'जोकर' फिनिक्सलाई क्रिटिक्स च्वाइस

एजेन्सी

काठमाडौँ — ओस्कर अवार्डको मनोनयन सार्वजनिक भएकै दिन वितरण गरिएको क्रिटिक्स च्वाइस अवार्डमा क्विन्टन टेरन्टिनोको फिल्म 'वन्स अपन अ टाइम इन हलिउड' उत्कृष्ट घोषित भएको छ । सन् १९६९ आसपासको हलिउडमाथिको यो फिल्मले उत्कृष्ट फिल्मका साथै पटकथा (क्विन्टन), सहअभिनेता ब्रड पिट र प्रोडक्सन डिजाइनको अवार्ड पायो ।

ZenTravel

ओस्कारभन्दा पहिले हुने क्रिटिक्स च्वाइसबाटै ओस्करको अनुमान लगाउने गरिन्छ। यस कारण पनि समीक्षकहरुको यो अवार्डको चर्चा निकै हुनेगर्छ।

Meroghar

उत्कृष्ट अभिनेताको अवार्ड भने 'जोकर'का वाकिन फिनिक्सले हात पारे। हालै भएको गोल्डन ग्लोबमा पनि फिनिक्सले नै अवार्ड पाएका थिए। यसबाट ओस्करमा पनि फिनिक्सको संभावना बढेको बताइन्छ। अभिनेत्रीमा पनि गोल्डन ग्लोब जितेकै रेनी जेल्वेगरले 'जुडी'बाट अवार्ड पाइन्।

अवार्डमा '१९१७'बाट साम मेन्डिस र 'प्यारासाइट'बाट बोङ जो हु उत्कृष्ट निर्देशक घोषित भए। सहअभिनेत्रीमा 'म्यारिज स्टोरी' कि लाउरा ड्रेनले बाजी मारिन्। मार्टिन स्कोरसेजीको चर्चित नेटफ्लिक्स ड्रामा 'दी आइरिसम्यान' ले इन्सेम्बल्ड कास्टको अवार्डमै चित्त बुझाउनु पर्‍यो।

'१९१७' सिनेम्याटोग्राफी र सम्पादनमा उत्कृष्ट घोषित भयो भने मार्वलको 'एभेन्जर्स: इन्ड गेम' ले भिजुअल इफेक्ट्स र एक्सन फिल्मको अवार्ड पायो। कमेडीमा 'डोलेमाइट इज माइ नेम' तथा साइन्स फिक्सन वा हररमा 'अस' उत्कृष्ट भए। 'जोकर'ले पार्श्व संगीतमा बाजी मार्दा कोरियाको 'प्यारासाइट'ले विदेशी भाषाको फिल्मको अवार्ड पायो।

प्रकाशित : पुस २९, २०७६ १४:४९
ADVERTISEMENT
प्रतिक्रिया
पठाउनुहोस्
ADVERTISEMENT

भारतले पाम तेल आयात रोकेपछि महाथिरले भने : देशलाई घाटा भए पनि गलत चिजविरुद्ध बोलिरहन्छु 

एजेन्सी

क्‍वालालम्पुर — मलेसियाले कुटनीतिक तनावका कारण भारतले अघोषित रुपमा पाम तेलको आयात रोकेकोमा चिन्ता व्यक्त गरेको छ । तर मलेसियाका प्रधानमन्त्री महाथिर मोहम्मदले देशले आर्थिक समस्या झेल्ने नै भए पनि ‘गलत चिज’ विरुद्ध बोलिरहने बताएका छन् ।

भारतले गएको हप्तादेखि मलेसियाबाट हुने पाम तेल आयातमा अघाेषित रुपमा रोक लगाएको छ । भारत विश्वमै सबैभन्दा बढी पाम तेल आयात गर्ने देश हो । त्यस्तै इन्डोनेसियापछि मलेसियाले विश्वमै सबैभन्दा बढी पाम तेल उत्पादन गर्छ ।

मलेसियाली प्रधानमन्त्री महाथिर मोहम्मदले भारतले ल्याएको विवादिन नयाँ नागरिकता कानुनमा आपत्ति जनाएपछि दुई देशबीच कुटनीतिक तनाव सिर्जना भएको हो । महाथिरको अभिव्यक्तिका कारण केही महिनादेखि भारत र साउदी अरबसँग मलेसियाको सम्बन्ध चिसिएको छ । महाथिरले संयुक्त राष्ट्र संघको महासभामा पत्रकारहरुसँग कुरा गर्दै भारतले आक्रमण गरीकश्मीर कब्जामा लिएको बताएका थिए ।


भारतले आयात रोकेपछि मलेसियाका पाम तेल उत्पादकले ठूलो घाटा बेहोर्नु परेको छ । प्रधानमन्त्री महाथिरले भने यो समस्याको समाधान खोजिने बताएका छन् । ‘हामी निश्चित रुपमा चिन्तित नै छौँ । किनभने हामीले भारतमा ठूलो परिणाममा पाम तेल पठाउछौँ । तर कहीँ गलत भइरहेको छ भने त्यसमा पनि हामीले निर्धक्क बोल्नुपर्छ,’ उनले पत्रकारहरुसँग भने, ‘हामीले पैसा मात्रै सोच्ने अनि गलत क्रियाकलाप पनि भइरहने हो भने मलाई लाग्छ हामीबाट धेरै नै गलत काम भइसकेको हुन्छ ।’

भारत सरकारले अनौपचारिक रुपमा व्यापारीहरुलाई मलेसियाको पाम तेल नकिन्न भनेको छ । भारतीय व्यापारीले भने इन्डोनेसियाबाट पाम तेल आयात गरिरहेका छन् ।

बिहीबार नियमित पत्रकार सम्मेलनमा भारतीय विदेश मन्त्रालयका सचिव रविश कुमारले भारतले देश हेरेर पाम तेल आयात नगर्ने बताएका थिए ।

सन् २०१९ मा भारतले मलेसियाबाट ४४ लाख टन पाम तेल आयात गरेको छ । मलेसियासँगको सम्बन्ध सुधार नभए यसवर्ष मलेसियाबाट पाम तेलको आयातमा १० लाख टन कम हुने भारतीय व्यापारीले बताएका छन् ।

मलेसियाले भने भारतको विकल्पको रुपमा पाकिस्तान, फिलिपिन्स, म्यानमार, भियतनाम, इथियोपिया, साउदी अरब, इजिप्ट, अल्जेरिया र जोर्डनमा पाम तेल निर्यात गर्ने योजना बनाएको छ । मलेसियाका उद्योग मन्त्रीले पनि पाम तेल निर्यातमा देखिएको समस्या समाधानका लागि भारतीय समकक्षीसँग पहल गरिरहेको बताएका छन् ।

पछिल्लो महिना नेपालबाट पनि निर्यातको १ नम्बरमा रहेको पाम तेललाई भारतले रोक लगाएको छ । नेपाल सरकारले पाम तेलकाे निर्यात खुलाउन भारतसँग अनौपचारिक वार्ता सुरु गरेको छ । उद्योग, वाणिज्य तथा आपूर्ति मन्त्रालयका प्रवक्ता दिनेश भट्टराईका अनुसार अनौपचारिक छलफलमा भारतले समाधान गर्ने संकेत दिएको छ ।

प्रकाशित : पुस २९, २०७६ १४:२९
पूरा पढ्नुहोस्
प्रतिक्रिया
पठाउनुहोस्
×