अमेरिकन आइडलमा दिवेशको तारिफ, केटी पेरीले भनिन्, 'तिमी रकस्टार हौ'

कान्तिपुर संवाददाता

काठमाडौँ — अमेरिकन आइडलको शीर्ष २० मा छनोट भएका नेपाली गायक दिवेश पोखरेलको अडिसन भिडियो सार्वजनिक भएको छ । अडिसन कोठाभित्र नमस्कार गर्दै प्रवेश गरेका दिवेशले आफ्नो गायकीबाट निर्णायकलाई मोहित पारेका छन् ।

अडिसनमा उनले बब डिलनको 'गर्ल फ्रम दि नर्थ कन्ट्री' गाएका थिए। उनको गायकी देखेर निर्णायक केटी पेरीले भनिन् 'हि इज दि बेस्ट'। उनले परिचय दिँदै गर्दा निर्णायकमध्यकी केटीले सोधिन् 'तिम्रो वास्तविक नाम के हो ?'

आर्थर गनको नाममा स्टेजमा गएका उनले आफ्नो नामको अर्थ प्रकाश भएको बताउँछन्। केटीले थप्छिन्, 'इट मिन्स दि बेस्ट'। उनको प्रस्तुतिपछि केटीको मुखबाट पनि यही निस्कियो 'हि इज दि बेस्ट। तिमी रकस्टार हौ'। निर्णायक लियोनल रिचीले अंकमाल गर्दै भने 'तिम्रो यात्रा कहाँ पुग्दै छ तिमीलाई पनि थाहा छैन'। गायक लुक ब्रायनले आइडलकै ठूला स्टार बताएको प्रोमो यसअघि सार्वजनिक थियो। अहिले दिवेशलाई नेपाली दर्शकले बधाई दिन थालेका छन्।

दिवेशको प्रस्तुति हेर्नुहोस्

प्रकाशित : फाल्गुन ५, २०७६ १३:१९

ADVERTISEMENT
प्रतिक्रिया
पठाउनुहोस्
ADVERTISEMENT

‘संघले अधिकार नदिँदा उपलब्धि कम’

कान्तिपुर संवाददाता

गण्डकी — मुख्यमन्त्री पृथ्वीसुब्बा गुरुङले मुलुक संघीयतामा गइसक्दा पनि अधिकांश अधिकार संघले नै राखेको बताएका छन् । प्रदेश सरकार गठन भएको आइतबार दुई वर्ष पुगेको अवसरमा आयोजित वार्षिकोत्सव कार्यक्रममा उनले संघले अधिकार नदिँदा प्रदेशले देखिने गरी काम गर्न नसकेको र उपलब्धि कम भएको बताएका हुन् ।

संघले जग्गाको भोगचलन र स्वामित्व हस्तान्तरण नगरेकाले बजेट खर्च पनि न्यून भएको र काम पनि देखाउन नसकिएको उनको भनाइ थियो । संघीयतासँगै फेरिएको व्यवस्थामा प्रदेश सरकार नयाँरहेकाले चुनौती पनि उत्तिकै रहेको उनले जनाए । ‘जनतालाई करमात्र बढायो भन्ने भ्रम फैलिएको छ, यो गलत हो,’ उनले भने, ‘सरकारले कर बढायो भन्नेहरू नै संघीयता विरोधी हुन् । संघीय शासन प्रणालीमा प्रदेशले शून्य तहबाट काम गरेको छ ।’ सरकारको एक वर्ष कार्यालय, कर्मचारी व्यवस्थापन र कानुन निर्माणमै बितेको उनले बताए ।

पछिल्लो एक वर्षमा भौतिक निर्माणमा जोड दिएकाले विकास निर्माणले गति लिएको उनको दाबी छ ।संघले आशीर्वाद मात्र दिए गण्डकीलाई पुग्ने भन्दै उनले काम गर्न गण्डकी प्रदेश सरकार सक्षम रहेकाले जनताको आवश्यकता र मागलाई सम्बोधन गर्दै गएको बताए । प्रदेश सरकार सुशासन, आर्थिक अनुशासन, विधि र प्रक्रियामा प्रतिबद्ध रहेको उनको भनाइ छ । ‘अहिले हामीसँग कर्मचारी छन्, अस्थायी भए पनि कार्यालय छन्, कानुन निर्माण गरिएको छ काम देखाउने बेला बल्ल आएको छ,’ उनले थपे, ‘प्रदेश लोकसेवा आयोग गठन गरेर पनि हामी कर्मचारी नियुक्ति गर्छौं र काम अवरोध हुन दिन्नौं ।’ गण्डकी पर्यटनको प्रचुर सम्भावना रहेको प्रदेश भएकाले पनि सरकारले पर्यटनमा बढी जोड दिएको बताए । उनले ढुंगा, गिट्टी र बालुवामा बढी ब्रह्मलुट रहेको बताउँदै यसलाई व्यवस्थापन गर्न तीनवटै सरकार समन्वय गरी अघि बढ्ने बताए । गण्डकी प्रदेश प्रमुख अमिक शेरचनले संघीयता कार्यान्वयन गर्न एकता आवश्यक रहेको बताए । ‘संघीयता साझा योग्दानबाट आएकाले सामुहिक रुपमा जोगाउन जरुरी छ,’ उनले भने ।

कार्यक्रममा मुख्यमन्त्री तथा मन्त्रिपरिषद् कार्यालयका कानुन सचिव दलबहादुर अधिकारी सर्वोत्कृष्ट कर्मचारीका रुपमा १ लाख नगदसहित पुरस्कृत भएको जानकारी गराइयो । यसैगरी ७५ हजार पुरस्कार राशिसहित औषधि आपूर्ति व्यवस्थापन केन्द्र प्रमुख खिमबहादुर खड्का पुरस्कृत भए । अन्य २७ कर्मचारीलाई ५० हजार र ७ जनालाई जनही २५ हजार रुपैयाँको पुरस्कार घोषणा गरियो ।

प्रकाशित : फाल्गुन ५, २०७६ १२:५१
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×