गान्तोकमा ग्लोबल फिल्म

‘महोत्सवमा बलिउडका चर्चित कलाकार र फिल्म निर्माताहरूको विशेष सहभागिता हुनेछ,’ महोत्सवका संयोजक चुनिलाल घिमिरेले कान्तिपुरसित भने, ‘अहिलेसम्म सुवास घई, आशा पारेख, रनवीर कपुर, राहुल रावेललगायतका कलाकार, निर्देशक आउने कुरा पक्का भइसक्यो ।’

सिक्किममा धेरै कलाकार, फिल्म निर्माता, निर्देशक रहे पनि यहाँका फिल्महरूले भनेजस्तो व्यवस्थापन प्राप्त गर्न सकिरहेको छैन । अन्तर्राष्ट्रियस्तरमा नै सिक्किम फिल्म बनाउनेहरूको निम्ति उत्तम ‘लोकेसन’ बन्न सक्छ । यसैले सिक्किम सरकारको प्रायोजनामा सिक्किमलाई अन्तरौष्ट्रियस्तरमा फिल्मसित जोड्न र यहाँका कलाकार र फिल्मको प्रवर्द्धन गर्न महोत्सव गर्न लागिएको घिमिरेले जनाएका छन् ।

‘प्रख्यात निर्देशक सुवास घईले स्थानीय फिल्म निर्माताहरूको निम्ति स्क्रिप्ट लेखनमाथि कार्यशाला चलाउनेछन् । रुचि भएकाले यसमा सहभागिता हुन् सक्नेछन्,’ घिमिरेले भने, ‘प्रसिद्ध कलाकार आशा पारेखलाई आयोजकको पक्षबाट लाइफ टाइम एचिभमेन्ट अवार्डसमेत प्रदान गरिनेछ ।’

महोत्सवमा निम्त्याइने फिल्म, अतिथि, कलाकारबारे फिल्म फेडरेसन अफ इन्डियाले जिम्मेवारी लिएको छ । फेडरेसनका अध्यक्ष एफ हसन अनि सचिव सप्रेन सेनसित सोसाइटीका प्रतिनिधिहरूले कोलकतामा बैठक गरेर कार्यक्रममा अन्तर्राष्ट्रियस्तरका मोडल, फेसन डिजाइनरसमेत झिकाउने अनि सके जति बलिउड र अन्य क्षेत्रका सेलिब्रिटीलाई निम्त्याउने सहमति भएको घिमिरेले जनाएका छन् । महोत्सवमा स्थानीय फिल्म र डकुमेन्ट्री फिल्म प्रदर्शनीको पनि व्यवस्था गरिएको छ ।

‘सिक्किम र वरिपरिका कलाकार र फिल्म निर्माताहरूका लागि यो महोत्सव ठूलो अवसर बनोस् भन्ने हाम्रो चाहना हो,’ घिमिरेले भने, ‘सिक्किमका फिल्महरूको बजार व्यवस्थापन र ठूला फिल्महरूमा स्थानीय कलाकारहरूका लागि अवसर निर्माण हुनेछ भन्ने विश्वास पनि छ ।’ महोत्सवमा आफ्ना फिल्म प्रदर्शनी गर्न चाहनेहरूले फेडरेसनको वेबसाइटमार्फत २५ जनवरीसम्ममा फिल्म पठाउन सक्ने बताइएको छ ।