कान्तिपुर वेबसाईट
AdvertisementAdvertisement

दीपाश्री विरुद्ध आरोप–प्रत्यारोप : सात संस्थाले निकाले संयुक्त वक्तव्य

कान्तिपुर संवाददाता

काठमाडौँ — अभिनेता राजेश हमालमाथि दिएको अभिव्यक्तिपछि दीपाश्री निरौलामाथि आएका आरोपप्रत्यारोप र गालीगलौजले पराकाष्ठा नाघेको भन्दै चलचित्रसँग सम्बन्धित सात संस्थाहरुले संयुक्त वक्तव्य जारी गरेका छन् ।

सामाजिक सञ्जालमा आएका यस किसिमका प्रतिक्रिया नरोकिएमा आफूहरु अब साइबर कानुन अनुसार कारबाहीको प्रकृया अगाडि बढाउने वक्तव्यमा उल्लेख छ ।

'वर्तमान सन्दर्भमा सामाजिक सञ्जालमा चलचित्रकर्मी लक्षित गालीगलौच र अश्लिल प्रतिक्रिया आएकोप्रति हामी संवेदनशील भएका छौं । यस किसिमका प्रतिक्रिया नरोकिए यो प्रतिक्रिया नेपालबाट आएको भए नेपालको साइबर कानुन अनुसार र विदेशबाट आएको भए परराष्ट्र मन्त्रालयमार्फत कारबाहीको प्रकृया अगाडि बढाउने पनि यही वक्तव्यमार्फत जानकारी गराउन चाहन्छौं,' वक्तव्यमा उल्लेख छ ।

चलचित्रसँग सम्बन्धित संस्थाहरु नेपाल चलचित्र संघ, नेपाल चलचित्र कलाकार संघ, नेपाल चलचित्र निर्माता संघ, नेपाल चलचित्र प्राविधिक संघ, नेपाल चलचित्र निर्देशक समाज, नेपाल चलचित्र द्वन्द्व संघ र नेपाल चलचित्र नृत्य संघले उक्त वक्तव्य जारी गरेको हो । कुनै अभिव्यक्तिको टिप्पणीलाई लिएर सिंगो चलचित्र जगत अफवाहपूर्ण कुतर्क र एकअर्काको मानमर्दन हुनु दु:खपूर्ण रहेको वक्तव्यमा उल्लेख गरिएको छ । आफ्नो स्वतन्त्रताको उपभोग गर्दा पेशागत मर्यादा, सामाजिक मर्यादा, आपसी भाइचारा, सदाचार र संयमतालाई समेत मध्यनवर राखी अभिव्यक्ति दिन पनि अनुरोध गरेको छ ।

वक्तव्यमा लेखिएको छ, 'सबैलाई अभिव्यक्ति स्वतन्त्रता संविधानले दिएको छ । अभिव्यक्त गर्न पाउनु व्यक्तिको अधिकार हो । अभिव्यक्ति स्वतन्त्रताको नाममा कसैको मानमर्दन गर्नु, अश्लिल आक्षेप लगाउनु, व्यक्तिगत चरित्र हत्या गर्नु, कसैको पनि अधिकार छैन ।'


प्रकाशित : असार २९, २०७७ १७:३४
प्रतिक्रिया
पठाउनुहोस्

एक महिनामा विदेशबाट १६७ वटा शव ल्याइयो

विदेशमा अलपत्र २७ हजार ५३२ नेपाली नेपाल फर्के 
सुरज कुँवर

काठमाडौँ — लकडाउनपछि सरकारले सुरु गरेको अलपत्र परेका नेपालीको उद्धार गर्ने क्रममा जेठ २८ देखि असार २८ सम्मको अवधिमा भएका चार्टर उडानबाट १ सय ६७ वटा नेपाली नागरिकको शव नेपाल ल्याइएको छ ।

छाउनीस्थित कोभिड–१९ सञ्चालन व्यवस्थापन केन्द्र (सीसीएमसी) का अनुसार यो एक महिनाको अवधिमा विदेशबाट नेपाली नागरिक फर्काउने क्रममा श्रम गन्तव्यबाट १ सय ६७ वटा शव पनि नेपाल ल्याइएको हो ।

यो अवधिमा २५ वटा मुलुकबाट करिब एक दर्जन वायुसेवाले १ सय ७५ वटा चार्टर उडान भएका थिए । ती चार्टर उडानले ८ वटा मध्यपूर्वी मुलुकबाट १ सय ६७ वटा नेपाली नागरिकहरुको शव ल्याएका थिए ।

यस अवधिमा साउदी अरबियाबाट ५९, मलेसियाबाट ४१, कतारबाट ४१, यूएईबाट १०, बहराइनबाट ६, कुवेतबाट ८, माल्दिभ्सबाट १ र ओमनबाट १ गरी १ सय ६७ वटा शव ल्याइएको हो ।

सीसीएमसीका सचिव महेन्द्र प्रसाद गुरागाईंका अनुसार अझै कतिपय श्रम मुलुकबाट शव ल्याउन बाँकी नै छ । उनले कोभिड–१९ बाहेक अन्य विभिन्‍न कारणले विदेशमा मृत्यु भएका नेपाली नागरिकहरुको शव यो अवधिमा नेपाल ल्याइएको कान्तिपुरसँग बताए ।

यो अवधिमा विभिन्‍न मुलुकमा अलपत्र परेका २७ हजार ५ सय ३२ नेपाली नागरिक नेपाल फर्केका छन् । जसमा प्रदेश १ का ५ हजार ६ सय ५५, प्रदेश २ का ४४ सय ८०, वाग्मती प्रदेशका ८ हजार ३९,गण्डकीका ३५ सय १८, प्रदेश ५ का ४५ सय ४९, कर्णालीका ६ सय १६ र सुदूरपश्चिम प्रदेशका ६ सय ७५ जना स्वदेश फर्किएका हुन् ।

प्रकाशित : असार २९, २०७७ १७:१०
पूरा पढ्नुहोस्
प्रतिक्रिया
पठाउनुहोस्
×