ट्रेलरमा ‘लभ यु हमेशा’

कान्तिपुर संवाददाता

काठमाडौँ — त्रिकोणात्मक प्रेमकथामा आधारित फिल्म ‘लभ यु हमेशा’ को ट्रेलर शुक्रबार सार्वजनिक गरिएको छ । कात्तिक २२ देखि नेपालभर र त्यसको एक साताअघि नै भारतमा प्रदर्शन हुने तयारीमा रहेको फिल्मलाई भाष्कर प्रधानले निर्देशन गरेका हुन् । 

फिल्ममा अभिनेता यशराज गराच, अभिनेत्री फिजा योञ्जन, ऋचा थापा तथा हास्यकलाकार गोपाल ढकाल ‘छन्दे’ लगायतको अभिनय रहेको छ । निर्देशक प्रधानकै लेखन रहेको फिल्मलाई यवन गुरुङले निर्माण गरेका हुन् । रिलिजको संघारमा आक्रामक प्रचारप्रसारमा रहेको फिल्मले यतिबेला फेसबुक प्रोफाइलमा ‘लभ यु हमेशा’ को फ्रेम राख्नेमध्ये हरेक साता एकजना दर्शकलाई २५ सय रुपैयाँ उपहार प्रदान गर्ने घोषणा गरेको छ ।

प्रकाशित : कार्तिक ३, २०७६ ०९:१७
ADVERTISEMENT
प्रतिक्रिया
पठाउनुहोस्

साहित्यमा प्रवासी स्वर

कान्तिपुर संवाददाता

काठमाडौँ — नौ वर्षदेखि कतारमा रहेका नेपाली स्रष्टाहरूले ‘अनेसास–नवोदित साहित्य शृंखला’ चलाउँदै आएका छन् । कविता, गीत र गजलको माध्यमबाट मुलुकको सम्झना, पहिचान र प्रवासको पीडा व्यक्त गर्दै आएका ती स्रष्टाहरू शुक्रबार राजधानीमा प्रस्तुत भए । उनीहरूले नेपाली समाजका समसामयिक समस्यादेखि माया–प्रेमसम्मका सन्दर्भलाई विषय बनाए ।

अन्तर्राष्ट्रिय नेपाली साहित्य समाज (अनेसास) कतार च्याप्टर र नवोदित साहित्यिक वाचनालय कतारले गर्दै आएको शृंखलाको ९७ औं संस्करण नेपालमा गरिएको हो । संस्थाका पूर्वअध्यक्ष तथा सल्लाहकार तीर्थ संगम राईका अनुसार २० औं पनि नेपालमा गरिएको थियो ।

कवि एवं आख्यानकार राजन मुकारुङले संयोजन गरेको कार्यक्रममा प्रवासी स्रष्टालाई मुलुकभित्रकै स्रष्टाले पनि साथ दिएका थिए । कतारबाटै हालै मुलुक आएका कवि महेन्द्र अदृश्य राईले ‘ए रात हामीलाई बलात्कार गर’ शीर्षकमा युद्ध, भौतिक विकास र अनैतिक क्रियाकलापको चेपुवामा पर्दै गएको मानव सभ्यताको सन्दर्भ उठाए । बिमला तुम्खेवा, रुद्र अधिकारी, दीप्स शाहलगायतका कविहरूले असन्तुलित र अमानवीयतातिर लम्किरहेको अस्तव्यस्त समयलाई सिर्जनामा उतारे ।

विशेष श्रोताका रूपमा रहेका कविहरू आहुति र श्रवण मुकारुङले भने गीत सुनाए । मुकारुङले प्रवासमा पनि नेपालीहरूको विशाल आर्थिक, सामाजिक, साहित्यिक सञ्जालको विकास भएको उल्लेख गरे । कवि जसराज किरातीले प्रवासमा बसेर पनि नेपाली साहित्यलाई माथि उठाउने स्रष्टाहरूको प्रशंसा गरे । कार्यक्रममा बाबु त्रिपाठी, छम गरुङ, स्वप्नील स्मृति, रामगोपाल आशुतोष, सुविद गुरागाईं, नवीन प्यासी, टीका खड्का, महेन्द्र अदृश्य राई, लीला घिमिरे, तिरन नेपाललगायतले सिर्जना सुनाए ।

प्रकाशित : कार्तिक ३, २०७६ ०९:१७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT