कारण डेढ वर्षयता प्रस्ट थिएन । उनी ८७ वर्षका थिए । डा. उप्रेती छोरा सञ्जीवसँग काठमाडौंमा थिए ।

भारतबाट एमबीबीएस गरेपछि करिब एक दशक सरकारी सेवामा बिताएका उप्रेतीले बाँकी ४० वर्ष झापाको शनिश्चरेस्थित गाउँ फर्किएर जनताको सेवामा बिताएका थिए ।

कोलम्बो प्लानअन्तर्गत पढ्ने अवसर पाएका बेला उनले प्रतिज्ञा गरेका थिए, ‘एमबीबीएससम्म मात्रै पढ्छु र पढाइ सकेर गाउँ फर्किन्छु अनि गाउँलेको सेवामा जीवन बिताउँछु ।’ १९९१ मा आठराई चुहानडाँडामा जन्मिएका उनले २०१७ सालमा एमबीबीएसको पढाइ पूरा गरेका थिए । त्यसपछि भोजपुर र धनगढीमा सरकारी सेवा गरेका उनी २०२६ सालपछि शनिश्चरे फर्किएका थिए । सुरुमा सानो क्लिनिक सञ्चालन गरेर निःशुल्क स्वास्थ्य सेवा गरे । त्यो सानो क्लिनिक अहिले ‘शंकर अस्पताल’ ले चिनिन्छ ।

आइतबार शनिश्चरेस्थित अस्पतालमा श्रद्धाञ्जली सभा आयोजना भयो । अर्जुनधारा नगरप्रमुख हरि राना र पूर्वगाविस अध्यक्ष कृष्ण मिश्रलगायतले उप्रेतीको योगदानको प्रशंसा गरे । रानाले भने, ‘जुन बेला यो भेगमा अस्पताल थिएन, त्यो बेला शंकर डाक्टर जनताका भगवान् बनेर आइपुग्नुभयो ।’ उप्रेतीले झापाका मात्रै हैन, सिंगो मेची अञ्चलकै बिरामीको उपचार गरेका थिए । उप्रेती बचेको समय राजनीतिमा पनि खर्चिन्थे ।

साहित्यकार कृष्ण बरालका अनुसार उनले २०३७ सालको जनमतसंग्रहमा झापामा बहुदलीय व्यवस्थाका पक्षमा भएको आन्दोलनको नेतृत्व सम्हालेका थिए । ०४६ पछि कांग्रेसले उनलाई राष्ट्रिय सभा सदस्यमा मनोनीत गरेको थियो ।

प्रकाशित : फाल्गुन १७, २०७७ १०:०५
पूरा पढ्नुहोस्
प्रतिक्रिया
पठाउनुहोस्
×