तीन फिल्म उत्कृष्ट

पुरस्कृत फिल्मलाई जनही पाँच हजार रुपैयाँसहितको ‘आदिप प्रतिभा चलचित्र पुरस्कार–२०१९’ दिइयो । लघु फिल्म ‘पेन्सिल’ मा बालबालिकालाई जति धेरै दु:ख दियो उनीहरू त्यत्तिकै झगडालु र हिंस्रक हुँदै जान्छन् भन्ने विषय समेटिएको थियो । त्यस्तै ‘अनन्त यात्रा’ मा नेपाली हिन्दु समाजमा प्रचलित गौदान संस्कृतिलाई समेटिएको थियो । डकुमेन्ट्री ‘मकै विवाह’ मा भने गोरखाको धर्चे गाउँपालिकाको लाप्राकमा बाली लघाउनुअघि पूजाआजासहित मकैको विवाह गर्ने प्रचलन समेटिएको थियो ।

महोत्सवमा अफ्रिकाको नाइजेरिया, केन्या, घाना, साउथ अफ्रिका, जिम्बाबे, सेनेगल, मालवी, इजिप्टी/नर्वे/जर्मनी, बेलायत र नेपालसहित १२ देशका २५ ओटा फिल्म थिए । महोत्सवमा बोल्दै फ्रान्सका फिल्म निर्देशक फरिद असदले महोत्सव निकै अर्थपूर्ण भएको बताए । रुवान्डाका फिल्म फेस्टिभल निर्देशक तथा फिल्मकर्मी हाकिजमाना पाइर्रीले पहिलोपटक नेपाल आएर फिल्म महोत्सवमा सहभागी हुन पाउँदा खुसी लागेको बताए ।

यस्तै चिनियाँ चलचित्र निर्देशक तथा अफ्रिका विज्ञ डा. योङले फिल्महरूमार्फत् समाजको गहिरो अध्ययन गर्न सकिने दाबी गरे । कलेज अफ जर्नालिज्म एन्ड मास कम्युनिकेसन (सीजेएमसी) ले गर्दै आएको महोत्सवको यो आठौं संस्करण हो । नेपालीलाई अफ्रिकासँग र अफ्रिकालाई नेपालसँग फिल्मका माध्यमबाट जोड्न महोत्सवलाई निरन्तरता दिइएको महोत्सव अध्यक्ष डा. मञ्जु मिश्रले बताइन् ।