चक्र बम भन्छन्-  'ओए काजल ! लकडाउनले कमाल गर्‍यो'- मनोरञ्जन - कान्तिपुर समाचार
कान्तिपुर वेबसाईट
AdvertisementAdvertisement

चक्र बम भन्छन्-  'ओए काजल ! लकडाउनले कमाल गर्‍यो'

रीना मोक्तान

काठमाडौँ — कोरिया जाने निहुँमा २०६९ मा कर्णालीबाट काठमाडौं आए चक्र बम । मनमा गायन क्षेत्रमा प्रवेश गर्ने हुटहुटी थियो । तर परिवार उनलाई व्यवसाय गर्न हौस्याउँथे । दुईजना दाइ व्यवसाय र अर्का सेनाका जागिरे । उनलाई आफ्नो करियर संगीतमै बनाउनु थियो ।

काठमाडौंमा आएर सुरुमै सेनामा भर्ती हुनका लागि दरखास्त दिएका थिए तर सफल भएनन् । त्यसपछि परिवारको करले उनले कोरियन भाषा पढे । उनको ध्यान पढाइतिर कम संगीततिर बढी जान थाल्यो । सुदूरपश्चिमका कलाकारसँग नजिक हुने, स्टुडियो जाने माहोल बन्न थाल्यो । ५० हजार बढी खर्चेर पहिलो गीत निकाले । गीत खासै चलेन । परिवारलेसमेत गीत सार्वजनिक भएको ४ महिनापछि मात्रै थाहा पाए ।

गीत रेकर्ड गर्न काठमाडौं गएको कि विदेश जान ? पहिलो गीतबारे सुनेपछि परिवारले उनलाई सोधेका थिए । उनी अनुत्तरित भए । त्यसबीच कोरियन भाषा परीक्षा ईपीएसमा उनको नाम निस्केन । परिवारलाई अन्य देश जाने प्रकिया चालेको बहाना गर्दै दोस्रो देउडा गीत रेकर्ड गराए । त्यो पनि दर्शकको नजरमा परेन । दुईवटा गीत निकालिसकेपछि कुन क्षेत्रमा करिअर बनाउने ? चक्र अलमलमा परे । गाउँ फर्कने मन भएन । काठमाडौंमै बस्ने निधो गरे । एकजना दाइको सहयोगमा दोहोरी साँझतिर काम थाले । 'कोठा भाडा तिर्नकै लागि दोहोरी साँझमा काम गरेँ । परिवारसँग खर्च माग्‍न पनि भएन । मलाई संगीतमै केही गरेर देखाउनुथियो,' उनले पुराना दिन सम्झिए ।

सुदूरपश्चिममा देउडा चल्छ । उनलाई दोहोरीमा त्यति मेसो थिएन । मादल बजाउन आउँथ्यो । दोहोरी साँझमा उनलाई मादल मात्रै बजाउन दिइन्थ्यो । माइकमा गाउन देलान् कि भन्ने आश चाहीँ थियो । तर चार महिना मादल बजाएरै बित्यो । मादल बजाउँदा उनले लोकदोहोरीको भाका टिपिसकेका थिए । तर नयाँ गायकलाई कसले पत्याउने ? ग्राहकबाट देउडाको अफर आउँदा बल्ल माइक समाउन पाउथे चक्रले ।

विस्तारै उनले स्टेजमा दोहोरी गाउन सुरु गरे । ३ वर्ष दोहोरी साँझमा काम गर्दै ११ वटा गीत रेकर्ड गराए । ती सब गीत लोक देउडा थिए । न गीत चल्यो न उनको चर्चा । 'मलाई प्रशंसा बटुलिहालौं । मेरो नामको वाहवाह होस् भन्ने चाहन्थें, ' गीत नचल्दाको क्षण सम्झँदै भने, 'त्योबेला गाउँमा आफ्नो गीत पनि मोबाइलमा आफैंले देखाइदिनु पर्थ्यो । मलाई के लाग्थ्यो भने मेलामहोत्सव र कन्सर्टमा फलानो आउनुपर्छ भन्दा पहिलो सूचीमै मेरो नाम परोस् । त्यस्तो भइरहेको थिएन ।'

लगातार लोक देउडा गीत गाइरहँदा केही नयाँ गरौं भन्ने नसोचेका होइनन् चक्रले । जब उनी आफ्नो गीतमा र्‍याप मिसाएर अग्रजलाई सुनाउँथे उनीहरु यस्ता गीतले विकृति फैलिने, मौलिक कुरा मर्ने भन्दै उनलाई हतोत्साहित गर्थे । एक दर्जन गीत खासै चर्चामा नआएपछि उनले दुबई जाने निर्णय गरे । प्रक्रिया चाले ।

दुबई जानुअघि अन्तिम गीत निकाल्ने सोचे । त्यसपछि सार्वजनिक भयो 'नाच मेरी झुमा' । र्‍याप मिसिएको डान्सिङ गीतलाई सुदूरपश्चिममा अधिकांशले रुचाए । दसैंमा गाउँ जाँदा रातभरि गाडीमा आफ्नो गीत बजेको सुन्दा उनलाई संगीत क्षेत्रमै केही गर्छु भन्ने ऊर्जा थपियो । दुबईको सबै प्रक्रिया बीचमै रद्द गरे । त्यसमा परिवारको साथ र सहयोग पाए ।

भिडियो कुराकानी हेर्नुहोस्

गाउँतिर चलिरहेको एउटै शैलीको गीत भन्दा केही फरक गर्न चाहन्थे चक्र । 'नाच मेरी झुमा'पछि डान्सिङ खालका गीत निकाले । त्यसपछि उनका 'डिजे वाले दाइ', 'विद्यानाश', 'दारु सड्क्याउने' जस्ता गीतले चर्चा कमाउन थाल्यो । त्यसपछि उनलाई लगातार स्टेज कार्यक्रमका अफर आउन थाल्यो । स्टेज कार्यक्रमका लागि गत वर्ष उनी कोरिया पनि पुगे । कोरियन भाषासँगै पढेका साथीहरु पनि उनलाई त्यहाँ भेट्न आएका थिए । नाम निकाल्न नसके पनि गीतको माध्यमबाट कोरिया पुग्दा उनको खुशी दोब्बर भएको थियो ।

ओए काजल – लकडाउनको कमाल

स्टेज कार्यक्रममा उस्तै किसिमका गीत प्रस्तुत गरिरहँदा चक्रलाई नयाँ शैलीको गीत ल्याउने मन थियो । गीतका केही शब्दहरु लेख्न बसिसकेका थिए । तर बीचैमा लकडाउन भयो । गीत पूरा गर्ने समय पाए उनले । मेलोडी गीत बनाउने क्रममा 'ओए काजल' तयार भयो । सर्वाधिक चर्चामा रहेको यो गीत टिकटकदेखि सामाजिक सञ्जालमा छ्यापछ्याप्ती सुन्न पाइन्छ । यो गीत सार्वजनिक भएको तीन दिन त खासै राम्रो भ्यूज थिएन । तर तेस्रो दिनबाट टिकटकमा भिडियो बन्न थालेपछि अत्याधिकले गीतलाई रुचाइदिएको चक्र बताउँछन् । 'लकडाउनमा गीतको रचना गरेँ । अहिले सबैले मनपराइदिनु भएको छ । लकडाउनले कमाल गर्‍यो,' खुशी हुँदै उनले सुनाए ।

यो गीतमा सबैले टिकटक भिडियो बनाउन थालेपछि युट्युबको भ्युज पनि ह्वात्तै बढ्यो । नेपालीले मात्र होइन यस गीतमा भारतीय र पाकिस्तानी टिकटक प्रयोगकर्ताले पनि भिडियो बनाएका छन् । आफ्नो गीतले चौतर्फी चर्चा पाउँदा उनी दंग छन् ।

'ओए काजल' मा कुमाउ/गढवाल र आसामी गीतको स्वाद मिसिएको छ । कतिले सुरुमा आफ्नो गीतका शब्द नबुझेको चक्र बताउँछन् । 'कतिले गीत सुनेर यो भाषा कहाँ हो भन्न भ्याएका छन् । नेपालमा त भाषामा विविधता छ । धेरैले बुझेका छैनन् । कुमाउ/गढवालसम्म आफ्नो गीत पुगोस् भन्ने चाहन्थे । यो गीतले सपना पूरा गरिदियो । गीतबाट अध्याधिक चर्चा पाएँ । छुट्टै धारमा गीत बनाउने गायक चक्र बम पनि रहेछ भन्ने कुरा स्थापित गराइदियो,' उनले भने ।

लकडाउनमा भीडभाड गर्न नमिल्ने भएर गीतको भिडियोमा मोडल गीता ढुंगाना र गायक चक्र आफैंले अभिनय गरेका छन् । आसामी गीतबाट प्रभावित भएर भिडियो बनाएको गायक चक्र सुनाउँछन् । सानैदेखि नाचगानमा अगाडि हुने चक्र आफ्ना गीतको भिडियोमा आफैं देखिन रुचाउँछन् ।

यसअघि गायक चक्रले गाएको थारु डान्सिङ गीत चर्चामा आएको थियो । 'पहाडिया बिग्रियो जाँडको झोलमा'बोलको थारु गीतले उनको चर्चा प्रदेश २ मा मात्र सीमित गरेन । थारु समुदायमा पनि उनले आफ्नो गायकीबाट चर्चा कमाए ।

उनी आफ्ना गीतमा सुदूरपश्चिमेली भाषा र देउडाको मेलोडी मिसाउँछन् । 'प्रदेश २ मा मात्र होइन, ६ र ७ प्रदेशमा पनि बोलिन्छ खस भाषा । भाषा त संस्कृति हो नि । त्यही भाषामा बोलिने ठेट शब्दलाई बोल्दा मिठो सुनिन्छ । तर के भन्या हो भनेर बुझ्न खोज्छन् नि । त्यसैले मैले त्यो ठेट भाषालाई गीतमा राखेर पृथकता दिन खोजें,' उनले भने ।

बेलाबखत देउडामा र्‍याप मिसाएको भन्दै उनी आलोचना खेपिरहेका हुन्छन् । २८ वर्षीय गायक बमलाई अहिले यस्ता आलोचनाले खासै फरक पनि पार्दैन । 'देउडा आफैंमा मौलिक बोकेको गीत त्यसमा र्‍याप, क्लबमा सुटिङ अनि रक्सी देखाएर सुटिङ गरेको भनेर आलोचना गर्छन् । तर मैले दर्शकलाई नयाँ स्वाद दिन यस्तो गरेको हुँ,' उनले भने ।

उनलाई कोरोनाको प्रभाव नभएको भए यो गीतले स्टेज तताउँथ्यो जस्तो लागेको छ । अहिले उनलाई गलत समयमा पो गीत सार्वजनिक गरेछु कि भन्ने लाग्छ हिजोआज । 'अहिले यो गीत ननिकालेको भए हुने रहेछ भा'छ। आयोजकहरुले सम्झने बेलामा आएको भए म मेला महोत्सवमा व्यस्त हुन्थे,' उनले भने, 'आफ्नो गीत चलिरहेको बेलामा डिमान्ड गर्न पनि सजिलो हुन्छ । यो सही समय थिएन कि भन्ने पनि लाग्यो ।'

प्रकाशित : श्रावण १२, २०७७ १६:५५
प्रतिक्रिया
पठाउनुहोस्

पीसीआर परीक्षण गराउन अन्तरिम आदेश जारी

रुपा गहतराज

नेपालगन्ज — उच्च अदालत तुलसीपुर नेपालगन्ज इजलासले कारागार तथा बाल सुधार गृहमा रहेका कैदीबन्दी तथा बालबालिकासित सम्पर्कमा आउने सुरक्षाकर्मी र कर्मचारीहरुलाई कोरोना संक्रमण एकिन गर्न पीसीआर परीक्षण गराउन अन्तरिम आदेश जारी गरेको छ ।

न्यायाधीश हेमराज पन्तको एकल इजलासले जिल्ला प्रशासन कार्यालय बाँके, कारागार कार्यालय बाँके, बाल सुधारगृह डुडुवा, स्वास्थ्य कार्यालय बाँके र कार्यालयका प्रमुखका नाममा अन्तरिम आदेश जारी गरेको हो ।

बालसुधार गृह तथा कारागारमा रहेका थुनुवा कैदीको क्षमताभन्दा बढी संख्याको अवस्था, कारागार कार्यालय बाँकेमा रहेका एकजना थुनुवा र सुरक्षाकर्मी समेतलाई कोरोना संक्रमण भइसकेको अवस्थामा हुन सक्ने मानवीय क्षति समेतलाई मध्यनजर राखि सम्पूर्ण थुनुवा तथा कैदीबन्दीको तत्काल पीसीआर परीक्षण तथा अन्य स्वास्थ्य सम्बन्धी परीक्षण गराउन, कोरोना भाइरसको थप संक्रमण हुन बाट रोक्नको लागि सर्तकता व्यवस्था अवलम्वन गराउन, पक्राउ परेका व्यक्तिलाई अदालतमा उपस्थित गराउँदा र बालसुधार गृह एवं कारागार कार्यालय बाकेमा लैजानुपूर्व अनिवार्य रुपमा पीसीआर परीक्षण गर्नु गराउनु भनी कानून व्यवसायीहरुले रिट निवेदनमा अन्तरिम आदेशको माग दाबी गरेका थिए ।

प्रकाशित : श्रावण १२, २०७७ १६:५१
पूरा पढ्नुहोस्
प्रतिक्रिया
पठाउनुहोस्
×