प्रेमी देवांशसँग साम्राज्ञीको अनस्क्रिन रोमान्स
काठमाडौँ — अभिनेत्री साम्राज्ञी राज्यलक्ष्मी शाह प्रेमी देवांश राणासँग म्युजिक भिडियो गर्दैछिन् । सामाजिक सञ्जाल इन्स्टाग्राममा भिडियोको 'फस्टलुक' भन्दै उनले प्रेमी देवांशसँग खिचेको एक तस्बिर सार्वजनिक गरेकी छिन् । तस्बिरको क्याप्सनमा लेखेकी छिन्, 'हामी अनस्क्रिन जोडी भएर भिडियोमा देखिँदै छौं' ।
प्रेमी देवांशसँग 'बाली'को बिचमा खिचिएको तस्बिरपछि साम्राज्ञी प्रेम सम्बन्धमा खुल्न थालेकी छिन् । केहि महिनाअघि प्रेमी देवांशसँग उनी वीरगञ्जमा भएको एक कार्यक्रममा हात समाउँदै प्रस्तुत भएकी थिइन् । अब यो जोडी म्युजिक भिडियोमा पनि देखिँदैछिन् ।
'बाली'को तस्बिर हेरिसकेका दर्शकका लागि यी दुईको अनस्क्रिन रोमान्स खासै नौलो विषय भने होइन । साम्राज्ञीको हातमा अहिले कुनै फिल्म छैन । पछिल्लो समय 'कायरा', 'तिमीसँग', 'मारुनी','रातो टिका निधारमा' जस्ता फ्लप फिल्म गरेपछि साम्राज्ञी हतोत्साहित देखिन्छिन् । फिल्महरुको अफर आए पनि गरिहाल्ने छाँटकाट छैन । त्यसैले होला उनी अहिले म्युजिक भिडियोतिर ढल्केकी छिन् । बेलैमा बुद्धी पुर्याएको भए यति धेरै फ्लप फिल्मबाट बच्न सक्थिन् साम्राज्ञी । ढिलै भए पनि फिल्म छनौटमा गम्भीर देखिन्छन् उनी ।
प्रकाशित : माघ ६, २०७६ १३:०१