“म भुइँमान्छे हुँ”- मनोरञ्जन - कान्तिपुर समाचार
कान्तिपुर वेबसाईट
AdvertisementAdvertisement

“म भुइँमान्छे हुँ”

सुशील पौडेल

काठमाडौँ — भनिन्छ, फिल्महरू कि क्लास (विशिष्ट दर्शक) का लागि कि मास (आमदर्शक) का लागि बनाइन्छन् । प्रायः व्यावसायिक फिल्म मास अडियन्सको स्वादलाई ध्यानमा राखेर बनाइन्छ । क्लासका लागि बन्ने फिल्मलाई अलग धारका वा आर्ट फिल्म पनि भन्ने गरिन्छ । माघ २४ देखि प्रदर्शनमा आउन लागेको फिल्म ‘सेल्फी किङ’ मझधारबाट हिँड्न खोजेको छ ।

टेलिभिजनको पर्दामा ‘सेल्फी किङ’ को उपनामले परिचित गोपाल दाहाल नामको एक कमेडियनमाथि फिल्म बनाएका हुन्,


विशाल सापकोटाले । जुन चरित्रको बागडोर सम्हाल्ने जिम्मा अभिनेता विपिन कार्कीले पाएका छन् ।


अमेरिकामा फिल्म अध्ययन गरिरहेका सापकोटालाई फिल्म निर्देशन गर्ने ठूलो हुटहुटी थियो । उनी प्रायः कमर्सियल एक्सन फिल्मका स्क्रिप्ट लेखिरहन्थे । लेखिसकेपछि निर्देशक दिनेश राउतसँग सल्लाह गर्थे । ‘तर उहाँ (राउत) ले मलाई फस्ट फिल्म अफबिटको बनाऊ, कमर्सियल नबनाऊ भनेर सल्लाह दिनुहुन्थ्यो । ‘सेल्फी किङ’ को आइडिया सुनाएपछि त उहाँ कन्भिन्स्ड मात्रै हुनुभएन, आफैंले पैसा हालेर फिल्म बनाउन तयार हुनुभयो,’ निर्देशनमा डेब्यु गर्न लागेका सापकोटाले अन्ततः भर्खरै मात्र ‘प्रसाद’ बाट सफलता चाखेका निर्देशक राउतको परिचय नै बदलिदिए, निर्माताका रूपमा ।


फिल्ममा एउटा हास्य कलाकारको पारिवारिक र व्यावसायिक सम्बन्धबीच आउने द्वन्द्वको कथा त छ नै, साथै यसमा त्यो चरित्रको तीनदिने एउटा यात्रा–संस्मरण पनि हो भन्छन्, सापकोटा । फिल्मको स्क्रिप्ट पनि उनैले लेखेका हुन् । भन्छन्, ‘टेलिभिजनमा परिचित गोपाल दाहाल नामको हास्य कलाकारको त्यो तीन दिनलाई दर्शकले सूक्ष्म तरिकाले हेर्न पाउनुहुन्छ । उसले कसरी सोच्छ ? समकालीनलाई हेर्ने उसको नजर, फ्यानलाई हेर्ने तरिकालाई फिल्ममा मिहिन रूपमा केलाउन खोजिएको छ । ‘सेल्फी किङ’ गोपाल दाहालको पोट्रेट हो ।’


पहिलो फिल्मको सफलता र असफलतालाई लिएर सापकोटालाई ठूलो चुनौती छ यतिबेला । ‘च्यालेन्ज छ तर डर छैन,’ निर्देशक सापकोटाले कान्तिपुरसँगको कुराकानीमा भने, ‘जे बनाउन भनेर हामी लागेका हौं, त्यसलाई दर्शकलाई रुचि लाग्ने तवरले भन्यौं कि भनेनौं भन्ने च्यालेन्ज छ तर फिल्म राम्रो बनेको छ भने सफल भइन्छ, नत्र असफल । त्यसैले डराएर फाइदा पनि छैन ।’


विपिन अहिलेका भर्सटाइल एक्टर हुन् । उनी पर्दामा चरित्र जिउन माहिर छन् । त्यसैले पनि उनी र उनका फिल्मप्रति दर्शकको पहिल्यै एकखाले भरोसा रहन्छ । ‘यही कुराले पनि मलाई सधैं अब कस्तो फिल्म गर्ने होला भन्ने परिरहन्छ,’ अभिनेता कार्कीले सुनाए, ‘यसको पनि ‘प्रसाद’ कै सुटिङताका दिनेशजीले सुनाउनुभएको थियो । यो टिमले गर्ने फिल्ममा मेरो पनि विश्वास थियो । पछि स्क्रिप्ट पढेपछि यत्तिको फिल्म गर्दा दर्शकले गाली नै चाहिँ गर्नुहुन्न भन्ने लाग्यो । म आफैंले पनि चरित्रमार्फत उकास्न सक्छु भन्ने कन्फिडेन्ट भएपछि खेल्न राजी भएँ । स्क्रिप्टमा एकखाले पकड पहिल्यै थियो ।’


तर यतिबेला विपिनको लुक्सले पनि कतिपयलाई हलिउड फिल्म ‘जोकर’ जस्तै त हैन भनेर झस्काइदिएको छ । स्क्रिप्ट पढ्दा विपिनलाई पनि यस्तै लागेको थियो रे । ‘मैले निर्देशकलाई सोधेको पनि थिएँ । तर पछि के कुरामा विश्वस्त भएँ भने आखिर संसारभरिका कलाकारका कुरा त लगभग उस्तै नै हुन् । समाज, चरित्र र पात्र त जहाँका भए पनि उही नै त हो । तर ठानिएको कुरा र पछि देखिने कुरामा धेरै फरक लाग्नेछ ।’ उनले आफू ‘सेल्फी किङ’ मा चंखेको चरित्रमा भएकाले मेकअप गर्दा ‘जोकर’ लाग्नु स्वाभाविक पनि मान्छन् । ‘तर हामीले मेकअपलाई एउटा व्यंग्यात्मक रूपमा पनि प्रस्तुत गर्न चाहेका हौं । दर्शकलाई हँसाउनका नाममा झिलीमिली कपडा र पूरै अनुहार मेकअपले पोतेर विचित्र देखिन र जबरजस्ती हँसाउनका लागि त्यो चरित्रले यो सबै गरेको हो । मेकअपले उक्त चरित्रको व्यक्तिगत पीडालाई दर्शकबाट छोप्न पनि सघाउँछ ।’


विपिनले ‘जोकर’ लागिरहेकाका लागि अहिल्यै स्पष्टीकरण दिइरहन आवश्यक ठान्दैनन् । ‘एउटा जोकर पात्र मात्रै मिल्न गएको हो । जब कि हामी ‘जोकर’ आउनुअघि नै सुटिङमा थियौं । ‘जोकर’ मलाई पनि राम्रो लागेको फिल्म हो । त्यस्तो फिल्मसँग हाम्रो तुलना हुँदा कलाकारका नाताले त मलाई एक हिसाबले खुसी पनि लागेको छ,’ विपिनले थपे । फिल्ममा एउटा संवादमा सेलिब्रेटीलाई क्षणिकतामा दाँजिएको छ । विपिन भने क्षणिकताको वाहवाहीमा बाँच्न चाहँदैनन् । रंगमञ्चदेखि अभिनयको लामो यात्रा तय गरिसकेका उनी भन्छन्, ‘म जहिल्यै काममा मात्रै आफूलाई केन्द्रित गर्न चाहन्छु । हो, मैले हिजो राम्रै काम नगरेको भए आज चिनिने पनि थिइनँ । कामले नै चिनिएको हुँ । कामलाई नै प्राथमिकतामा राख्छु । योभन्दा अझै राम्रो काम गरूँ, सफलता कमाऔं भन्ने त कुन कलाकारले चाहँदैन होला र ? तर म जति ठूलो सर्कलमा चिनिए पनि मेरो आदत फेरिँदैन । म भुइँमान्छे नै हुँ । यस्तैमा रहनुमा नै मलाई आनन्द लाग्छ ।’


संयोग, विपिनले निर्वाह गरेका चरित्र पनि उनीजस्तै भुइँमान्छे नै छन् । तर कलाकारका रूपमा भने उनलाई सधैं भुइँमान्छेकै मात्र भूमिकामा खेलौं भन्नेचाहिं लाग्दैन रे । ‘म जे भूमिका गर्न आफूलाई चुनौती हुन्छजस्तो लाग्छ, त्यस्तैमा खेल्न बढी रुचाउँछु । पूर्वनिर्धारित मान्यतालाई गलत सावित गर्न सकें भने न म आफूलाई अझ सशक्त कलाकार प्रमाणित गर्न सक्छु ।’

प्रकाशित : माघ ८, २०७६ ०९:५२
प्रतिक्रिया
पठाउनुहोस्

दबंग शैली

आफ्नो चरित्रमा यु–टर्न मार्न सफल सलमान खानले पछिल्लो दशक पात्रको चरित्रमा भने दबंग शैली समातेका छन् । पर्दामा गुन्डावाला पुलिसको दादागिरी देखाउनमा बढी रमाएका छन् ।
सुशील पौडेल

डेढ दशक अघिसम्मका सलमान खान आजका जस्ता थिएनन्  । अभिनेत्री ऐश्वर्या रायसँगको प्रेम सम्बन्धले वियोगान्तको मोड लिएपछि उनी उग्र बने  ।

ऐशलाई सुटिङ सेटमा नै आएर हातपात गर्नेदेखि पछि उनीसँग जोडिने अन्य प्रेमीको पनि दुहाई गरे । कतिका करिअर नै चौपट पार्न कम्मर कसेर लागे । त्यसताक सलमानलाई ‘ब्याड ब्वाई’ कै उपनाम पनि दिइन्थ्यो । तर फिल्म भने हम दिल चुके सनम, तेरे नाम, मुझ से सादी करोगे जस्ता प्रेमिल गर्थे । तीनै फिल्मबाट दर्शकको दिलमा राज पनि गरिरहेका थिए ।
तर समय बदलियो । सलमान सुध्रिए । हिट एन्ड रन केस होस् वा कालो हरिण मारेको अभियोगमा मुद्दाले टाउको खान थाल्यो, तब सलमानले विस्तारै आफ्नो छवि सुधार्नतर्फ लागे । यतिबेला सलमान बलिउडकर्मीका लागि देवदूत जस्तो बनेर हरपल सहयोगमा जुट्छन् । अझ महिला, युवतीका लागि त उनी जस्ता असल प्राणी विरलै कोही होलान् । यतिबेला उनी सबैका प्रिय अभिनेता बनिरहेका छन् ।
आफ्नो चरित्रमा यु–टर्न मार्न सफल सलमान पछिल्लो दशक पात्रको चरित्रमा भने दबंग शैली समातेका छन् । पर्दामा गुन्डावाला पुलिसको दादागिरी देखाउनमा बढी रमाएका छन् । आफ्नी प्रेमिकालाई अप्ठ्यारोमा पार्ने गुन्डालाई बर्दीमै भए पनि सुटआउट गरिदिन्छन् ।
शुक्रबारदेखि सलमान दबंग ३ मार्फत पुनः चुलबुल पाण्डे बनेर फर्किएका छन् । अविनाश कश्यपले नौ वर्षअघि ल्याएको दबंगले सलमानलाई वान्टेडपछि लगातार तीन फिल्मको फ्लप यात्रालाई तोडिदिएको थियो । दुई वर्षपछि अरबाज खानको निर्देशन यसको सिक्वेलमा आए । फिल्म ठीकठाक मात्रै थियो तर व्यावसायिक रूपमा सलमानले राम्रै छलाङ मारे ।
सलमान बलिउडका ठूला स्टार त हुन् तर उनलाई सधैं ढंगले नाच्न र अभिनय गर्न नजान्ने अभिनेताको आरोप लागिरहन्छ । अब त समीक्षकहरू उनका फिल्मको समीक्षा गर्नु नै बेकार हो भन्न थालिसकेका छन् । फेरि एकपटक सलमानले दबंग ३ ल्याएर समीक्षकलाई बेकारको काम थपिदिएका छन् । यसपटक दबंग ३ मा उनले खेलेका मात्रै छैनन्, कथादेखि पटकथासमेत आफैंले तयार पारिदिए । फिल्म निर्माणको तौर–तरिका हेर्दा लाग्छ, सलमानबाट दबंग ३ बाट राम्रो फिल्म बनाउनमा भन्दा पनि धेरै पैसा कमाउनमा उद्यत देखिन्छन् ।
सलमानका प्रायः फिल्ममा उनको उपस्थिति नै अह्म रहन्छ । भूमिका र चरित्रमा उनले खास ठूलो मिहिनेत नगर्दा पनि फिल्मले व्यावसायिक सफलता हात पारिरहेकै हुन्छन् । विषयवस्तु पनि त्यति उम्दा नहुँदा पनि चल्छ । सायद यही चुरो कुरो सलमानले पनि थाहा पाए होलान् र दबंग ३ मा आफैं पटकथा लेख्न कस्सिए । गीत र फाइट सिनका लागि परिस्थितिको जोरजाम गरेपछि त्यसलाई सूत्रबद्ध शैलीमा ढाल्न सन् १९८८ देखि फिल्म खेल्दै र भोग्दै आएका सलमानका लागि नौलो थिएन । उनले दबंग ३ लाई ८० र ९० को दशकदेखि चल्दै आएको बलिउड फर्मूलामा हल गरिदिए ।
तर अब बलिउड चेपुवामा परिसकेको छ । सूत्रबद्ध र फाइट दृश्यका फिल्मका लागि दर्शकले बलिउड फिल्मभन्दा दक्षिण भारतीय फिल्म रुचाउन थालिसके भने विषयपरक फिल्मको लहर बोकेर आयुष्मान खुराना, राजकुमार राव, नवाजुद्दिन सिद्दिकीदेखि महिलाप्रधान फिल्मबाट अभिनेत्रीहरू फ्रन्टलाइनमा उभिसके । अब यस्तोमा सलमान खान वा शाहरुख खान जस्ता ठूलो जमातका दर्शकको ढुकढुकी बनेर लामो वर्षदेखि जागिरहेका अभिनेताले दबंग ३ ल्याउनु अब समीक्षकको लागिमात्रै बेकार हैन, दर्शक पनि अघाउन थालिसके । पात्रको चरित्रमा पनि सलमानको यु–टर्न मात्र जरुरी छ । जीउ देखाएरै भिलेनसँग निहुँ खोजेकै भरमा अब टिकिरहन गाह्रो हुन सक्छ ।
दबंग ३ कै कुरा गर्दा पनि, फिल्ममा सलमान हिरो भए पनि चर्चा र वाहवाही भिलेनको चरित्रमा देखिएका सुदीप सन्दीप (किच्चा) ले बटुलेका छन् । कारण, सलमानभन्दा उनी बढी चरित्रमा आफूलाई फिट देखिएका छन् । फिल्ममै पनि आफ्नो चरित्रका कारणभन्दा सलमान नै देखिएर बढी दर्शक सिट्टी पाउने सलमानले दबंग ३ लाई चुलबुल पाण्डेको चरित्र निर्माणको घेराबाट देखाउन खोजेका छन् । उनकै फ्यान पनि चुलबुल पाण्डे कसरी दबंग बन्यो भन्ने हेर्नमा भन्दा सलमानले कसरी पर्दामा दबंग शैली पस्कन्छन् भन्ने हेर्न चाहन्छन् । उनीहरूकै लागि पनि दबंग ३ को लामा–लामा फ्ल्यासब्याकले नीरस बनाउन सक्छ ।

प्रकाशित : पुस ११, २०७६ १०:३२
पूरा पढ्नुहोस्
प्रतिक्रिया
पठाउनुहोस्
×