‘नीरफूल’को गीतमा महिला हिंसा 

कान्तिपुर संवाददाता

काठमाडौँ — भ्यालेन्टाइन डेको अवसर पारेर फिल्म ‘नीरफूल’ मा समेटिएको गीत ‘तिमी बदनामी बदनामी’ सार्वजनिक गरिएको छ । दुर्गा खरेलको स्वर, अर्जुन पोखरेलको संगीत र फिल्म निर्देशक फूलमान वलको शब्द रहेको गीतको भिडियोसहित हाइलाइट्स नेपालमार्फत सार्वजनिक गरिएको हो ।

गीतमा अभिनेत्री रेखा थापा बार सिंगरको रुपमा देखिन्छिन् । उनले गाउँदै गर्दा बारमा महिला हिंसाका अनेक हर्कतहरु हुन्छन् । भिडियोमा पात्रको संघर्ष र उनीमाथि हुने हिंसाको सिलसिला प्रस्तुत गर्न खोजेको देखिन्छ ।


निर्देशक वलले गीतलाई ‘फिल्म चलाउने मसलाको रुपमा नभई फिल्मकै थिम अनुरुप स्वभाविक लयमा छायांकन गरिएको’ दाबी गरे ।


२०७२ को महाभूकम्पमा विछोडिएको परिवारले पुर्नमिलनको लागि गर्ने संघर्ष आधारित फिल्मको पटकथा सचिन घिमिरे र निर्देशक वलले लेखेका हुन् । सचिन एसाेसिएट निर्देशकको रुपमा पनि छन् ।


फ्रेन्डस् अफ नेपाल–म्यान्मार फ्रेन्डसिप काउन्सिलसितको सहकार्यमा सेलो प्रोडक्सनले निर्माण गरेको फिल्मको कार्यकारी निर्माता भने दुबईकी सोनाम डोमा हुन् । प्रमोद कार्कीको छायांकन, अर्जुन पोखरेल र चन्द्रकुमार दोङको संगीत रहेको फिल्मको सम्पादन निमेष श्रेष्ठ र वितरक गोविन्द शाही र मनोज राठी रहेका छन् । भिडियोको कोरियोग्राफी भने राजेन्द्र राजवाहकले गरेका छन् ।


‘नीरफूल’ यही फागुन ३० गते रिलिज हुँदैछ ।

प्रकाशित : फाल्गुन २, २०७६ २१:४५
प्रतिक्रिया
पठाउनुहोस्

परिक्रमा ब्यान्डका लिड गिटारिस्ट सोनाम शेर्पाको निधन

मनोज बोगटी

दार्जिलङ — भारतीय लोकप्रिय रक एन्ड रोल ब्यान्ड परिक्रमाका प्रमुख गिटारिस्ट सोनाम शेर्पाको निधन भएको छ । शेर्पा दिल्लीबाट दार्जिलिङकाे खरसाङमा चलचित्रको गीत रेकर्ड गर्न आएका थिए । खरसाङमा नै अचानक कार्डियक एरेस्टको कारण उनको निधन भएको हो ।

१७ जून १९९१ मा दिल्लीमा सुबिर मलिक, नितिन मलिक, प्रशान्त बहादुर, चिन्तन कारा र राहुल मल्होत्रासँग मिलेर शेर्पाले परिक्रममा ब्यान्ड बनाएका थिए । परिक्रमा भारतको चर्चित ब्यान्ड हो, सोनाम यसै ब्यान्डका लिड गिटारिस्टको रुपमा चिनिन्थे ।

परिक्रमलाई धेरै हिट गीत दिने ब्यान्डका रुपमा पनि चिनिन्छ । बट इट रेन्ड, टियर्स अफ दी विजार्ड तथा आइ एम ड्रिमिङजस्ता हिट गीतको कम्पोज गर्ने ४८ वर्षीय सोनामको देहान्तको खबर फैलिने बित्तिकै भारतको स‌ंगीत क्षेत्रका हस्तीहरूले शोक प्रकट गरेका छन् ।

सोनाम ८ अक्टोबर १९७१ मा कालेबुङमा जन्मिएका हुन् । ९ वर्षको छँदै उनी गिटार बजाउन खप्पिस थिए । कालेबुङबाट प्रारम्भिक शिक्षा लिएका शेर्पा स्नातक गर्न दिल्ली गएका थिए । उनले बलिउड फिल्म मन्जुनाथमा संगीतसमेत दिइसकेका छन् । उनी दिल्लीमा परिक्रममा संगीत स्कूल चलाइरहेका थिए ।

‘सोनामलाई हृदयसम्बन्धी कुनै रोग थिएन,’ परिक्रमाका गायक नितिन मलिकले दुखद खबर सुनेपछि भने, ‘सुनेर हामी शोकित बनेका छौं । सोनाम आफै स्वास्थ्यबारे धेरै सचेत थिए । भर्खरै व्यायामसमेत थालेका थिए । शरीर घटाउँदै थिए ।’

सोनामको निधनको खबर सुनेपछि भारतका चर्चित गिटारवादक इशान नुरानीले पनि शोक व्यक्त गरेका छन् । उनले ट्वीट गर्दै भनेका छन्, ‘सोनाम सुन्दर गिटारिस्ट थिए, उनी अनन्तमा विलिन भएका छन्, उनीसितका पलहरूलाई याद राख्नेछौं ।’


विशाल दद्लानीकाे ट्वीट
रोलिङ स्टोन्स पत्रिकाले दश भारतका टप गिटारिस्टको सूची सार्वजनिक गरेको थियो, त्यसमा सोनाम पनि एक थिए । सोनाम युवा उद्यमीहरूको कार्यक्रम सीएनबीसीको शोका हिस्सासमेत थिए । बीबीसीसमेतले सोनामको ‘डकुमेन्ट्री’ बनाइसकेको छ ।

प्रकाशित : फाल्गुन २, २०७६ २१:०२
पूरा पढ्नुहोस्
प्रतिक्रिया
पठाउनुहोस्
×