हलमा दर्शक शून्य, नयाँ फिल्मले दर्शक आउने सञ्‍चालकको आस- मनोरञ्जन - कान्तिपुर समाचार
कान्तिपुर वेबसाईट
AdvertisementAdvertisement

हलमा दर्शक शून्य, नयाँ फिल्मले दर्शक आउने सञ्‍चालकको आस

रीना मोक्तान

काठमाडौँ — कोरोना महामारीका कारण ९ महिनादेखि बन्द सिनेमा हल पुस १० गतेबाट खुले । सबै क्षेत्र खुकुलिँदै जाँदा हललाई सरकारले बेवास्ता गरेको भन्दै नेपाल चलचित्र संघले १० गतेदेखि हल खोल्ने स्वघोषणा गरेको थियो । त्यही मितिदेखि अधिकांश हल खुले पनि ।

सार्वजनिक यातायात र क्लब रेस्टुरेन्टको भीड हेर्दा हलमा दर्शक आउलान् भन्ने सोचेका थिए हल सञ्चालकले । सुरक्षाका मापदण्ड अपनाएर सञ्चालकले हल त खोले । तर हलमा दर्शक भने आएनन् । महामारीअघि प्रदर्शनमा आएका 'आमा' र 'सेन्टिभाइरस'ले हलमा दर्शक तान्न सकेन । नयाँ फिल्मको अभावमै हलमा दर्शकको उपस्थिति नभएको क्यूज सिनेमाका सञ्चानलक सुमित मैनाली बताउँछन् ।

'दर्शक छैन । हामीसँग देखाउन नयाँ फिल्म नै छैन । हल खोलेर बसेका छौं । नेपाली फिल्मवाला घरमा फिल्म राख्छन् अनि हल चलाउनुपर्छ भन्छन् । अहिले हल खोलेको र नखोलेको बराबर नै छ । दर्शक उपस्थिति शून्य छ अहिले । हल खोलेर त्यहीमाथि कर्मचारीको खर्च थपियो,' मैनालीले सुनाए ।

क्यूज सिनेमा खोलेदेखि अहिलेसम्म १७ जना दर्शक आए फिल्म हेर्न । उनका अनुसार हल खोलेको तीन दिनसम्म त २ जना दर्शकका लागि पनि सो चलाइदिए । हल खोलेको पहिलो शनिबार ६/७ जना दर्शक उपस्थित थिए । नयाँ फिल्म नभएसम्म दर्शकको उपस्थिति यस्तै रहने बताउँछन् मैनाली । अब उनी माघ १ लाई प्रदर्शन मिति तोकेको नेपाली फिल्म 'एउटा यस्तो प्रेम कहानी'बाट दर्शक संख्या बढ्नेमा आशावादी छन् । भन्छन्,'शिव श्रेष्ठले आँट गर्नु भएको छ । फिल्म भयो भने अलिअलि दर्शक आउलान् भन्ने आश छ ।'

मैनाली मात्र होइन 'एउटा यस्तो प्रेम कहानी'ले प्रदर्शन मिति तोकेसँगै हल सञ्चालक आशावादी बनेका छन् । मल्टिप्लेक्स च्यानलअन्तर्गतको क्यूएफएक्सका कार्यकारी अधिकृत रोशन अडिगा भन्छन्,'हलमा दर्शक उपस्थिति एकदमै कम छ । एउटा सोमा बढीमा ५/६ जना मात्रै छन् छ । नयाँ फिल्म नभएर दर्शक नआउनु भएको हो। नयाँ फिल्म रिलिज भएपछि दर्शक आइहाल्नुहुन्छ नि।'

क्यूएफएक्सले पनि अहिले २ जना दर्शकका लागि फिल्म देखाउँदै आएको उनी सुनाउँछन् । यो शुक्रबार हलिउड फिल्म 'मोन्स्टर हन्टर'पनि प्रदर्शनमा आउँदैछ । यो फिल्मले हलमा दर्शकको उपस्थिति बढाउनेमा उनी ढुक्क छन् । दर्शकको अनुपस्थिति भए पनि आफूहरु हल बन्द गर्ने अवस्थामा नरहेको बताउँछन् उनी । 'बन्द गर्ने सोच त छैन । हल खोलेपछि स्वत: हलको खर्च बढेको छ,' उनले भने ।

नेपाल चलचित्र संघका अध्यक्ष मधुसुदन प्रधान आफूहरुले दर्शकमा हल खुल्यो भन्ने सन्देशका लागि हल खोलेको बताउँछन् । हलमा नयाँ दर्शक नभएकै कारण हल दर्शकविहीन बनेको उनको भनाइ छ । 'अब फिल्म हल खोल्नेबित्तिकै हाउसफूल दर्शक आउनुहुन्न । हामीसँग दर्शकलाई लोभ्याउने कन्टेन्ट पनि त छैन । आमा, सेन्टिभाइरस फिल्म त अधिकांश दर्शकले पहिल्यै हेरिसके नि । बीचमा धेरै फिल्म डिसहोम, युट्युबमा प्रदर्शन भयो,' उनले भने,'यो पुस महिना हामीले परीक्षण मात्र गरेका हौं । हामीले त ९ महिनासम्म बन्द हल खुल्यो भन्ने सन्देश पठाउन मात्र खोलेका थियौं । हामीसँग नयाँ फिल्म भएको भए हल चल्थ्यो ।'

'एउटा यस्तो प्रेम कहानी'ले दर्शकलाई हलसम्म डोर्याएउनेमा उनी विश्वस्त छन् । 'फिल्मको उत्पादक निर्माता हो । निर्माता यस्तो अवस्थामा जोखिम मोल्न चाहँदैनन् । अब माघबाट शिव श्रेष्ठको फिल्म छ । अब माघबाट आउँछन् दर्शक,' उनले सुनाए,'शिवरात्रीमा 'लप्पन छप्पन' भन्ने फिल्म छ । त्यसपछि 'म यस्तो गीत गाउँछु'आउँछ । नयाँ फिल्मसँगै हलमा दर्शक बढ्दै जान्छ ।'

खोलेको ६ महिनामै हल बन्द गरेका वान सिनेमाजका सञ्चालक/निर्माता प्रज्ज्व।ल शम्शेर जबरा दर्शक नयाँ फिल्मको पर्खाइमा रहेको बताउँछन् । 'हलमै पनि नयाँ फिल्मबारे सोध्न कति दर्शक आउँछन् । हलको फेसबुक पेजमा पनि सोधिरहेकै हुन्छन् । पुरानै फिल्म देखाउनुपर्ने बाध्यता छ हाम्रो,'उनले भने,'हामीले हाम्रो व्यवसाय सुरु गर्न पाएका छौं । यो शुक्रबारबाट नयाँ फिल्म आउँछ । नेपाली फिल्मप नि छ । अब दर्शक पनि आउनुहुन्छ भन्नेमा आशावादी छौं ।'

सामान्य बेला औसत ६० प्रतिशत दर्शक आउँथे वान सिनेमाजमा । अहिले पाँच प्रतिशत मात्र दर्शक आउने गरेको उनी सुनाउँछन् । 'दर्शक खासै छैनन् । अहिले एउटा स्क्रिन चलाइरहेका छौं । अब एउटा ठूलो फिल्म आयो भने हल पहिलाकै गतिमा जाला,' उनले सुनाए ।

अर्का हल सञ्चालक प्रदीपकुमार उदय भने माघबाट नै हल खोल्ने तयारीमा छन् । 'एउटा यस्तो प्रेम कहानी'ले प्रदर्शन मिति तोकेसँगै आफूले हल खोल्ने तयारी गरेको उनले बताए । 'अहिले ठूलो हलमा दर्शक आउनु भएको छैन । हाम्रो सानो ठाउँमा पुरानो फिल्म हेर्न को आउनुहुन्छ र ?' उनले भने,'माघमा शिव श्रेष्ठको छोरा र करिश्मा मानन्धरकी छोरी कविता अभिनित फिल्म आउँदैछ । पक्कै दर्शक आउनुहुन्छ ।' इटहरीको इलाइट र बुटवलको द्वारिका उदय हलका सञ्चालक हुन् उदय ।

हलमा दर्शकको उपस्थिति नभएकै कारण निर्माताहरु नयाँ प्रदर्शनलाई लिएर अझै मौन छन् । तर लामो समयदेखि प्रदर्शन अलमलमा परेको 'एउटा यस्तो प्रेम कहानी'ले हालै माघ १ गतेदेखि प्रदर्शनमा आउने घोषणा गरोस् ।

फिल्म हेर्न दर्शक आउलान् त ?

'एउटा यस्तो प्रेम कहानी'का निर्मातासमेत रहेका अभिनेता शिव श्रेष्ठ हलमा दर्शक आउने विश्वास राख्छन् । 'हामीलाई दर्शकमा विश्वास छ । सय प्रतिशत विश्वास। हाम्रो फिल्म हेर्न दर्शक आउनुहुन्छ,' उनले भने,'माघ १ गतेबाट फिल्म लगाउने भन्दा गल्ती गर्नुभयो भन्नुभयो कतिले पहिला । तर यो हाम्रो टिमको निर्णय हो भनेर सुनायौं । पक्का आउँछ हाम्रो फिल्म । उनका अनुसार फिल्मका अन्य निर्माता दिनेश दर्शनधारी र यशोदा राईले नै माघ १ मा फिल्म प्रदर्शन गर्ने निर्णय गरेको हो ।

प्रकाशित : पुस २३, २०७७ १५:११
प्रतिक्रिया
पठाउनुहोस्

डान्सिङ स्टार्स नेपालकी विजेता सुमी भन्छिन् : 'म अकस्मात अभिनेत्री भएँ'

रीना मोक्तान

काठमाडौँ — गायिका ज्योति मगर, बुद्ध लामा, हरि खड्का, फुलेन्देकी आमा(उमेश राई), प्रशान्त ताम्राकार दर्शकमा पहिल्यै चर्चित । 'डान्सिङ स्टार्स नेपाल'को मञ्चमा उनीहरुलाई देख्दा अभिनेत्री सुमी मोक्तानलाई लाग्यो,'म चलेको कलाकार होइन । यहाँ मेरो परिचयले मेरो नृत्यलाई दर्शकले याद गर्ने छैनन् । अब नृत्यबाटै नयाँ पहिचान बनाउँछु ।' 

प्रस्तुति दमदार भयो भने उपस्थित १२ मध्ये आफ्नो जोडी नोटिसमा परिन्छ । नत्र नाच्नलाई नाचेको मात्र देखिन्छ भन्ने सुमीले सोचिन् । त्यसैले उनी केही फरक नृत्य पस्कन चाहन्थिन् । र, जोडी पाइन् उस्तै सोच मिल्ने भिजु पार्की । त्यसपछि दुईले नयाँ शैलीको नृत्यसहित स्टन्ट गर्ने निर्णय गरे ।

मञ्चमा 'सुभिजु'को उपनाम पाएका दुईले पहिलो प्रस्तुतिमै कन्टेम्परोरी शैलीमा नृत्य देखाए । तीन निर्णायकले त उठेरै(स्ट्यान्डिङ ओभियसन) नृत्यको तारिफ गरे । यसरी सुरु भएको यात्रामा सुभिजुले नृत्यका फरक-फरक शैलीहरु पस्के । कहिले झुन्डिँदै एरियल त कहिले एरम्याटमा स्टन्टसहितको नृत्य । मञ्चमा पानी पार्नेदेखि आगो बालेरै प्रस्तुति दिए । दुईको यो मेहनत र सहकार्यले 'डान्सिङ स्टार्स नेपाल'को इतिहास रच्यो । उनी दुई प्रतियोगिताका पहिलो विजेता घोषित भए । दुवैले थप परिचय पाए । 'डान्सका नयाँ शैलीहरु गर्न निकै गाह्रो हुन्थ्यो । सायद दर्शकले हाम्रो दु:ख बुझ्नुभयो र साथ दिनुभयो । चर्चित कलाकारबीच हामी विजेता भयौं,' सुमीले जितको खुसी बाँडिन्,'खुसी सँगसँगै मैले गरेको दु:खले न्याय पायो भन्ने अनुभव हुँदो रहेछ । एकदमै खुसी छु ।'

तस्बिरहरु : दिपेन्द्र राेक्का/कान्तिपुर

प्रतियोगितामा आउनुअघि सामान्य नाच्ने गर्थिन् सुमी । 'नन डान्सर' नै थिइन् । मञ्चमा नृत्य गरेको खासै अनुभव थिएन । म्युजिक भिडियो र फिल्ममा एउटा स्टेप सक्नासाथ 'कट' हुन्छ । 'एक्सन कट' हुने गीतमा नृत्य गर्दै आएकी उनलाई प्रतियोगिताले व्यावसायिक डान्सर बनायो ।

'कम्मर मर्काउने त होला । सामान्य नृत्य गर्न सकिहालिन्छ नि,'प्रतियोगिताको सुरुवातमा यस्तै सोच्थिन् उनी । तर, सोचेजस्तो सजिलो पाइनन् नृत्यलाई ।

'मञ्चमा कन्टेम्परोरी, ल्याटिन शैलीको डान्स गरें । त्यो भनेको मेरो शरीरको लागि एकदमै नयाँ शैली हो । त्यो सँगसँगै स्टन्टदेखि एरियल र एयरम्याटलाई समावेश गरेर २ मिनेटभित्रमा नाच्नुपर्दा खेरी गाह्रो भयो,'अनुभव सुनाइन्,'मैले पहिला कहिल्यै नगरेको शैली हो कन्टेम्परोरी । यसअघि व्यावसायिक रुपले डान्स सिकेको थिएन । त्यही नसिकेको भएर चुनौती थियो । तर यो ६ महिनामा मैले जे जति गर्न सकें, राम्रो दिन सकें भन्ने लागेको छ ।'

सुरुवातका दिनमा हप्तामा एक पटक नृत्य गर्नुपर्थ्यो । तर हप्तामा दुई पटक नृत्य गर्नु चुनौतीपूर्ण बन्दै गयो । एउटा गीतमा नृत्य अभ्यास गर्न २ दिन पाउँथे । थोरै समयमा नृत्य गर्नु कोरियोग्राफर भिजुका लागि ठूलो कुरा थिएन । तर, आफ्ना लागि निकै कठिन भएको सुमी सुनाउँछिन् । 'स्टन्ट निकै गाह्रै थियो । मेरा लागि नेक हुक स्टन्टमध्येकै गाह्रो थियो । किनकि त्यसका लागि म तालिम प्राप्त थिइनँ,' उनी सुनाउँछिन्,'आगोको एक्टमा अभ्यास गर्दा जतिको आगो बलेको थियो, प्रस्तुतिको बीच एकदमै धेरै आगो बल्यो । मन कामेको थियो । तर हामीले नृत्य बीचमै रोकेनौं ।'

पानीको स्टन्ट उस्तै गाह्रो थियो । मानसिक तनावसँगै भौतिक रुपले थकान हुन्थ्यो । 'के दिन के रात थाहै हुन्थेन । बिहान बेलुका अभ्यासमै हुन्थ्यौं । ५ घण्टा लगातार अभ्यास गरिसकेपछि ब्रेकमा फेरि त्यही गीत सुनिरहेका हुन्थ्यौं । ६ महिना सोसल लाइफ थिएन,' सुमीले भनिन् ।

पहिलो प्रस्तुतिबाट उनी दुईबाट निर्णायकले केही नयाँ गर्छन् भन्ने अपेक्षा राख्न थाले । दुवैलाई पनि नयाँ शैली गर्नुपर्छ भन्ने चुनौती थपियो । 'भिजुले पनि मबाट धेरै अपेक्षा गर्थ्यो । स्टन्ट गर्नुअघि उ भन्थ्यो सकिहाल्छ नि तर मलाई निकै गाह्रो हुन्थ्यो । त्यही कुरामा झगडा पर्यो् धेरै पटक,' सुमीले सुरुवातका दिन सम्झिन् । डान्समा नयाँ-नयाँ स्टन्ट गर्न आँटले साथ दियो उनलाई । 'आँटैले त्यो स्टन्ट मैले गरें । एरियलकै कुरा गरौं, मान्छेले हेर्दा झुन्डेको त हो नि भन्छ । तर गर्नेले त्यसको खास अर्थ बुझ्छ । ८० प्रतिशत आँटले नै मलाई त्यहाँ पुर्या एको हो ।'

सुमी आफूलाई कोरियोग्राफर पनि राम्रो जुरेको बताउँछिन् । दुवैको उद्धेश्य एउटै थियो, डान्सिङ स्टार्स नेपाल जित्ने । 'म यहाँ आएको चाहिँ जित्नलाई हो,' हरेकपटक सुमी भिजुलाई भन्थिन् । पाँच घण्टा लगातार नृत्य अभ्यास गरेर थकित भएर बस्दा 'उठ, उठ पार्टनर जित्नपर्छ' सुमीलाई हौसाउँदै भिजु पनि भन्थे ।

रातदिनको मिहेनतले नै सुभिजु विजेता बनेको सुमीको भनाई छ । 'प्रतियोगितामा सबैजना जित्न आएका थिए । तर त्यसमा हामीले जित्यौं । सायद हाम्रो रातदिनको मिहेनतको परिणाम हो त्यो । घाउचोट लाग्ने सामान्य भइसकेको थियो । शरीर नदुख्ने दिन हुन्थेन । आँसु पसिना मिसिएको थियो मिहेनतमा,' सुमीले भनिन् ।

अभ्यासका लागि २-५ घण्टा समय छुट्याइएको हुन्थ्यो । उनी दुई त्योबाहेक पनि साथीहरुका स्टुडियोमा अभ्यास गर्थे । २० घण्टाम्म नृत्य अभ्यास गरेको दिनहरु अझै सम्झिन्छिन् सुमी । विजेता भएबापत पाउने २० लाखमा केही रकम बहिरा संघलाई सहयोग गर्ने सोचेकी छिन् । 'अहिले सबै ठाउँमा २० लाखको कुरा हुन्छ । २० लाख कहिले पाउने हो मलाई थाहा छैन । आउला, समय लाग्छ होला,' उपहार रकमबारे हाँस्दै सुनाइन् ।

एक्सन अभिनेत्री

साहसिक पर्यटनमा स्नातकोत्तर अध्ययन गरिरहेकी सुमी नयाँ फिल्मको काममा हालै आबद्ध भएकी छिन् । २०१२ की मिस तामाङसमेत बनेकी सुमी फिल्ममै आफ्नो करियर बनाउन चाहन्छिन् । उनी २०१३ मा मिस नेपालको शीर्ष पाँचसम्म पुगेकी थिइन् । सौन्दर्य प्रतियोगितामा सहभागी हुन थालेपछि उनले म्युजिक भिडियो गर्न सुरु गरिन् । पाँचौं म्युजिक भिडियो गरिसक्दा उनलाई 'झ्यानाकुटी' फिल्मको अफर आयो ।

भूमिका छोटो थियो । त्यतिबेला क्यामेराको फ्रेम केही बुझेकै थिइनन् । तर अभिनय गरिन् । त्यसपछि कलाकार सौगात मल्लको सल्लाहमा 'ज्ञ' थियटरमा अभिनय सिकिन् । त्यसबीच फिल्म '२ रुपैयाँ'मा उनले एउटा गीत गरिन् । त्यसपछि उनलाई 'सरौतो' फिल्मबाट अफर आयो । सरौतोबाट नै'एक्सन अभिनेत्री'को उपनाम पाएकी हुन् सुमीले ।

म्युजिक भिडियो हुँदै फिल्ममा काम गरेपछि नै हो सुमीलाई यो क्षेत्रले तानेको । 'सुरुको दिनमा यसमै करियर नै बनाउँछु भनेर आएको होइन। तर गर्दै गएपछि राम्रो गर्न सक्छु भन्ने लाग्यो,' उनले भनिन् ।

'सरौतो'मा उनी प्रमुख भूमिकामा देखिएकी थिइन् ।

फिल्म त खासै चलेन नि ?

प्रश्न खस्न नपाउँदै जवाफमा भनिन्,'यो फिल्मको हिरो नै म थिएँ । तर फिल्मको लगानी उठेको छ । कति चर्चित कलाकारको फिल्म फ्लप हुन्छ । म त नयाँ थिएँ । त्यहीमाथि महिला केन्द्रित एक्सन फिल्म । कोरोना नभइदिएको भए धेरै राम्रो हुन्थ्यो होला।'

'सरौतो'को लागि डेढ वर्ष दिएकी थिइन् उनले । लगानी उठाएको दाबी गरे पनि फिल्मले सोचेजस्तो सफलता नपाएको उनी स्वीकार्छिन् । भन्छिन्,'सायद प्रदर्शन मिति सार्नु नपर्ने थियो कि हामीले?, हामी नयाँ अनुहार र नयाँ मेकर भएकाले डरायौं । पछाडि नसरेको भए राम्रो कमाइ गर्थ्यौ कि भन्ने पनि लागेको छ ।'

फिल्ममा करियर बनाउन खासै परिवारको साथ थिएन सुमीलाई । बुवा सन्तवीर लामा नेपाल पर्वतारोहण संघका अध्यक्ष । बुवा उनलाई डाक्टर बनाउन चाहन्थे । दिल्लीको लक्ष्मण पब्लिक स्कुलदेखि अमेरिकामा पढाए । तर उनको रुचि फिल्मतिरै मोडियो । 'बुवा र मेरो क्षेत्र फरक छ । उहाँले मबाट धेरै अपेक्षा राख्नुहुन्थ्यो । साइकोलोजी पढ्दा पनि के पढेको भन्नुहुन्थ्यो म दिमागको डाक्टर हो भनेर टारिदिन्थें,' उनी सुनाउँछिन् ।

फिल्ममा प्रवेश गरेको थाहा पाएपछि 'यो क्षेत्रमा के पाउँछ? बुवा उनलाई सोध्थे । 'यो काम गर्दा खुसी अनुभव हुन्छ । जे गरे पनि तपाईंलाई गर्विलो बनाउँछु,' उनी बुवालाई सम्झाउँथिन् । अहिले उनलाई परिवारको साथ छ । ट्रेकिङ कम्पनी र एभरेस्ट कफीको व्यापारमा उनको परिवार सक्रिय छ । व्यावसायिक परिवारकी सुमी अब फिल्ममा निर्माताको रुपमा आउने सोचमा छिन् । ,'म अकस्मात रुपले अभिनेत्री भएँ । अभिनेत्री बन्छु भनेर सपना देखेको होइन । म निर्माता मात्र होइन निर्देशकको रुपमा पनि आउन सक्छु ।'

प्रकाशित : पुस १८, २०७७ १३:५९
पूरा पढ्नुहोस्
प्रतिक्रिया
पठाउनुहोस्
×