बिहीबारदेखि हलमा नेपाली फिल्म, छैन उत्साहजनक बुकिङ- मनोरञ्जन - कान्तिपुर समाचार
कान्तिपुर वेबसाईट
AdvertisementAdvertisement

बिहीबारदेखि हलमा नेपाली फिल्म, छैन उत्साहजनक बुकिङ

कान्तिपुर संवाददाता

काठमाडौँ — लकडाउनपछि खुलेको हलमा पहिलो पटक नयाँ नेपाली फिल्म प्रदर्शनमा आएको छ । बिहीबारदेखि दिपेश सापकोटा निर्देशित फिल्म 'एउटा यस्तो प्रेमकहानी' प्रदर्शनमा आएको हो ।

लकडाउनपछि पुरानै फिल्म प्रदर्शन गरेर हल सञ्चालन गर्दै आएका हल सञ्चालक फिल्मले दर्शक हलसम्म तान्नेमा आशावादी थिए । दर्शकको उपस्थिति शून्य भएको समयमा निर्माताले नयाँ फिल्म दिने कुरा भएन । नयाँ फिल्म नभएकै कारण दर्शकको उपस्थिति कम भएको बताउने हल सञ्चालकलाई नयाँ फिल्मले नयाँ ऊर्जा थपिदिएको थियो ।

के 'एउटा यस्तो प्रेमकहानी'ले दर्शकलाई हलसम्म तान्न सक्ला त ?

२ वर्षदेखि प्रदर्शन अलमलमा परेको यो फिल्मले बिहीबार उत्साहजनकदर्शक तान्न नसकेको हल सञ्चालक बताउँछन् । 'खासै दर्शक छैन आज,' क्यूज सिनेमाजका म्यानेजर राकेश श्रेष्ठले बताए । बानेश्वरको वान सिनेमाजमा पनि सोचेजस्तो बुकिङ नभएको हलका म्यानेजर उमेशराज गिरीले बताए ।

'नयाँ फिल्मले दर्शक हलसम्म तान्ला भन्ने आश थियो । तर सोचेजस्तो बुकिङ भएन । अहिलेसम्म २० जना जतिले टिकट काट्नुभयो,' उमेशले बताए । उनी थप्छन्,'शनिबारचाहिँ दर्शकको अकुपेन्सी पहिलाको झैं होला भन्ने आस छ ।' ९ महिनापछि खुलेको यो हलले २ वटा पर्दामा फिल्म देखाउँदै आएको छ ।

मल्टिप्लेक्सअन्तर्गतको लाबिम मलमा रहेको क्यूएफएक्समा २ वटा सोका बुकिङ राम्रै भएको छ । फिल्मकै टिमले २ वटा सो बुक गरेका कारण २ वटा सो 'फिलिङ फास्ट'मा देखाएको हलका म्यानेज विवेक काफ्लेले बताए । 'फिल्मकै टिमले बुक सो गर्नु भएको छ । यो सोमा अन्य दर्शक पनि आउनुहुन्छ । टिमले नै २ वटा सोको टिकट लिनु भएको कारणले फिलिङ फास्ट देखाएको हो,'उनले भने,'अर्को दिउँसोको सोमा दर्शकको बुकिङ खासै छैन । हेरौं कत्तिको दर्शक आउँछन् ।'

लबिममा पनि अन्य हलले झैं ५० प्रतिशत दर्शक अकुपेन्सीमा फिल्म देखाउँदै आएको छ ।

*यसअघि बिहीबारदेखि हुनुपर्नेमा शुक्रबारदेखि भएकोमा सच्याइएको छ ।

प्रकाशित : माघ १, २०७७ १३:०९
प्रतिक्रिया
पठाउनुहोस्

भारतले बल्ल भन्यो : नेपालका परराष्ट्रमन्त्री ज्ञवाली दिल्ली आउँदैछन्

सुरेशराज न्यौपाने

नयाँदिल्ली — भारतले परराष्ट्र मन्त्री प्रदीपकुमार ज्ञवाली नयाँ दिल्ली ओर्लनु केही घण्टाअघि मात्र उनको भारत भ्रमणका सम्बन्धमा औपचारिक जानकारी दिएको छ । भारतको विदेश मन्त्रालयले बिहीबार बिहानमात्र एक विज्ञप्ति जारी गर्दै मन्त्री ज्ञवालीको भ्रमण तालिका सार्वजनिक गरेको हो ।

नेपालले यसअघि नै भ्रमणका बारेमा औपचारिक रुपमै बताइसके पनि भारतले भने केही बोलेको थिएन । अन्य मुलुकबाट हुने उच्चस्तरीय भ्रमणलाई केही दिनअघि नै औपचारिक जानकारी गराउने गरेको भारत सरकारले मन्त्री ज्ञवालीको दिल्ली आगमनका बारेमा भ्रमणकै अघिल्लो दिनसम्म पनि केही नखुलाउँदा निकै अनौठो मानिएको थियो । जबकि पछिल्लो एक वर्षमा दुई देशको सम्बन्धमा आएको उतारचढावका कारण भ्रमणप्रति निकै चासो रहेको पाइन्छ ।

ज्ञवाली नेपाल–भारत परराष्ट्रमन्त्रीस्तरीय संयुक्त आयोगको बैठकमा सहभागी हुन दिल्ली आउन लागेका हुन् । विदेश मन्त्रालयद्धारा सार्वजनिक भ्रमण तालिकाका अनुसार ज्ञवाली मध्यान्ह १२ बजेर २० मिनेटमा नयाँदिल्ली ओर्लने छन् । जारी विज्ञप्तिअनुसार बिहीबार अरु कुनै औपचारिक कार्यक्रम रहेको छैन । दिल्लीस्थित नेपाली दूतावास स्रोतका अनुसार पहिलो दिन ज्ञवालीले दिल्लीमा रहेका प्रवासी नेपाली संगठनका प्रतिनिधिलाई भेट्ने कार्यक्रम छ । शुक्रबार भने ज्ञवाली बिहानदेखि नै व्यस्त रहनेछन् ।

भारतीय विदेश मन्त्रालयका अनुसार शुक्रबार बिहान एघार बजे ज्ञवालीले आफ्ना समकक्षी एस जयशंकरसँग हैदरावाद हाउसमा भेट गर्नेछन् । त्यसपछि सोही भवनमा साढे एघार बजे नेपाल–भारत संयुक्त अयोगको छैटौं बैठक सुरु हुनेछ । आयोग नेपाल–भारत दुई पक्षीय संयन्त्रहरुमध्ये सबैभन्दा माथिल्लो हो । बैठकमा दुई दर्जनभन्दा द्विपक्षीय संयन्त्रहरुमा हालसम्म भएका छलफल र सहमतिको समीक्षा हुनेछ । स्रोतका अनुसार बैठकमा नेपालले सीमा, ईपीजी, व्यापार, ऊर्जा, कनेक्टिभिटिलगायतका विषयलाई प्राथमिकता दिने बताइएको छ ।

विदेश मन्त्रालयले ज्ञवाली दिल्लीमा रहँदा हुने उच्च राजनीतिक भेटघाटका बारेमा भने केही खुलाएको छैन । तर, दूतावास स्रोतले ज्ञवालीले भारतीय प्रधानमन्त्री नरेन्द मोदीलगायत उच्च राजनीतिक नेतृत्वसँग भेटवार्ताको कार्यक्रम तय भएको जानकारी दिएको छ । ती भेटघाट विशेषगरी नेपालको पछिल्लो राजनीतिक घटनाक्रम र दुई देशबीचको सम्बन्धमा केन्द्रित हुने अनुमान गरिएको छ । मन्त्री ज्ञवाली शनिबार अपरान्ह दुई बजे स्वदेश फर्कने विदेश मन्त्रालयद्वारा जारी विज्ञप्तिमा जनाइएको छ ।

प्रकाशित : माघ १, २०७७ १२:३३
पूरा पढ्नुहोस्
प्रतिक्रिया
पठाउनुहोस्
×