दार्जिलिङमा पनि ‘हमजाएगा’- मनोरञ्जन - कान्तिपुर समाचार
कान्तिपुर वेबसाईट
AdvertisementAdvertisement

दार्जिलिङमा पनि ‘हमजाएगा’

मनोज बोगटी

दार्जिलिङ — नेपालमा सुरेन्द्र पुनले जुन नाममा चलचित्र निर्देशन गरेका थिए, त्यही नाममा दार्जिलिङमा पनि आदित्य रायाले चलचित्र निर्देशन गरेका छन्। चलचित्र हो -हमजाएगा। दुवै चलचित्रको मिल्ने कुरा के हो भने दुवै चलचित्र हमजाएगाको वायोपिक होइन। 

हमजाएगा कथा भन्‍न प्रयोग गरिएको चरित्र मात्र हुन् । आजका चलचित्र निर्माताहरूलाई चलचित्र बनाउन प्रेरित गर्ने हमजाएगा आफैंले पनि चलचित्रमा अभिनय गरिसकेका छन् । दार्जिलिङकै चलचित्र निर्देशक तुलसी घिमिरेले ७० वर्षीय हमजाएगालाई चलचित्र कुसुमे रुमाल-मा अभिनय गराएका थिए । अघिबाटै चलचित्र पुनर्जन्म बनाइसकेका आदित्य रायाको हमजाएगा दोस्रो चलचित्र हो ।

वैष्णवी प्रोडक्सनद्वारा निर्मित हमजाएगाको सुटिङ सन्दकपूर, टाइगरहिल र टंगलुमा गरिएको छ। अप्रिलमा दार्जिलिङमा यसको प्रिमियर सो हुने भएको छ। चलचित्रमा दार्जिलिङका नाट्य कलाकारहरू ललित गोले, हेमन्त गिरी, जीवन गुरूङ, देवराज शेर्पा अनि अरुण प्रकाश राईले अभिनय गरेका छन् ।


अन्य २५ कलाकारहरूसितै प्रमुख चरित्रमा आदर्श थामी, अञ्जली सुब्बा अनि आर्यन विशुंके पनि छन्। ‘दर्शकलाई हँसाउनैको निम्ति भनेर हामीले यो चलचित्र बनाएका होइनौं,’ निर्देशक आदित्य रायाले कान्तिपुरलाई भने, ‘सामान्य मानिसका संघर्षबारे बोल्ने पात्रकोरुपमा हमजाएगालाई चलचित्रमा उतारेका छौं।’


२०१८ को अक्टोबरदेखि हमजाएगाको सुटिङ भएको हो । सुटिङकै क्रममा कलाकार जीवन गुरुङ अनि क्यामेराम्यान विनय शंकर दुर्घटनामा परेपछि सुटिङ सक्न ढिलो भएको रायाले जनाएका छन् ।


हमजाएगा जोक्सको क्षेत्रमा अत्याधिक चर्चित नाम हुन् । हमजाएगाको वास्तविक नाम दलबहादुर गुरुङ हो । दार्जिलिङको चुङथुङमा जन्मिएका गुरुङ अमेरिकी सेना पनि थिए । सेनामा नै वाहन चलाउन सिकेका गुरुङले अवकासपछि दार्जिलिङमा नै पर्यटक घुमाउने काम गर्थे ।

हमजाएगा सुरुमा हाँस्य कलाकारको नाम थिएन । उनको नामसित जोडिएको एउटा रोचक किस्सा छ । टाइगर हिल घुम्‍न पर्यटक आएका थिए । उनले सोधे, ‘हु वान्ट्स टु गो ? ’ चालकहरूको भीडभाडबाट एउटा चहकिलो आवाज आयो, ‘हम जाएगा।’ त्यो आवाज तिनै दलबहादुर गुरुङको थियो । त्यसपछि सबैले उडाउँदै गुरुङलाई हमजाएका भन्न थालेको रायाले बताए।


त्यसपछि दलबहादुर गुरुङको नाम नै हमजाएगा बस्यो । वाहन चलाउँदै उनी यात्रीहरूलाई जोक्स सुनाउँथे । ती नै जोक्स विस्तारै लोकप्रिय बनेका हुन् । पछि हरेक कुनै जोक्समा पनि उनको नाम जोडिन थालेको हो ।


विजयकुमार राईले हमजाएगाका जोक्सहरूको किताब दार्जिलिङबाट नै प्रकाशित गरिसकेका छन् । ‘ती नै हमजाएकाका किस्साहरू जोडेर अब चलचित्र पनि बनाएका हौं,’ रायाले भने, ‘चलचित्रबाट फरक ढङ्गले सपना देख्ने साधरण मानिसको कथा भनेका छौं ।’

प्रकाशित : चैत्र २, २०७६ १४:३६
प्रतिक्रिया
पठाउनुहोस्

कोरोना संक्रमण रोक्न बंगालमा १५ दिन शैक्षिक संस्था बन्द

मनोज बोगटी

दार्जिलिङ — कोरोना भाइरसको फैलिँदो प्रकोप रोक्‍न पश्चिम बंगाल सरकारले १५ दिनसम्म सम्पूर्ण शैक्षिक संस्था बन्द गर्ने घोषणा गरेको छ ।



बंगालकी मुख्यमन्त्री ममता बनर्जीले सरकारी सूचना सार्वजनिक यही चैत ३ देखि १८ (१६ देखि ३१ मार्च) गतेसम्म सबै स्कुल, कलेज र विश्‍वविद्यालय बन्द गर्ने जानकारी दिएकी हुन् । बंगालमा स्‍नातक परीक्षा भने सञ्‍चालन भइरहने बताइएको छ।

भूटान सरकारले आफ्नो देशमा भारत सीमाबाट पैदल छिर्नेबाहेक सबै वाहनलाई प्रवेशमा रोक लगाएको छ । यता बंगाल सरकारले पनि भूटानसितका सबै सीमा बन्द गरेको छ ।

भूटान-बंगाल सीमा जयगाउँमा बंगाल प्रहरीले तैनाथ छ। अलिपुरद्वार पुलिस सूत्रले भुटानले अधिसूचना जारी गरेर सबै व्यापारिक गतिविधि र यात्रीहरूलाई रोक्न आग्रह गरेको थियो । बंगाल सरकारले राज्यमा भइरहेका सबै खेल प्रतियोगितालाई पनि १७ चैतसम्म स्थगित गरेको छ। सिक्किम र दार्जिलिङमा स्यानीटाइजरको अभाव चुलिएको छ । मास्कको अवस्था पनि उस्तै छ । पसलेहरूले स्टकका स्यानीटाइजर महँगो दाममा बेच्न थालेको गुनासो आइरहेको छ ।

प्रकाशित : चैत्र १, २०७६ १६:५०
पूरा पढ्नुहोस्
प्रतिक्रिया
पठाउनुहोस्
×