अनमोलको ‘एन्टी-हिरो’मा जसिता अनुबन्ध तर फिल्म बन्छ कहिले ?

कान्तिपुर संवाददाता

काठमाडौँ — अनमोल केसीले हरेक फिल्ममा नयाँ हिरोइनसँग रोमान्स गर्दै आएका छन् । डेब्यु फिल्म ‘होस्टेल’मा प्रकृति श्रेष्ठदेखि पछिल्लो फिल्म ‘ए मेरो हजुर ३’ मा सुहाना थापासम्म । होमप्रोडक्सनको ‘एन्टी हिरो’मा भने दुई फिल्म खेलिसकेकी जसिता गुरुङ अनुबन्ध भएकी छन् । जसिता यसअघि ‘लिलीबिली’ र ‘लभ स्टेशन’ मा देखिएकी थिइन् ।

ZenTravel


‘लिलीबिली’मा जसिताको उपस्थिति सुखद भए पनि ‘लभ स्टेशन’मा उनको अभिनय तारिफयोग्य थिएन। व्यापार पनि नाजुक रह्यो तर उनलाई फिल्म खेलाउन चाहने निर्माता/निर्देशकको कमी छैन। त्यस्तैमध्ये एक थिए, भुवन केसी। उनले पहिल्यै जसितालाई अनुबन्ध गर्न खोजेका थिए तर रेनेशा राईको ‘आई एम ट्वान्टी वान’मा उनी व्यस्त हुने खबरसँगै भुवन पछि हटे।

जसिताको विकल्पमा आँचल शर्मा वा स्वस्तिमा खड्का लिने तयारी गरियो। तर, पूर्वघोषित समयमा ‘आई एम ट्वान्टी वान’ नबन्ने भयो। यही मौकामा भुवनले ‘एन्टी हिरो’मा जसितालाई भित्र्याएका हुन्। लामो कसरतपछि जसिताको प्रवेश त भएको छ तर यो फिल्म पनि कहिले बन्छ, त्यसको टुंगो भने छैन। वैशाखबाट सुटिङ सुरु गर्ने निर्माणपक्षको दाबी पत्याउन मुस्किल पर्छ। किनभने, फागुनको मध्यबाट अनमोल ‘ए मेरो हजुर ४’को छायाँकनमा व्यस्त हुनेछन्। यसको सुटिङका लागि दुई महिना त लागिहाल्छ, लगत्तै ‘एन्टी–हिरो’का लागि अनमोल तयार होलान्?

फिल्म जहिले बने पनि तत्कालका लागि जसिताको अनुबन्धले भुवनलाई राहत मिल्नेछ। उनले ‘एन्टी हिरो’को ओभरसिज राइट बेचिसकेका थिए। काठमाडौं र मोफसल रिलिजका लागि वितरकबाट पैसा लिइसके। त्यतिबेला ‘ए मेरो हजुर ४’ को कुरै आएको थिएन। भुवनको वाचा थियो– तिहारपछि छाँयाकन सुरु गर्ने। तर, तिहार सकिएको अढाई महिना बितिसक्दा पनि कुनै सुरसार भएन। त्यसमाथि ‘ए मेरो हजुर ४’ आयो, त्यसैले भुवनमाथि दबाब बढेको थियो। तर जसिताको आगमनले वितरकलाई मन बुझाउने बहाना बन्न सक्छ।

यहीबीच अनुबन्ध भएर पनि ‘धुपौरे’बाट अनमोल अलगिए। अब माधव वाग्लेको फिल्ममा उनी खेल्ने सम्भावना पनि असाध्यै न्यून रहेको बताइन्छ।

प्रकाशित : माघ ९, २०७६ १५:११
प्रतिक्रिया
पठाउनुहोस्

जयपुर साहित्य महोत्सवमा अश्विन सांघीको ‘द भल्ट अफ् विष्णु’ सार्वजनिक

कान्तिपुर संवाददाता

काठमाडौँ — भारतीय उपन्यासकार अश्विन सांघीको नयाँ पुस्तक ‘द भल्ट अफ् विष्णु’ सार्वजनिक भएको छ । जयपुर साहित्य महोत्सव–२०२० को पहिलो दिन सांघीको पुस्तक विमोचन भएको हो । भारतीय अभिनेत्री तथा लेखिका सोनाली बेन्द्रेले सांघीको पुस्तक विमोचन गरेकी हुन् ।

वेस्टल्यान्ड बुक्सद्वारा प्रकाशित ‘द भल्ट अफ् विष्णु’ अश्विन सांघीको प्रसिद्ध पौराणिक ‘भारत शृङ्खला’अन्तर्गतको छैटौँ पुस्तक हो। पुस्तकमा तीन यात्रीको कथा प्रस्तुत गरिएको छ, जो उत्तरको खोजीमा एक प्राचीन व्यापारमार्गको यात्रामा निस्केका हुन्छन्। सांघीका अधिकांश पुस्तक पौराणिक कथामा आधारिक छन्। भारत शृङ्खलाअन्तर्गत ‘द रोजबल लाइन’, ‘चाणक्य च्यान्ट’, ‘द कृष्णा की’ ‘द सियालकोट सागा’, ‘कालचक्र’ पछि ‘द वल्ट अफ् विष्णु’ बजारमा आएको हो।

आफ्नो नयाँ पुस्तकको बारेमा जानकारी दिँदै सांघीले भने, ‘द वल्ट अफ् विष्णु’ मेरो सबैभन्दा महत्वाकांक्षी पुस्तक हो। यी दुई महान सभ्यता भारतदेखि चीनसम्म फैलिएको छ। मेरो विचारमा असल पुस्तक त्यो हो, जुन पुस्तकको पाना सहजै पल्टाउन सकिन्छ। आफ्ना पाठकलाई मनोरञ्जनात्मक कथा प्रस्तुत गर्न म सफल भएको जस्तो लाग्छ।’

अश्विन सांघी भारतमा सबैभन्दा बढी पढिने अंग्रेजीमा लेख्ने लेखक हुन्। उनले यल विश्वविद्यालयबाट बिजनेस म्यानेजमेन्टमा मास्टर्स गरेका छन्।

बिहीबारबाट सुरु भएको जयपुर साहित्य महोत्सव सोमबारसम्म जारी रहनेछ। बिहीबार प्रसिद्ध लेखक बेलायती गणितज्ञ मार्कस दू सौतोवको ‘किनोट स्पिच’बाट ‘विचारको म्याराथन’ मानिने जयपुर साहित्य महोत्सवको १३औं संस्करण सुरु भएको हो।

यस पटक जयपुर साहित्य महोत्वसमा नोबेल पुरस्कार विजेता अर्थशास्त्री अभिजित बनर्जी, म्यान बुकर विजेता लेखक होवार्ड जेकोब्सन, पुलित्जर विजेता अमेरिकी इतिहासकार स्टिफन ग्रीनब्लाट, म्यागसेसे विजेता भारतीय पत्रकार रवीश कुमारलगायतका चर्चित व्यक्ति रहेका छन्।

प्रकाशित : माघ ९, २०७६ १५:०४
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×