हमालको नेतृत्वमा ‘सप्तरंग २’

कान्तिपुर संवाददाता

काठमाडौँ — देशका सातै प्रदेशलाई कलामार्फत् जोड्ने उद्देश्यले गतवर्षदेखि सञ्चालित सांगीतिक कार्यक्रम ‘सप्तरंग’ को दोस्रो संस्करण कात्तिक २० देखि सुरु हुने भएको छ । सोमबार राजधानीमा आयोजित पत्रकार सम्मेलनमा प्रदेश १ को बिर्तामोडबाट सुरु हुने उक्त सांगीतिक यात्राले गण्डकी प्रदेशको पोखराबाट बिट मार्ने बताइएको छ । 

कार्यक्रम आयोजक गृष्मा ब्रोडकास्टिङका अध्यक्ष गृहेन्द्र घिमिरेले यसपटक भिजिट नेपाल २०२० लाई समेत लक्षित गर्दै प्रस्तुति तय गरिएको बताए । राष्ट्रियतालाई प्राथमिकता दिँदै सबै कार्यक्रम नि:शुल्क हेर्ने व्यवस्था गरिएको घिमिरेले जनाए । पहिलो शृंखला पनि सद्भाव र ऐक्यबद्धतालाई केन्द्रमा राख्दै सम्पन्न गरिएको थियो ।

दोस्रो शृंखलाका लागि अभिनेता राजेश हमाल, गायक सुगम पोखरेल, हिमाल सागर, प्रकाश सपुत, रवि ओड, हास्यकलाकार जितु नेपाल र गायिका मेलिना राईका प्रस्तुति हुने पत्रकार सम्मेलनमा जानकारी दिइयो । सातै जना कलाकारले देशका सातै प्रदेशमा गएर आफ्ना प्रस्तुति दिनेछन् । वीरगन्जमा कात्तिक २२, चितवनमा कात्तिक २४, नेपालगन्जमा कात्तिक २६, सुर्खेतमा कात्तिक २८, महेन्द्रनगरमा कात्तिक ३० र पोखरामा मंसिर ४ गते ‘सप्तरङ्ग २’ ले कार्यक्रम गर्ने भएको हो ।

‘हामी कलाकार भएका नाताले कार्यक्रममा प्रस्तुती दिनु नौलो विषय त हैन । तर यो खास छ’ पत्रकारसँग बोल्दै कलाकारको नेतृत्व लिएका अभिनेता हमालले भने, ‘किनकी यस्तो कार्यक्रमले हामी देशबासीलाई एकआपसमा जोडेर सूत्रबद्ध मात्र गर्ने नभई हामीमा भएको विविधतालाई पस्केर अझ मजबुत समेत पार्ने विश्वास लिएको छु । यो अभियानमा सम्पूर्ण जनता जोडिनु हुनेछ भन्ने आशा छ ।’ दोस्रो सिजनमा देशका सातै प्रदेशमा सांगीतिक यात्राको माध्यमबाट पर्यटकिय स्थानको प्रवर्धन र सम्भावनाको खोजी समेत गरिने आयोजकको दाबी छ । ‘कार्यक्रमले संगीत र मनोरञ्जनका साथ स्थानिय कला, संस्कृतिलाई उजागर गर्ने लक्ष्य राखिएको छ’ गृष्मा ब्रोडकास्टिङका घिमिरेले भने ।

प्रकाशित : कार्तिक १९, २०७६ ०८:३९
ADVERTISEMENT
प्रतिक्रिया
पठाउनुहोस्
ADVERTISEMENT

धर्मराउँदै किङको सत्ता

कान्तिपुर संवाददाता

काठमाडौँ — बलिउडमा उनलाई ‘किङ’ को उपाधि दिइएको छ । तीन दशक लामो फिल्मी करिअरमा ८० भन्दा बढी फिल्म खेलिसकेका उनै शाहरूख खानको गति यतिबेला केही धीमा भएको छ । १४ फिल्मफेयर अवार्ड पाइसकेका शाहरूखको फ्यान फलोइङ अझै पनि लोभलाग्दो छ । उनलाई ट्वीटरमा पछ्याउनेको संख्या नेपालको जनसंख्या भन्दा धेरै छ ।

उनी भारतका प्रधानमन्त्री नरेन्द्र मोदीपछिका सर्वाधिक फलोअर्स पाएका भारतीयसमेत हुन् । तीन करोड ९१ लाखभन्दा धेरैले फलो गरेका उनी विश्वभरमा सर्वाधिक फलोअर्स हुनेमा ३१ औं स्थानमा छन् । आधिकारिक फेसबुक पेजमा पनि शाहरूखलाई २ करोड ९३ लाख र इन्स्टाग्राममा १ करोड ९१ लाखले फलो गरेका छन् ।

विश्वमै सफल स्टारमा गनिने शाहरूखको पछिल्लो फिल्म ‘जिरो’ रिलिजको एक वर्ष बितिसक्दा नयाँ फिल्म आएको छैन । तत्काल आउनेवाला पनि छैन । सन् २०१३ मा ‘चेन्नई एक्सप्रेस’ हिट भएपछि उनले खासै सफलता चाख्न पनि पाएका छैनन् । २०१४ को ‘ह्याप्पी न्यु इयर’ ले भरथेग गरे पनि त्यसपछिका उनका फिल्मले न त बक्सअफिसमा पैसा कमाउन सके, न त गतिलो समीक्षा नै बटुले । यही कारण पनि बलिउडका किङको सत्ता धर्मराएको छ । यो कुरा स्वयं शाहरूखले पनि अनुभूत नगरेका हैनन् । बेलाबखत उनले व्यक्त गरेका धारणामा पनि नयाँ फिल्म छान्न र खेल्न आँट्न नसकेको बताउँदै आएका छन् ।

हालैको एक अन्तरवार्तामा समेत शाहरूखले छोरालाई देखाउनका लागि भए पनि गतिलो फिल्मको खोजीमा रहेको बताएका छन् । गत शनिबार मात्रै आफ्नो ५४ औं जन्मदिन मनाएका शाहरूखलाई आफ्नो स्टारडम भ्यालुबारे पनि छोरालाई देखाउनुरहेछ । हालैको जन्मदिनमा आफ्नो निवास मन्नत अगाडि भेला भएका हजारौं फ्यान, समर्थकको भीड देखेर चकित परेका छोरा अब्रामले कलाकारका नाताले आफूलाई दिइएको मायाका कारण बुझाउनका लागि पनि गतिलो चरित्रमा काम गर्न चाहेको बताएका छन् । ‘आर्यन र सुहाना ‘बाजिगर’ र ‘कुछकुछ होता है’ हेरेर हुर्किए । तर अब्रामकै लागि पनि मैले गतिलो चरित्रमा एउटा राम्रो व्यावसायिक फिल्म खेल्न जरुरी भएको छ । ताकि उसले पनि थाहा पाओस्, उसको बुबा पनि ठूलो स्टार हो ।’ शाहरूखका जेठा छोरा आर्यन २२ वर्ष र छोरी सुहाना १९ वर्षकी भए पनि अब्राम बल्ल छ वर्षमा छन् । अब्राम अर्का अभिनेता आमिर खानका भने फ्यान हुन् ।

‘आर्यनले मलाई अबको तीन, चार वर्षभित्रमा गतिलो फिल्म खेलेर यतिका मान्छेले किन तपाईंलाई माया गरिरहेका छन् भन्ने कुरा अब्रामलाई थाहा दिन जरुरी छ भनिरहेको छ । त्यसका लागि पनि मैले नयाँ चरित्रका लागि कडा मिहिनेत गरेर यस कुराको प्रमाणित गर्नु पर्ने बाध्यता आइलागेको छ,’ शाहरूखले यसका लागि आफू ‘ग्रे क्यारेक्टर’ प्रति लालायित रहेको बताएका छन् । ‘बाजिगर’, ‘अन्जाम’, ‘डर’ जस्ता फिल्ममा शाहरूखले निर्वाह गरेको ग्रे क्यारेक्टरकै कारण आजसम्म पनि उनको अभिनयको तारिफ हुने गर्छ । उनले हिजोआज आफूलाई ‘हिरो टाइप’ का चरित्रदेखि वाक्क लागिसकेको समेत बताए ।

‘मलाई हिरो टाइपमा रुचि छैन । बलिउडमा आउनेबित्तिकै पनि भनेको थिएँ, यहाँ म क्यारेक्टर रोलका लागि आएको हुँ । त्यसो भन्दा मेरा निर्माता, निर्देशक मदेखि रिसाएका पनि थिए,’ अभिनेता खानले केही गम्भीर हुँदै थपे, ‘अब पनि यदि हामीले हिरोकै भूमिकामा पनि अलिकति केही नयाँ आयाम दिन सकेनौं भने अहिलेका सृजनशील युवा पिँढीले गन्ने छैनन् ।’

प्रकाशित : कार्तिक १९, २०७६ ०८:३८
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT