होमस्टे कथामा ‘मनकाशी’

आश गुरुङ

(लमजुङ) — गुरुङ भाषाको ‘काशी’ को अर्थ कान्छी छोरी हो । ‘मन’ जोडेर फिल्म ‘मनकाशी’ बनाउनुअघि प्रितम गुरुङले ‘पातें’ (माइली), ‘काशी’ (कान्छी) निर्माण गरिसकेका थिए । ४३ वर्षका प्रितमले ४५ फिल्म निर्माण, निर्देशन गरिसकेका छन् । होमस्टे कथामाथि उनको पछिल्लो गुरुङ फिल्म ‘मनकाशी’ जिल्लाको मर्स्याङदी गाउँपालिका–३ ढगैं गाउँमा छायांकन गरिएको हो । २०५९ मा घलेगाउँमा ‘काशी’ फिल्म सुटिङ गरेका उनले लमजुङमा करिब २ दशकपछि ‘मनकाशी’ को पुरै छायांकन गरेका हुन् ।

आफैंले कथा लेखेर निर्देशन गरेका प्रितमले ‘मनकाशी’ लाई होमस्टे र पर्यटनसँग जोडेको बताए । ‘मनकाशीमा होमस्टेको प्रचारप्रसार र पर्यटन वर्ष सन् २०२० लाई प्रवर्द्धन गर्ने कथा छ,’ उनले भने । पूरा फिल्म ढगैं गाउँमा छायांकन गरिएको ‘मनकाशी’ लाई रोधी डिजिटल र बेस क्रियसनको ब्यानरमा निर्माण गरिएको हो । उक्त फिल्मको शनिबार बेंसीसहरमा विशेष शो गरिएको थियो । यसअघि असोज ३ गते गोरखामा प्रदर्शन गरिएको थियो । बेंसीसहरमा कात्तिक ३० गते सार्वजनिक प्रदर्शनी हुँदै छ । फिल्ममा गुरुङ भाषा र नेपाली भाषा आधाआधी जस्तै छ । गुरुङ भाषा बोलिएका ठाउँमा सबटाइटल नेपाली भाषामा लेखिएको छ । ‘अहिले हरेक गुरुङ गाउँ होमस्टे गाउँ बन्दै छन् । फिल्मका माध्यमबाट होमस्टेको प्रचारप्रसार र पर्यटन वर्षलाई सफल बनाउने हाम्रो प्रयास हो,’ उनले भने ।

करिब २ घण्टाको फिल्ममा मर्स्याङदी–३ को हर्सिङडाँडादेखि देखिने हिमाल, बेंसीसहरका रमणीय दृश्य हेर्न सकिन्छ । फिल्ममा लमजुङे कलाकार विष्णु गुरुङ र पोखराकी अनिता गुरुङको मुख्य अभिनय छ । टीकाराम घले, आइतराम गुरुङ, डीबी गुरुङ, वीरमाया घलेलगायतको पनि अभिनय छ । ‘नेपालीसहित १४ वटा फिल्ममा अभिनय गरिसक्दा मनकाशीमा साँच्चिकै मौलिकता समेटिएको छ,’ प्रितमले भने ।

प्रकाशित : कार्तिक २६, २०७६ १०:०३
ADVERTISEMENT
प्रतिक्रिया
पठाउनुहोस्

सात एल्बम, नौ उपन्यास

कान्तिपुर संवाददाता

काठमाडौँ — स्रष्टा डीआर उपाध्यायले सोमबार एकसाथ ७ वटा गीति एल्बम र नौ वटा उपन्यास सार्वजनिक गरेका छन् । राजधानीको कमलपोखरीस्थित रूसी सांस्कृतिक केन्द्रमा संस्कृतिविद् तथा वाङ्मय शताब्दी पुरुष सत्यमोहन जोशी, अग्रज गायिका ज्ञानु राणा, अभिनेत्री बसुन्धरा भुसाललगायतले गीति एल्बम र उनका कृतिहरू सार्वजनिक गरेका हुन् । 

गीति लेखनमा थुप्रै कीर्तिमानी अवार्डसमेत पाइसकेका उनले यसपटक ‘नजरको तीर’, ‘अनुभूतिको मझेरीमा’, ‘सौभाग्यको सिन्दुर’, ‘स्वर्गघर’, ‘सुधारस’, ‘अन्जान तिर्खा’ र ‘सेभेन्थ कड्स’ नामक एल्बम ल्याएका हुन् । यसअघि नै उनले ११ वटा एल्बम सार्वजनिक गरिसकेका छन् । उपन्यासमा भने ‘सपनाकी रानी’, ‘भाग्यचक्र’, ‘अतिरिक्त’ ‘वज्रघात’, ‘त्यागी’, ‘बिटुली’, ‘अधुरो प्रेम’ लगायत छन् । उपन्यासहरू एडीबी पब्लिकेसनले छापेको हो ।
सातै एल्बममा उपाध्यायले गीत लेखेका छन् । नरहरि प्रेमी, सन्तोष श्रेष्ठ, राज सागरलगायतले संगीत दिएका छन् भने ज्ञानु राणा, दिलीप लामा, प्राशना पाण्डे, प्राप्ति सुवेदी, मनोजराज, रीता केसीलगायतका दुई दर्जनभन्दा बढी गायकगायिकाले स्वर दिएका छन् । एल्बम ‘स्वर्गघर’ मा समावेश चार गीतमा भने उपाध्यायले नै स्वर दिएका छन् । कृतिहरू लोकार्पणका क्रममा उपाध्यायले संगीत र साहित्यको घनिष्ठ सम्बन्ध रहेको बताए । उनले आफूले १६ महिनामा १८ वटा गीति एल्बम ल्याएको पनि सुनाए ।

वाङ्मय शताब्दी पुरुष जोशीले गीति लेखन र साहित्यप्रति उपाध्यायको उत्साह निकै प्रेरणादायी रहेको बताए । सञ्चारकर्मी एवं लेखक अच्युत घिमिरेले उपाध्यायका उपन्यासमा सरल शब्द र मिठासपनसँगै सामाजिक र वैयक्तिक भावना पाइने दाबी गरे । कार्यक्रममा राष्ट्रकवि माधवप्रसाद घिमिरे तथा संस्कृतिविद् तथा वाङ्मय शताब्दी पुरुष जोशीलाई अभिनन्दनसमेत गरिएको थियो । दुवैलाई जनही ५१ हजार रुपैयाँ र ताम्रपत्रसहित दोसल्ला ओढाइएको हो । स्वास्थ्य अवस्थाका कारण राष्ट्रकवि घिमिरलाई लैनचौरस्थित उनकै निवासमै अभिनन्दन गरिएको भिडियोको कार्यक्रममा देखाइएको थियो । अभिनेत्री भुसाल र गायिका राणालाई पनि अभिनन्दन गरिएको थियो । त्यस्तै युथ क्रिएसन म्युजिकबाट उपाध्यायलाई अध्यक्ष रमेश थापा र सल्लाहकार कृष्ण भुसालले सम्मान गरे ।

प्रदर्शनीमा विश्व रेकर्ड
गीत सिर्जनाकै लागि उपाध्यायले प्राप्त गरेका विश्व रेकर्डहरू रूसी सांस्कृतिक केन्द्रको ग्यालरीमा प्रदर्शनी गरिएको छ । यसअघि आठ वटा विश्व रेकर्ड कायम गरिसकेका उपाध्यायले पछिल्लो सात एल्बमका लागि आठ वटा रेकर्ड कायम गरेका छन् ।

कार्यक्रममा एभरेस्ट वर्ल्ड रेकर्डका संस्थापक निर्देशक मधुरा श्रेष्ठले उपाध्यायलाई नयाँ आठ वटा वर्ल्ड रेकर्डको प्रमाणपत्र हस्तान्तरण गरे । २४ फरक गीत १२ मेजर १२ माइनर स्केलमा एउटै एल्बममा समेटेबापत, अधिकांश हिन्दु देवीदेवताको नाम राखेर बनाइएको गीतबापत, एउटै एल्बमका सबै गीत सेभेन्थ कड्समा सिर्जना गरेबापत, योग र महिला प्रताडनासम्बन्धी गीतबापत उनले पछिल्ला रेकर्ड जितेका हुन् ।

प्रताडना गीतमा ७१ वर्षीय गायिका ज्ञानु राणा र ५ वर्षकी गायिका प्राप्ति सुवेदीको स्वर रहेको छ । यसअघि उपाध्यायले ‘वर्ल्ड बुक्स अफ अमेरिका’, ‘वर्ल्ड बुक्स अफ अस्ट्रेलिया’, ‘वर्ल्ड बुक्स अफ लन्डन’, मिराकल वर्ल्ड रेकर्ड, इन्डिया स्टार वर्ल्ड रेकर्ड, एक्सक्लुसिभ वर्ल्ड रकेर्ड, जिनस वर्ल्ड रेकर्डलगायत पाइसकेका छन् ।


प्रकाशित : कार्तिक २६, २०७६ १०:०२
पूरा पढ्नुहोस्
प्रतिक्रिया
पठाउनुहोस्
ADVERTISEMENT
×