चुनावमाथि हरिवंशको व्यंग्यात्मक गीत - मनोरञ्जन - कान्तिपुर समाचार
कान्तिपुर वेबसाईट
AdvertisementAdvertisement

चुनावमाथि हरिवंशको व्यंग्यात्मक गीत 

कान्तिपुर संवाददाता

काठमाडौँ — कलाकार हरिवंश आचार्यले देशको बिग्रदो राजनीतिमाथि व्यंग्यात्मक गीत सार्वजनिक गरेका छन् । उनले 'मह सञ्चार'को युट्युब च्यानलबाट 'एउटा कुरा छ' बोलको गीत सार्वजनिक गरेका हुन् ।

गीतमा एकजना गाडा चलाउने व्यक्ति छन् । जो आफ्नो साथीलाई ज्योतिषले आफूलाई नेता बन्ने भविष्यवाणी गरेको सुनाउँछन् । चुवान लड्यो भने धनी हुन्छ भन्ने सपना ज्योतिषले उक्त व्यक्तिलाई सुनाएको हुन्छ । उनले गाडा चलाउँदै धनी हुने कल्पना गरे दृश्य भिडियोमा समेटिएको छ । भिडियोमा गाडा चलाउने व्यक्तिको भुमिकामा गायक हरिवंश स्वंय देखिएका छन् ।

देशको विद्यमान राजनीतिक घट्नाक्रमपछि यो गीत फुरेको हरिवंश सुनाउँछन् । 'एउटा गीत बनाउने सोच्दै थिएँ । अनि देशमा चुनाव हुने कुरा सुनें,' उनले गीत बुन्दाको समय सम्झे,'चुनाव जति गरे पनि देश धनी भएन । व्यक्तिहरु धनी भए । हामीले धेरै वटा चुनाव लडिसक्यौं, जति चुनाव लडे पनि देश माथि गएन । नेताहरु मात्र धनी भए । त्यसैले यही विषयमाथि गीत बनाएँ ।' थपे,'कत्ति चुनाव गर्ने के । चुनावपछि त देश बन्नुपर्छ नि ।'

चुनावमा नेता धनी बन्ने प्रवृत्तिमाथि आफूले गीतमार्फत व्यंग्य गरेको उनी सुनाउँछन् । 'सबैभन्दा धनी हुने माध्यम नै चुनाव लड्दा हुन्छ भनिन्छ । खुट्टामा चप्पल नहुनेहरु सत्तामा पुग्नासाथ धनी हुन्छन् । चुनाव लड्यो धनी हुने प्रवृति धेरै छ । त्यसैलाई थिम बनाएको हो गीतमा,' हरिवंशले भने,'अनि रत्नपार्कको वरिपरि जोतिषलाई हात देखाइरहने मानिसको दृश्य दिमागमा आयो । त्यसलाई पनि गीतमा समेटें । ज्योतिष राख्यो भने रमाइलो हुन्छ भन्ने भयो ।'

तीन महिनाअगाडि हरिवंशले 'तिमी के को जान्ने' बोलको गीत सार्वजनिक गरेका थिए । गीतमार्फत अरुका कुरा नसुन्ने र आफैं जान्नेसुन्ने भइटोपल्ने नेताहरुमाथि व्यंग्य हानेका थिए । हरिवंशकै शब्द संगीतमा तयार भएको गीतमा, सागरराज शर्माको निर्देशन, प्रविण श्रेष्ठको रंग संयोजन, किरण तुलाधरको एरेन्ज र सत्यदीप केसीको सिनिमेटोग्राफी छ । यो गीत हरिवंशले गाएको १५ औं गीत हो ।

प्रकाशित : पुस २२, २०७७ १६:५६
प्रतिक्रिया
पठाउनुहोस्

नास्टद्वारा नेपाली वैज्ञानिकहरुको सूची तयार

कान्तिपुर संवाददाता

काठमाडौँ — नेपाल विज्ञान तथा प्रविधि प्रज्ञा प्रतिष्ठान (नास्ट) ले विज्ञान तथा प्रविधि क्षेत्रमा विद्यावारिधि गरेका नेपाली वैज्ञानिकहरुको पहिलो पटक सूची तयार गरेको छ । अनुसन्धानकर्ताहरुको विषयगत विज्ञता र उनीहरुले गरेका कामको जानकारी दिने उद्देश्यले नाष्टले ‘हु इज हु’ प्रकाशन गरेको हो । 

नास्टका प्रवक्ता सुरेशकुमार ढुंगेलले पीएचडी गरेर देश/विदेशमा रहेर काम गरिरहेका अनुसन्धानकर्ताहरुको सूची तयार गरिएको बताए । विषयगत विज्ञता हासिल गरेका व्यक्तिहरुको कुन क्षेत्रमा कस्तो दक्षता छ भन्ने जानकारीका लागि सूची तयार गरिएको ढुंगेलले जानकारी दिए ।

नेपालमा अनुसन्धानको क्षेत्रमा धेरै कामहरु भए पनि कुन विधामा कस्ता कस्ता दक्षता हासिल गरेका अनुसन्धानकर्ताहरु छन् भन्ने जानकारी यसअघि थिएन । यो सूचीले आगामी दिनमा विभिन्न देशहरुमा छरिएर बसेका वैज्ञानिकहरुबीच सहकार्यका लागि मद्दत पुग्ने नास्टले जनाएको छ ।

‘यसअघि नेपालमा कुन अनुसन्धानको क्षेत्रमा को विज्ञ छ भन्ने यकिन सरकारी तथ्यांक थिएन,’ प्रवक्ता ढुंगेलले भने,‘यो सूचीले विज्ञान प्रविधिको क्षेत्रमा नेपालमा कस्ता कस्ता अनुसन्धान गरिरहेका विज्ञहरु छन् भन्ने थाह पाउन सकिन्छ । एउटा डाटावेस तयार भएको छ ।’

नास्टले तयार गरेको सूचीमा विज्ञहरुको परिचयसहित विशेषज्ञता र कामहरुको जानकारी राखिएको छ । सूची तयार गर्न नास्टले अनलाइनमार्फत आह्वान गरेको थियो । नास्टका प्राज्ञसमेत रहेका इन्जिनियरिङ अध्ययन संस्थानका प्राध्यापक शैलेन्द्रकुमार मिश्रको संयोजकत्वमा ६ सदस्यीय समिति निर्माण गरेको थियो ।

यो सूची अनलाइनमार्फतबाट नै हेर्न सकिने नास्टले जनाएको छ । हाल पहिलो चरणमा विद्यावारिधि गरेकाहरुका लागि मात्रै समावेश गरिए पनि आगामी दिनहरुमा विज्ञान तथा प्रविधि क्षेत्रमा स्नातकोत्तर गरेर अनुसन्धानमा संलग्नहरुको पनि सूची तयार गर्ने नास्टको योजना छ ।

नास्टले नेसनल एसटीआआई नलेज सेन्टर बनाउने तयारी पनि गरिरहेको छ । यो सूची उक्त सेन्टर निर्माणका लागि महत्वपूर्ण हुने ढुंगेलले बताए । एसटीआई सेन्टरले विज्ञान तथा प्रविधिका हरेक विषयसँग सम्बन्धित कार्यहरु गर्नेछ ।

नास्टको सूचीमा सबैभन्दा बढी कृषि, मेडिकल, रसायनशास्त्रमा पीएचडी गर्नेहरु बढी छन् ।

प्रकाशित : पुस २२, २०७७ १६:२९
पूरा पढ्नुहोस्
प्रतिक्रिया
पठाउनुहोस्
×