नाटकमय तीन दिन 

कान्तिपुर संवाददाता

काठमाडौँ — पाँच वटा प्रदेशका ६ नाटक मञ्चन गर्दै तीनदिने नेसनल स्कुल थिएटर फेस्टिभल शुक्रबार सकिएको छ । राजधानीको बानेश्वरस्थित कुञ्ज थिएटरमा जारी फेस्टिभलको अन्तिम दिन आहाल भञ्ज्याङ मावि गोर्खाको प्रस्तुतिमा रंगकर्मी सुरज तमुले निर्देशन रहेको नाटक ‘चालिसे भीर’ र आरङ्ग नेपाल, सुर्खेतका कलाकार समूहको प्रस्तुतिमा ‘तुसारोभित्रका मुनाहरू’ मञ्चन गरिएको थियो ।

नाटक ‘चालिसे भीर’ मा मरेको मान्छेको आत्मालाई जिउँदो मान्छेको आङमा बोलाउने परम्परा देखाइएको थियो । गणेश गौतमको लेखन एवं यामनारायण आचार्यको निर्देशन रहेको ‘तुसारोभित्रका मुनाहरू’ भने बाल यौनशोषणमा केन्द्रित थियो ।

महोत्सवको पहिलो दिन एभरेस्ट बोर्डिङ स्कुल कैलालीका तर्फबाट पुष्प अवस्थीको निर्देशन रहेको नाटक ‘कठै तीन मास्टर’ मञ्चन गरिएको थियो । नाटकले शिक्षित भए पनि रजश्वलाप्रति पुरातन दृष्टिकोण राख्ने एक ग्रामीण परिवारको कथा प्रस्तुत गरिएको थियो । त्यस्तै लिम्बू संस्कारमा मृतकबाट छुटकारा पाउन झाँक्री राखेर आत्मा बोलाउने परम्परालाई नाटक ‘थान’ ले प्रस्तुत गरेको थियो । यो नाटक वरबोटे इंग्लिस बोर्डिङ स्कुल इलामका तर्फबाट सुरेश पोर्तेलले निर्देशन गरेका थिए । दोस्रो दिन क्रिएटिभ एकेडेमी कीर्तिपुरबाट जीवन बरालले निर्देशन गरेको नाटक ‘आनमयाँ’ प्रस्तुत गरिएको थियो । नाटकमा सशस्त्र द्वन्द्वकालमा नि:हत्था नागरिकले बेहोर्नुपरेको सास्तीलाई उतारिएको थियो । त्यही दिन मञ्चन भएको गोपाल कृतिको निर्देशन र युवराज दाहालको लेखन रहेको नाटक ‘म सपना’ पनि देखाइएको थियो । घरको कामले गर्दा शिक्षाबाट वञ्चित एक बालिकाको कथाव्यथा प्रस्तुत गरिएको यो नाटक सगरमाथा मोडेल स्कुल गाईघाटले प्रस्तुत गरेको हो ।

स्कुल थिएटर नेपाल र एसियन एकेडेमी फर पिस र रिसर्च एन्ड डेभलपमेन्टले गरेको महोत्सवको समापनमा सहभागी सबैलाई प्रमाणपत्र, मायाको चिनो प्रदान गर्दै साहित्यकार तथा वरिष्ठ रंगकर्मी अभि सुवेदीले अचेल नाटकमा समाजका कुरा बढी आउन थालेको भन्दै प्रशंसा गरे । महोत्सव निर्देशक टंक चौलागाईंले दिगो शान्ति, सामाजिक मेलमिलापजस्ता विषयमा बालबालिकालाई सामेल गराउन महोत्सव केन्द्रित रहेको बताए ।

प्रकाशित : मंसिर १५, २०७६ ११:०५
ADVERTISEMENT
प्रतिक्रिया
पठाउनुहोस्
ADVERTISEMENT

किम्फ : नेपाल पानारोमामा १४ फिल्म

कान्तिपुर संवाददाता

काठमाडौँ — काठमाडौं अन्तर्राष्ट्रिय पर्वतीय फिल्म महोत्सव (किम्फ) को नेपाली पानारोमाअन्तर्गत १४ वटा फिल्म छानिएका छन् । आउँदो मंसिर २५ देखि राजधानीमा सुरु हुने पाँचदिने महोत्सवमा सरला थापाको ‘ब्रिटेन्स् लोन्ली गोर्खास्, गणेश पाण्डेको ‘सहायक श्रीमान्’, निपिल शर्माको ‘अटिसार्गा’, धोंडप छिरिङको ‘आमा खुन्डो’, सुमन सापकोटाको ‘अठारौं’ र धनराज बर्कोटेको ‘एउटा रूखको पीडा’ छानिएका हुन् ।

त्यस्तै केदार श्रेष्ठको ‘जुनुको जुत्ता’, प्रशिश वज्राचार्यको ‘कोक्रो’, ‘पहिचान’, ‘फुर्वा’, ‘साइलेन्स प्लिज’, ‘रंगहीन पुतली’, ‘द कलरलेस’ र ‘तिर्खा’ पनि प्रदर्शन हुनेछन् । प्रदर्शन गरिने फिल्महरूमा १७ वटा फिल्म प्रतिस्पर्धात्मक खण्डमा छन् भने ३२ फिल्म गैरप्रतिस्पर्धात्मक खण्डमा समावेश गरिएको विज्ञप्तिमा जनाइएको छ । किम्फको यो १७ औं संस्करणका लागि ६९ देशका ४ सय २७ वटा फिल्महरूको प्राप्त भएकोमा २९ देशका ६६ वटा फिल्म मात्रै महोत्सवमा प्रदर्शन गरिने बताइएको छ । महोत्सवको अन्तर्राष्ट्रिय प्रतिस्पर्धामा पहिलो, दोस्रो र तेस्रो हुनेले क्रमश: २ लाख, १ लाख ५० हजार र एक लाख रुपैयाँ जित्नेछन् । त्यस्तै ‘नेपाल पानोरामा’ अन्तर्गत उत्कृष्ट हुने कथानक (फिक्सन) र गैरकथानक (नन–फिक्सन) फिल्मलाई क्रमश: एक लाख र ७५ हजार रुपैयाँ प्रदान गरिनेछ । कथानक विधातर्फको पुरस्कार मिला प्रोडक्सनले र गैर–कथानक विधातर्फको नगद पुरस्कार चलचित्र विकास बोर्डले प्रायोजन गर्नेछ ।

यसपटक किम्फले नै गरेको ‘परिवर्तित नेपाल’ शीर्षकको तीन मिनेटको सर्ट फिल्म प्रतियोगितामा छनोट भएका उत्कृष्ट १० फिल्म पनि प्रदर्शन गरिनेछन् । त्यसबाहेक महोत्सवमा तीनवटा स्विस फिल्महरूको विशेष प्रदर्शनी गरिने बताइएको छ । स्विस कथानक फिल्म ‘हाइडी’ महोत्सवको समापन समारोहमा प्रदर्शन गरिनेछ । माफिल कोट्स’ (बेलायत), जे क्यु ली (कोरिया) र ग्याब्रियला कुहृन (पोल्यान्ड) सहितको निर्णायक टोलीले महोत्सवको उत्कृष्ट फिल्म छनोट गर्नेछन् । ‘पछाडि पारिएकाहरूको आवाज’ नारासहित आयोजना हुन लागेको महोत्सवको उद्घाटनमा ‘द एसेन्ट अफ एभरेस्ट’ फिल्म प्रदर्शनी गरिने बताइएको छ ।

महोत्सवमा फ्रेन्च नागरिक डेनिस पौलेद्वारा खिचिएका नेपालका ४० वर्ष पुराना तस्बिरको पनि प्रदर्शनी हुनेछ । यसपटक महोत्सवमा फिल्म प्रदर्शनीसँगै विश्व वन्यजन्तु कोष (डब्लूडब्लूएफ) को हिउँचितुवा संरक्षणसम्बन्धी स्टोरी टेलिङ कार्यक्रम पनि हुने आयोजक हिमाल एसोसिएसनले जनाएको छ । ‘एसियाली कला संग्रहालयबारे छिरिङ शेर्पा र साहसिक फिल्म निर्माणसम्बन्धी माइकल डिलनले मास्टरक्लास सञ्चालन गर्नेछन्,’ एसोसिएसनका कार्यकारी निर्देशक वसन्त थापाले भने, ‘नेपाली फिल्महरूलाई अन्तर्राष्ट्रिय स्तरमा पुर्‍याउन पाँचदिने महोत्सवले सघाउनेछ ।’

प्रकाशित : मंसिर १५, २०७६ ११:०४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×