कान्तिपुर वेबसाईट
AdvertisementAdvertisement
२४.१२°C काठमाडौं
काठमाडौंमा वायुको गुणस्तर: १३४

क्‍वारेन्टाइनमा के गर्दैछन् कलाकार ?

रीना मोक्तान

काठमाडौँ — अभिनेता विपिन कार्की अरुबेला फिल्ममै व्यस्त हुन्छन् । व्यस्त सेड्यूलबाट परिवारका लागि समय निकाल्न उनलाई हम्मेहम्मे पर्थ्‍यो । तर, सरकारले सबैलाई क्‍वारेन्टाइनमा बस्‍ने निर्देशन दिएसँगै विपिनले पनि परिवारका लागि समय पाएका छन् ।

क्‍वारेन्टाइनमा के गर्दैछन् कलाकार ?

गत मंसिरमा उनी छोरीकी बुबा बने । तर, फिल्मकै कारण छोरीसँग पनि समय बिताउन पाइरहेका थिएनन् । क्‍वारेन्टाइनमा बस्दा अहिले विपिन आफ्नो धेरै समय परिवारसँग नै बिताइरहेका छन् ।


‘धेरै त परिवारसँग समय बिताइरहेको छु । बेबीलाई समय दिन पाएको छु । अरुबेला फिल्ममै व्यस्त भइन्थ्यो,’ उनले सुनाए । क्‍वारेन्टाइनको समयमा कलाकारले आफ्नो समय विभिन्‍न फिल्म अनि किताब पढेर सदुपयोग गर्नुपर्ने उनको धारणा छ । ‘अब हामीले यो समयमा धेरै फिल्म अनि किताब पढ्न सक्छौं,’ उनले भने ।


अभिनेता दीपकराज गिरी ‘छक्कापञ्जा’का पटकथाकार पनि हुन् । क्‍वारेन्टाइनको समय उनी ‘छक्का पञ्‍जा ४’को स्क्रिप्ट सकाउने तयारीमा छन् । ‘के-के गर्ने यकिन योजना त छैन तर म ‘छक्का पञ्जा ४’को स्क्रप्टि बनाउन व्यस्तु हुन्छु,’ उनले सुनाए ।


दीपकले बिहान र बेलुका भने सामाजिक सञ्जालका लागि समय छुट्टाएका छन् ।

सञ्जालमार्फत दर्शकलाई जनचेतना फैलाउने किसिमको भुमिका निभाउने योजनामा छन् । बिहान घर नजिकैको चौरमा मर्निङ वाकमा पुग्छन् ।

क्‍वारेन्टाइनको यो खाली समयमा फिल्मकर्मीले आफूलाई सिर्जनशील बनाउनु पर्ने दीपक बताउँछन् । ‘सिर्जनशील काम गर्नेहरुले आफ्नो काममा ध्यान दिनुपर्‍यो । कतिको फिल्म टेबलमा रोकिएको छ, कति फिल्मको छायांकन रोकिएको छ । 'टेबलमा फिल्म रोकिएकाहरुले अब त्यसलाई थप कसरी राम्रो बनाउन सकिन्छ त्यतातिर ध्यान दिनुपर्‍यो,' दीपकले भने,'कतिले हतारमा फिल्मको छायांकन थालेको हुन्छ । हतारमा छायांकन थालेकोले अब यो समयमा कसरी बाँकी छायांकन राम्रो बनाउने हो त्यतातिर कसरत गर्नुपर्‍यो । अनि कतिको प्रदर्शन मिति धकेलिएको छ । उनीहरु अब फिल्मलाई कुन मितिमा ल्याउने, कसरी दर्शक आकर्षित गर्ने भन्नेतिर सोच्नुपर्‍यो ।'


कलाकारले योतिबेला आफ्नो स्वास्थ्यमा ध्यान दिनुपर्ने दीपक बताउँछन् । समाजसँग नजिक हुन पाउँदैनन् कलाकार । त्यसैले यो समयमा ‘सोसल रिलेसन’मा ध्यान दिन सक्ने उनले बताए ।


काम नहुँदा र सेल्फ क्‍वारेन्टाइनमा बस्दाको गतिविधिमा खासै फरक पाउँदिनन् अभिनेत्री सुरक्षा पन्त । तर यो खाली समयमा आफैलाई नियाल्नुको मज्जा बेग्लै रहेको उनी बताउँछिन् । ‘हामी केही न केही गरिरहेका हुन्छौं घरमा । बुझ्‍ने सिक्ने काम । तर आफैंलाई आइसोलेसनमा राखेर हेर्दा अर्कै अनुभव हुन्छ । अहिले समयमा सुत्‍ने र उठ्ने समय पाएको छु,’ उनी सुनाउँछिन् । त्यससँगै योगाको समय पनि बढेको सुरक्षा सुनाउँछिन् । पढ्न अल्छी लागेका किताबलाई पल्टाउने समय पाएकी छिन् सुरक्षाले ।


‘घरमा कति काम हुँदो रहेछ भन्ने थाहा भएको छ । फुर्सद नै नहुने । खानपिनमा पनि बढी ध्यान जाँदो रहेछ यस्तो बेला,’ सुरक्षा सुनाउँछिन्,‘आफ्नो क्षमता बढाउने समय पाएको छु । म पेन्टिङ गर्न रुचाउने मान्छे । तर पछिल्लो पटक बिर्सिनै सकेको थिएँ । अहिले फेरी सुरु गरेकी छु ।’ अल्छि लागेको समयमा नजिकैको डाँडामा ट्रेकिङमा जाँन्छिन्, विशेष त अहिले सरसफाईमा ध्यान जाने गरेको सुरक्षा बताउँछिन् ।


अभिनेत्री केकी अधिकारी कलाकारले यो समयलाई धेरै फिल्महरु हेरेर सदुपयोग गर्नसक्ने सल्लाह दिन्छिन् । ‘एक्टिङ सम्बन्धि किताब पढेर अनि युट्युबबाट एक्टिङ सिकेर यो समय सदुपयोग गर्न सक्छौं,केकी भन्छिन्’ सकारात्मक रहने कोसिस गर्नुपर्‍यो ।’ अहिले उनी एक्टर प्रिपियर्स भन्ने पुस्तक पढ्दै छिन् ।

प्रकाशित : चैत्र १०, २०७६ २२:०१
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?