कान्तिपुर वेबसाईट
AdvertisementAdvertisement

ओस्कारले बोलायो ऋतिक र आलियालाई 

एजेन्सी

काठमाडौँ — बलिउड अभिनेता ऋतिक रोशन र अभिनेत्री आलिया भट्टलगायत केही भारतीय कलाकारलाई प्रतिष्ठित 'एकेडेमी अफ मोसन पिक्चर्स आर्ट एण्ड साइन्सेस' (ओस्कार) ले आबद्ध हुन आमन्त्रण गरेको छ । एकेडेमीले हालै आमन्त्रित कलाकारको सूची सार्वजनिक गरेको छ । 

यी कलाकारहरुले सदस्यता स्वीकार गरेमा यस वर्षको ९३ औं ओस्कार अवार्डमा भोटिङको अधिकार पाउनेछन् । आमन्त्रण गरिएका ८ सय १९ जनामा डिजाइनर नीता लुल्ला, डकुमेन्ट्री फिल्म मेकर निशा जैन र अमित मधेसिया, कास्टिङ डिरेक्टर नन्दिनी श्रीकांत र टेस जोसेफ, भिजुअल इफेक्ट सुपरभाइजर विशाल आनन्द र सन्दिप कमाल, फिल्म म्युजिक कम्पोजर नैनिता देसाई पनि छन् ।

फिल्ममेकर मिलाप झावेरीले ट्विट गर्दै ऋतिक र आलिया यसका लागि योग्य रहेको उल्लेख गरेका छन् । उनले लेखेका छन्, 'यी दुवै यसको लायक छन् । ऋतिक र आलिया दुवै एकदमै प्रतिभाशाली सुपरस्टार हुन् । एकेडेमीमा जोडिए त उनीहरुको सम्मान बढ्नेछ ।'

एकेडेमीको अध्यक्ष डेविड रुबिनले मंगलबार वक्तव्य जारी गर्दै लेखेका थिए, 'मोसन पिक्चर्स आर्ट र साइन्सेसमा यी सम्पूर्ण प्रतिष्ठित यात्रीहरुलाई स्वागत गर्न पाउँदा एकेडेमीलाई प्रसन्नता भइरहेको छ । हामीले सँधै असाधारण प्रतीभालाई समावेश गर्दै आएका छौं जसले हाम्रो विश्व फिल्म समुदायको समृद्ध विविधतालाई दर्शाउँछ ।'

यस वर्षको ओस्कार मिति फेब्रुअरी २८ लाई तय गरिएको थियो । तर, अधिकांश फिल्मको प्रदर्शन फिल्म हल बन्द भएसँगै परिवर्तन भएपछि यो अवार्ड २०२१ को अप्रिल २५ लाई सारिएको छ ।

प्रकाशित : असार १७, २०७७ १६:३९
प्रतिक्रिया
पठाउनुहोस्

कोरोना संक्रमितको संख्या १४ हजार नाघ्‍यो

कान्तिपुर संवाददाता

काठमाडौँ — नेपालमा कोरोना संक्रमितको संख्या १४ हजार नाघेको स्वास्थ्य तथा जनसंख्या मन्त्रालयले जनाएको छ । 

मन्त्रालयले आयोजना गरेको नियमित प्रेस ब्रिफिङमा प्रवक्ता डा. जागेश्‍वर गौतमले बुधबार थप ४ सय ८२ जनामा कोरोना संक्रमण देखिएको जनाए । उनले नयाँ ४ सय ८२ सहित संक्रमितको संख्या १४ हजार ४६ पुगेको बताए ।

२४ घन्टामा संक्रमित हुनेमा झापाका २१, सिरहाका २, सनुसरीका १, इलामका २, मोरङका ३, ताप्लेजुङका १, धनुषाका २१, महोत्तरीका ३६, पर्साका १, अछामका ६०, बझाङका १८, बाजुराका ७, गोरखाका २, कैलालीका २७, कञ्चनपुरका १०, पर्वतका १, काठमाडौंका १०, गोरखाका १, चितवनका १२, नवलपरासी पूर्वका ११ र बाराका १ जना रहेका छन् ।

त्यसैगरी भक्तपुरका २, ललितपुरका ५, डोटीका ७, अछामका ६६, बाजुराका १८, डोटीका ११, बागलुङका ३, स्याङ्जाका ९, तनहुँका १, कास्कीका ३, लमजुङका १०, अर्घाखाँचीका १, गुल्मीका ८, नवलपरासीका १, पाल्पाका २, बाँकेका ११, बर्दियाका ११, दैलेखका २, कालिकोटका २, सल्यानका १५, सुर्खेतका २२, दाङका २, बाजुराका १८, जुम्लाका १ र बतैडीका १ जनामा संक्रमण देखिएको छ ।

बुधबार थपिएका संक्रमितहरुमध्ये ११७ जना महिला र ३६५ जना पुरुष छन् । हालसम्म निको हुनेको ४ हजार ६ सय ५६ रहेको छ ।

मन्त्रालयका अनुसार बुधबारसम्म नेपालमा आरडीटी विधिबाट ३ लाख ६२० नमुना परीक्षण भएका छन् । पीसीआर विधिबाट भने हालसम्म २ लाख ३२ हजार २२७ परीक्षणहरु गरिएका छन् र २४ घन्टामा जम्मा ४ हजार ८८६ परीक्षण भएका छन् । हालसम्म क्वारेन्टाइनमा रहनेको संख्या ४८ हजार ३६२ जना रहेका छन् । त्यसैगरी आइसोलेसनमा रहनेको संख्या ९ हजार ३६० जना रहेको छ ।

नयाँ संक्रमितको प्रदेशगत विवरण

प्रदेश १ - २८

प्रदेश २ - ६२

वाग्मती - ३०

गण्डकी - ४१

प्रदेश ५ - ३६

कर्णाली - ४२


सुदूरपश्चिम - २४३

प्रकाशित : असार १७, २०७७ १६:३८
पूरा पढ्नुहोस्
प्रतिक्रिया
पठाउनुहोस्
×