शनिबारदेखि पाँचकन्या जात्रा

कान्तिपुर संवाददाता

नुवाकोट (घलेभञ्ज्याङ) — पञ्चकन्या गाउँपालिका-३, घलेगाउँमा शनिबारदेखि पाँचकन्या जात्रा सुरु हुँदै छ । घलेभञ्ज्याङदेखि करिब २ सय मिटर पूर्वोत्तर रहेको पञ्चकन्या मन्दिरमा हरेक वर्ष मार्ग कृष्ण चतुर्थी र पञ्चमीमा लाग्ने मेला शनिबार सुरु हुन लागेको हो ।

मन्दिर क्षेत्रमा सरसफाई, सजावट, प्रचारप्रसार लगायत मेलाका सम्पूर्ण तयारी लगभग सकिएको पञ्चकन्या मेला व्यवस्थापन समितिले जनाएको छ।

आइतबार सकिने मेलाको पहिलो दिन झाँक्री नाचका साथै राष्ट्रिय र स्थानीय कलाकारहरुको जमघटमा सांस्कृतिक साँझ आयोजना गरिएको छ। कार्यक्रममा रामजी खाँड, स्मृति गौतम लगायत गायक/गायिकाहरु सहभागी हुनेछन्।

जात्रा आरम्भको दिन झाँक्रीद्वारा मन्दिरमा पूजाआजा, व्रतालुहरुले दियो र मादी (बत्ति) बाल्ने चलन छ। साँझ जगाएको मादी बिहान घलेभञ्ज्याङको पँधेरामा ल्याई सेलाइन्छ।

पञ्चमीका दिन बिहान पाँचकन्या मन्दिर परिसरमै रहेको सातकन्या थानमा बलि चढाउने र अघिल्लो दिन मन्दिरमा पुगेका झाँक्रीहरु अपराह्न घर फर्किन्छन्।

जात्रा हेर्न स्थानीयका साथै पञ्चकन्या गाउँपालिकाको कात्तिके, राउटार, कविलास, बैयागाउँ, जैसीगाउँ, फूर्केसल्ला, नेवारपानी, कुवापानी, छापथोक, थप्रेक, आरुखर्क, घ्याङस्वाँरा लगायत स्थानबाट मानिसहरु भेला हुन्छन्। त्यस्तै शिवपुरी गाउँपालिकाका सिलामे, जेब्राङ, घ्याङ, गारे, सुनखानी र काठमाडौंबाट समेत मेला भर्न पुग्छन्।

पञ्चकन्या मन्दिरमा मूल पूजारी लालबहादुर तामाङ छन्। तामाङले पाँचकन्या थानलाई मानेमा स्वस्थ रहन र मनले चिताएको पूरा हुने जनविश्वास रहँदै आएको बताए। उक्त मन्दिरको मूल पुजारी तामाङ समुदायका मूल झाँक्री हुने गर्छन्।

वर्षौंदेखि जात्रा लाग्ने पञ्चकन्या मन्दिरको उत्पतिबारे कुनै आधिकारिक तथ्य फेला नपरेको स्थानीयको भनाइ छ।

प्रकाशित : कार्तिक २९, २०७६ १३:११
प्रतिक्रिया
पठाउनुहोस्
ADVERTISEMENT

नक्सा खारेजीको माग : विद्यार्थी र युवाको प्रदर्शन

कान्तिपुर संवाददाता

पाल्पा — भारतले हालै जारी गरेको नयाँ नक्सा खारेजीको माग गर्दै जिल्लाका विभिन्न स्थानमा दिनहुँ प्रदर्शन भएका छन् । सत्तारूढ नेकपाको भ्रातृ संगठन अनेरास्ववियु, युवासंघका साथै राष्ट्रिय जनमोर्चानिकट विद्यार्थी संगठन, युवक संगठन, कांग्रेसनिकट नेपाल विद्यार्थी संघले विरोध प्रदर्शन, मसाल जुलुस, नक्सा जलाउने, हस्ताक्षर अभियानलगायत क्रियाकलाप गर्दै आएका हुन् । 

राष्ट्रिय जनमोर्चानिकट अनेरास्ववियु छैटौंले बुधबार नक्सा खारेज हुनुपर्ने माग गर्दै तानसेनमा नक्सा जलाउने, मसाल जुलुस, पुत्ला दहन कार्यक्रम सम्पन्न गरेको छ । राष्ट्रिय जनमोर्चाको पार्टी कार्यालय क्षेत्र सिल्खान टोलबाट सुरु भएको जुलुस लहरेपीपल हुँदै आन्दोलन चोकमा पुगेर मसाल जुलुससहित कोणसभामा परिणत भएको थियो । सभालाई राजमो जिल्ला अध्यक्ष विशाल दर्लामी, अखिल (छैटौं) का केन्द्रीय सदस्य पुरन पोख्रेल, अखिल नेपाल युवक संघका केन्द्रीय सदस्य कमल थापाले सम्बोधन गरेका थिए । उता, नेपाल विद्यार्थी संघ त्रिभुवन बहुमुखी क्याम्पसले पनि नेपाली भूभागमाथि भारतीय अतिक्रमणका विरुद्धमा विरोध र्‍याली तथा तानसेनमा प्रदर्शन गरेको छ ।

तानसेनको त्रिभुवन बहुमुखी क्याम्पसबाट सुरु भएर आन्दोलन चोक हुँदै बसपार्कबाट पुन: क्याम्पसको गेटमा पुगेर कोणसभा गरिएको छ । सभालाई नेपाल विद्यार्थी संघका केन्द्रीय सदस्य हरिबोल भट्टराई, नेपाल विद्यार्थी संघका कार्यवाहक सभापति सुरेश बोहरा, त्रिभुवन बहुमुखी क्याम्पसका उपसभापति पुण्य सुवेदी, संघका त्रिभुवन बहुमुखी क्याम्पसका कार्यवाहक सभापति सुवास गैरेले सम्बोधन गरेका थिए ।

सत्तारूढ नेकपाको भ्रातृ संगठन अनेरास्ववियु र युवा संघले आन्दोलन चोकमा हस्ताक्षर संकलन सुरु गरेका छन् । नेकपा केन्द्रीय सदस्य ठाकुर गैरे, युवा संघका जिल्ला अध्यक्ष करुणा काफ्लेलगायत स्थानीय बासिन्दा, व्यवसायी, उद्योगी, व्यापारी सबैले भारतद्वारा जारी नयाँ नक्साको विरोधमा हस्ताक्षर गरेका छन् । उता पूर्वखोलास्थित उद्बुद्ध क्याम्पस स्वतन्त्र विद्यार्थी युनियनले पनि विरोधसभा तथा प्रदर्शन गरेको छ ।

प्रकाशित : कार्तिक २९, २०७६ १२:०९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×