आफ्नै 'बायोपिक' निर्देशन गर्दै म्याडोना - मनोरञ्जन - कान्तिपुर समाचार
कान्तिपुर वेबसाईट
AdvertisementAdvertisement

आफ्नै 'बायोपिक' निर्देशन गर्दै म्याडोना 

एजेन्सी

न्युयोर्क — गायिका म्याडोनाको जीवनीमा फिल्म बन्ने भएको छ । फिल्मलाई म्याडोनाले नै निर्देशन गर्ने बीबीसीलगायतकाका अन्तर्राष्ट्रिय सञ्‍चारमाध्यमहरुले उल्लेख गरेका छन् ।

हालै युनिभर्सल पिक्चर्सले म्याडोनाको निर्देशनमा 'पप स्टार'माथि फिल्म घोषणा गरेको थियो । फिल्मको नाम भने सार्वजनिक गरिएको छैन । चलचित्रमा न्युयोर्कको सुकुम्बासी बस्तीदेखि 'ग्लोबल स्टारडम' सम्मको यात्रा समेटिने बताइएको छ ।

म्याडोना फिल्ममा आफ्नो जीवन यात्रालाई प्रस्तुत गर्न चाहिन्छिन् । 'जीवनले कलाकार, संगीतकार, डान्सरको रुपमा अविश्वसनीय यात्रामा लगेको छ । एक मानिस जो आफ्नो बाटो यो संसारमा बनाउँदै छ,' उनले भनेकी छिन् ।

म्याडोनाले फिल्म मूलत: संगीतमै आधारित हुने उल्लेख गरेकी छिन् । 'संगीतले अगाडि बढ्न र कलाले मलाई जीवित राखिरह्यो । मेरो जीवनमा धेरै नभनिएका र उत्प्रेरणा दिने कथा छन् जसलाई मैलेबाहेक कसले राम्ररी भन्न सक्छ,' उनको बयानमा उल्लेख गरिएको छ ।

फिल्मलाई एमी प्यास्कलले निर्माण गर्ने बताइएको छ । यसअघि एमीले सन् १९९२ मै उनले 'अ लिग अफ दियर ओन' बनाउने क्रममा नै म्याडोनासँग काम गरेकी थिइन् । फिल्मको स्क्रिप्ट भने म्याडोनाले ओस्कर विजेता स्क्रिनराइटर डियाब्लो कोडीसँग मिलेर लेख्नेछिन् । कोडीले सन् २००७ मा चलचित्र 'जुनो'का लागि ओस्कारमा बेस्ट स्क्रिनप्ले अवार्ड जितेकी थिइन् ।

स्क्रिप्टराइटिङका क्रममा लेखक डियाब्लो कोडीसँग म्याडोना तस्बिर : म्याडोनाको इन्स्टाग्रामबाट

६२ वर्षीया म्याडोनाले भने यसअघि सन् २००८ मा ब्रिटिस ड्रामा 'फिल्थ एन्ड विज्डम' निर्देशन गरेकी थिइन् । उनको अन्तिम एल्बम भने सन् २०१९ को 'म्याडम एक्स' हो ।

पछिल्लो समय पप र रक गायक/गायिकामाथि बायोपिक बनाउने क्रम बढिरहेको छ । यसअघि एल्टन जोनमाथि बनेको चलचित्र 'रकेटम्यान' र फ्रेडी मर्करीमाथि बनेको 'बोहेमियन र्‍याप्सोडी' निकै सफल भएका थिए । 'बोहेमियन र्‍याप्सोडी'बाट अभिनेता रामी मलिकले ओस्कारमा उत्कृष्ट अभिनेताको अवार्ड जितेका थिए । यस चलचित्रले उत्कृष्ट अभिनेतासहित चार विधामा ओस्कार जितेको थियो ।

प्रकाशित : भाद्र ३१, २०७७ १२:३५
प्रतिक्रिया
पठाउनुहोस्

पीसीआर रिपोर्ट नआउँदै शव आफन्तलाई बुझाएपछि शिर मेमोरियल अस्पताललाई स्पष्टीकरण

नगेन्द्र अधिकारी

काभ्रे — कोरोना आशंकित महिलाको मृत्युपछि पीसीआर रिपोर्ट नआउँदै आफन्तलाई शव जिम्मा लगाइएको घटनामा जिल्ला कोभिड–१९ संकट व्यवस्थापन केन्द्रले बनेपास्थित शिर मेमोरियल अस्पताललाई स्पष्टीकरण सोधेको छ । 

भदौ २५ गते मृत्यु भएकी भुम्लु गाउँपालिकाकी ७४ वर्षीया महिलाको शव सद्गत गरिएपछि रिपोर्ट आउँदा कोरोना पुष्टि भएको थियो ।

संक्रमितको शव व्यवस्थापनमा लापरबाही गरेको र समुदायमा कोरोना संक्रमणको जोखिम बढाएको भन्दै अस्पताललाई स्पष्टीकरण सोधिएको जिल्ला कमान्ड पोस्टका सदस्य डा. नरेन्द्रकुमार झाले जानकारी दिए । २४ गते अस्पताल भर्ना भएकी ती महिलाको उपचारका क्रममा मृत्यु भएको थियो । लगत्तै स्वाब संकलन गरी पीसीआर परीक्षणका लागि पठाइएकोमा २८ गते साँझ रिपोर्ट आएको थियो ।

अस्पतालले परिवारले नमानेका कारण रिपोर्ट आउनुअघि नै घर पठाइएको जनाएको छ । ‘दमकी रोगी भएकाले सोही कारण मृत्यु भएको हुन सक्ने भन्दै परीक्षण गराए पनि रिपोर्ट आउन्जेल परिवारले कुर्नुभएन, मान्दै नमानेपछि सद्गत गर्न थोरै व्यक्ति जानु, मास्क प्रयोग गर्नु, सामाजिक दूरी कायम गर्नु भनेर सम्झाएका थियौं,’ अस्पतालका प्रवक्ता डा. अरुण गुप्ताले भने ।

स्वास्थ्य कार्यालय काभ्रेका प्रमुख डा. नरेन्द्रकुमार झाले मृतकबारे अस्पतालले कुनै जानकारी र समन्वय नगरेको बताए । ‘परीक्षणको नतिजा आएपछि मात्रै अन्तिम संस्कार गरेको भए कम जोखिम हुन सक्थ्यो तर शंकास्पदको स्वाब लिएको, मृत्यु भएकोलगायत कुनै पनि घटनाबारे अस्पतालले जानकारी र समन्वय गरेन,’ उनले भने, ‘कन्ट्याक्ट ट्रेसिङ टिमले काम थाल्दा सबै कुरा पत्ता लाग्यो, प्रत्यक्ष सम्पर्कमा आएकाको स्वाब संकलन गर्छौं ।’

मृतक परिवारका सदस्यले भने सामाजिक दूरी कायम गरी अन्तिम संस्कार गरिएको बताए । गाउँपालिका अध्यक्ष गुमानध्वज कुँवरले अस्पतालको लापरबाहीका कारण जोखिम बढेको बताए । हालसम्म कोरोनाले जिल्लाका दुई र अन्य जिल्लाका तीन जनाको धुलिखेल अस्पतालमा मृत्यु भएको थियो । उनीहरूको शव व्यवस्थापन नेपाली सेनाले गरेको थियो ।

प्रकाशित : भाद्र ३१, २०७७ १२:२५
पूरा पढ्नुहोस्
प्रतिक्रिया
पठाउनुहोस्
×