सुटिङ सेटबाट सिधै अस्पताल भर्ना भए ऋषि कपुर 

भाइरल ज्वरो आएपछि उनलाई मुम्बई अस्पताल सारिएको हो । 'डराउनु पर्ने अवस्था छैन । यो भाइरल ज्वरो हो,' अस्पताल स्रोतले बतायो । कपुर परिवारले भने उनको स्वाथ्यबारे केही जानकारी दिएको छैन ।

फिल्म 'शर्माजी नम्किन'को छायांकन रोकेर उनी उपचारका लागि मुम्बई फर्केका हुन् । यसरी अचानक अस्पताल भर्ना भएपछि कतिले उनको अवस्था नाजुक रहेको आँकलन गर्न थालेका छन् । कलाकार ऋषि आफैं भने त्यस्तो आँकलन नगर्न अनुरोध गर्छन् ।

यसअघि कलाकार कपुर बोन म्यारो क्यान्सरको उपचारका लागि १ वर्ष अमेरिका बसेका थिए ।

छायांकनकै क्रममा संक्रमण भएपछि मुम्बई फर्केको सामाजिक सञ्जाल ट्विटर मार्फत् ऋषिले जनाएका छन् । उनले लेखेका छन् 'म विगत १८ गतेदेखि फिल्मको छायांकनमा थिएँ । वातावरणको कारण मलाई संक्रमण भयो, त्यसैले अस्पताल भर्ना हुनुपर्‍यो ।'