प्रियंका चोपडाको संस्मरण 'अनफिनिस्ड' आउँदै- मनोरञ्जन - कान्तिपुर समाचार
कान्तिपुर वेबसाईट
AdvertisementAdvertisement

प्रियंका चोपडाको संस्मरण 'अनफिनिस्ड' आउँदै

कान्तिपुर संवाददाता

काठमाडौँ — बलिउड अभिनेत्री प्रियंका चोपडा जोनसले आफ्नो जीवनीमाथि लेखेको संस्मरण पुस्तक 'अनफिनिस्ड'को आवरण सार्वजनिक गरेकी छिन् । शुक्रबार सामाजिक सञ्जाल इन्स्टाग्राममा पुस्तकको आवरण तस्बिर सार्वजनिक गर्दै 'प्रि-अर्डर'को घोषणा पनि गरिन् ।

पुस्तकबारे उनले इन्टाग्राममा लेखेकी छिन्,'यो पुस्तकको नाम मैले पुस्तक लेख्नु अगाडिदेखि नै राखेको थिएँ । २० वर्षदेखि पब्लिक फिगर भएर मैले धेरै जीवन बाँचे, मेरो व्यक्तिगत र व्यवसायिक जीवनलाई हेर्दा म अपूर्ण/असमाप्त रहेछु । संस्मरण लेख्दाको रमाइलो पक्ष भनेको यसले तपाईंलाई हरेक चिजलाई फरक ढंगले हेर्न लगाउँछ । यसो गर्दा मैले असमाप्त(अनफिनिस्ड) हुनुमा गहिरो अर्थ भेटेको छु ।'


आफ्नो व्यक्तिगत जीवनबारे खासै नखुल्ने प्रियंकाले आफ्नो संस्मरणमा ती सबै कुरा समेटेको 'पिपुल'ले उल्लेख गरेकाे छ । अभिनेत्री चोपडाले परिवारले कम उमेरमै आफूलाई दृढ विश्वास राख्न सिकाएको पनि इन्स्टाग्राममा उल्लेख गरेकी छिन् ।


'कतै जोखिम मोल्नु पर्‍यो, कतै परेन । तर मैले यो दौरान परिवर्तन हुन छोडिनँ । केही कुरालाई अपूरा/अधुरा छोडेकोमा मलाई पछुतो पनि छैन । सायद त्यो व्यक्तिगत विकासका लागि आवश्यक थियो,' उनी लेख्छिन्, 'म आशा राख्छु कि तपाईं आत्मविश्वासी भएर अगाडि बढ्नुहुनेछ, अपूरा कुरालाई छोड्दै । भन्नका लागि हामीसँग फरक कथा छन् । तर, यो चाहिँ मेरो कथा हो । किनकि म असमाप्त(अनफिनिस्ड) छु ।'


'पेन्गुइन' प्रकाशनले यो पुस्तक बजारमा ल्याउँदै छ ।

प्रकाशित : आश्विन १६, २०७७ २१:१५
प्रतिक्रिया
पठाउनुहोस्

उखुबारीमा किशोरीको शव फेला

कान्तिपुर संवाददाता

रौतहट — वृन्दावन नगरपालिका–४ मा शुक्रबार साँझ १३ वर्षीया सन्जाकुमारी साहको शव शंकास्पद अवस्थामा फेला परेको छ । उनको बलात्कारपछि हत्या भएको आशंका गरिए पनि पुष्टि हुन सकेको छैन । गढीमाई नगरपालिका–१ समनपुर घर भएकी उनी वृन्दावन–४ पलटुवास्थित मामा बैनाथी साहको घरमा बस्दै आएकी थिइन् ।

स्थानीय होसनारायण यादवको उखुबारीमा शुक्रबार बिहान ९ बजे घाँस काट्न गएकी उनी अबेरसम्म नआएपछि खोजी गरिएको थियो । गाउँका रामएकवाल यादवका अनुसार सन्जाको शरीरमा एउटा पनि कपडा थिएन । ‘उनको बलात्कारपछि हत्या गरिएको हुन सक्छ,’ उनले भने, ‘घाँटीमा पनि चोट देखिएकाले घटना शंकास्पद छ । यसको यथार्थ अनुसन्धान हुनुपर्छ ।’ किशोरीका बुबा सीताराम साह कानुले पनि छोरीको हत्या भएको बताएका छन् ।

जिल्ला प्रहरीका डीएसपी भरत श्रेष्ठले किशोरीको शंकास्पद मृत्यु भएको बताए । इलाका प्रहरी गरुडाबाट समेत डीएसपी रवि रावलको टोली घटनास्थल पुगेको छ । किशोरीको शव उखुबारीबाट उठाइएको छैन । राति भएकाले प्रहरीले शनिबार बिहानबाट थप अनुसन्धानमा जुट्ने जनाएको छ ।

प्रकाशित : आश्विन १६, २०७७ २०:५०
पूरा पढ्नुहोस्
प्रतिक्रिया
पठाउनुहोस्
×