कलाकारसँग दर्शकको सेल्फी

दीपक परियार

(पोखरा) — ओठमा हाँसो, आँखामा चमक, अनुहारमा सन्तुष्टि भाव बोकेर ‘छ माया छपक्कै’ टिम यतिखेर देश दौडाहामा छ । अघिल्ला फिल्म प्रदर्शन हुनुपूर्व प्रचारप्रसारमा मोफसल दौडने चलन यसपल्ट यो टिमले अपनाएन । बरु फिल्म हिट भएपछि दर्शकलाई धन्यवाद दिँदै हल चहार्‍यो । 

ZenTravel

Meroghar

पोखराको मिड टाउन सिनेमामा शनिबार ‘छ माया छपक्कै’ टिमलाई भ्याइनभ्याइ भयो । फिल्म सकिएर हलको बत्ती बल्नेबित्तिकै दीपकराज गिरी, दीपाश्री निरौला र केकी अधिकारी पर्दाको सामुन्ने झुल्किए । भर्खर पर्दामा हेरेका कलाकार आफ्नै अघि पाउँदा दर्शक खुसीले चिच्याए । ‘हाउसफुल’ हलभित्र कलाकारसँग दर्शकको सेल्फी सुरु भइहाल्यो । धेरै दर्शक दीपकसँग झुम्मिए । दर्शकले आफनो मोबाइलतिर फर्किएर मुस्कुराउन कलाकारलाई आग्रह गरे । दर्शकले जसोजसो भने कलाकारले त्यसैत्यसै गरे ।

फिल्म युनिटले चलचित्र सफल भएको जस ‘टिम वर्क’ लाई दिन्छ । दीपक–दीपा र केकीको एकै स्वर छ– टिम बलियो भएर फिल्म चल्यो । ‘हाम्रोमा डाइरेक्टर पूर्ण स्वतन्त्र हुँदैनन,’ दीपकले भने, ‘सबै कुरा टिमकै सल्लाहमा हुन्छ ।’ टिमकै निर्णयले यसपल्ट आफू निर्देशनमा नउत्रिएको दीपाश्रीले बताइन् । उनले थपिन्, ‘टिमको कुरा नमाने डाइरेक्टर, डाइरेक्टर हुँदैन ।’ उनले ‘छ एकान छ’ मा दिनेश डीसीलाई पनि दायाँबायाँ गर्न नदिएको उनले सुनाइन् । दीपाकै तर्कमा समर्थन जनाए दीपकले । आफ्नो टिमले फिल्ममा निर्देशक हाबी हुन नदिने उनको संकेत थियो । भने, ‘हामी निर्देशक खोज्छौं, हिटलर होइन ।’

आफू ‘स्क्रिप्ट’ र ‘कन्सेप्ट’ को भोको भएको उनी बताउँछन् । ‘छ माया छपक्कै’ दीपक–दीपा ब्रान्डले भन्दा पनि ‘कन्टेन्ट’ ले चलेको उनी ठान्छन् । ‘नेपालको फिल्म प्राविधिक र प्रस्तुतिका हिसाबले लाज नलाग्ने बनाउन जरुरी छ,’ उनले भने, ‘कन्टेन्ट राम्रो भए दर्शकले आफैं फिल्मको प्रचार गर्छन् ।’ टेलिसिरियलबाट फिल्ममा आउँदा नेपाली सिनेमाको स्थिति कमजोर भएको उनी सम्झन्छन् । हास्य कलाकारलाई एक ठाउँमा ल्याएर फिल्म बनाउँदा दर्शकले रुचाएको उनको तर्क छ । आफ्नो टिमले कमेडी फिल्म र कलाकारलाई हेर्ने दृष्टिकोणमै परिवर्तन ल्याएको उनी बताउँछन् । ‘पहिले कमेडी कलाकारलाई हाफपाइन्ट लगाएर हिरोको पछिपछि दौडाइन्थ्यो,’ उनले भने, ‘अहिले हामी हिरो भएका छौं ।’

‘मन्त्री बिगार्ने कर्मचारी हुन्’
पानी, प्रेम र राजनीतिलाई विषयवस्तु बनाइएको फिल्ममा मुख्य पात्र बीपी (दीपकराज) समाजमै भेटिने पात्रजस्तै लाग्छन् । झोला बोकेर हिँड्ने, खल्तीमा सुक्को नहुने, गम्भीर भइरहने राजनीतिक पार्टीको कार्यकर्ता उनी समाजमा जताततै देख्छन् । आफू स्वयं कुनै बेला त्यहीं पात्रजस्तै भएको उनी सम्झन्छन् । फिल्ममा राजनीतिक दल र नेतालाई मात्रै घोचपेच गरिएको छैन, कर्मचारीतन्त्रलाई पनि उत्तिकै दोषी देखाइएको छ । ‘मुलुक बिगार्नमा राजनीतिभन्दा एक कदमअघि ब्युरोक्रेसी छ,’ दीपक भन्छन्, ‘मन्त्रीलाई बिगार्न पनि उनीहरूकै हात छ ।’ फिल्म तन्काउने ठाउँ नभएकोले कर्मचारीतन्त्रका अवगुण अझै धेरै देखाउन नपाएकोमा उनलाई थकथकी छ ।

प्रकाशित : कार्तिक ३, २०७६ ०९:१५
प्रतिक्रिया
पठाउनुहोस्

फूल टिप्न व्यस्त

कान्तिपुर संवाददाता

भक्तपुर — तिहार आउन अझै साता दिन बाँकी छ । तर, मखमली फूल खेती गरेकाहरूले माला गाँसेर बिक्री गर्न थालिसकेका छन् । ताथली बालाटोलकी सन्तमाया बाला अचेल मखमली फूल टिप्न र माला गाँस्नमा व्यस्त छिन् । तिहारमा नभई नहुने मखमली फूल टिप्न र गाँस्न यतिखेर ताथली, गुण्डुलगायत क्षेत्रका कृषक सन्तमाया जस्तै व्यस्त छन् । 

मखमली फूलका लागि सूर्यविनायक नगरपालिका गुण्डु र चाँगुनारायण नगरपालिका ताथली प्रसिद्ध छ । केही वर्षयता यस क्षेत्रका कृषकको मुख्य आयस्रोत मखमली फूलखेती बनेको कृषकहरू बताउँछन् । ‘मखमली फूलखेतीले आत्मनिर्भर बनाएको छ,’ सन्तमायाले भनिन्, ‘दसैं–तिहारका लागि अन्यत्र खर्च खोज्नु पर्दैन, चाडपर्व मनाएर पनि बचत निकाल्न सकिन्छ ।’ मखमली फूलखेतीसँगै अन्यजातका फूल, फूलबारीमै भटमास, मकै लगाएको उनी बताउँछिन् ।

तिहारमा दिदीबहिनीले दाजुभाइलाई कहिल्यै नओइलाउने मखमली फूलको माला लगाएर आशीर्वाद दिने चलन छ । सोही प्रचलनअनुसार मखमली फूलको मालाको माग बढ्दो छ । ‘मखमली फूलको माला खोज्न साउनदेखि नै आइसके,’ ताथलीकी सरिता बालाले भनिन्, ‘मखमली फूलको विकल्पमा सयपत्री लगायत अन्य फूलको माला लगाइदिने चलन पनि छ तर, मखमली फूललाई विशेष मानिन्छ ।’ चैत/वैशाखमा ब्याड राख्ने, जेठमा रोप्ने मखमली फूल असारको अन्त्यबाटै टिपेर माला गाँसी झुन्ड्याएर राख्ने गरेको उनी बताउँछिन् ।

प्रत्येक वर्ष यस भेगका महिलाहरूले मखमली फूलबाट ५० हजारदेखि ३ लाख रुपैयाँसम्म आम्दानी गर्दै आएका छन् । ‘विशेषगरी पुरुषहरू अन्य काममा व्यस्त हुन्छन्, फूलखेतीको मुख्य श्रेय महिलाहरू नै हुन्,’ स्थानीय दिलमाया बालाले भनिन्, ‘बालबच्चा हुर्काउँदै पारिवारिक जिम्मेवारीसँगै महिलाहरूले मखमली फूलखेती गरेर आत्मनिर्भर बन्दै छ ।’

घरमा बसीबसी माला गाँस्छौं, फूल गाँस्न अन्य क्षेत्रका मानिस पनि आउँछन् । ‘प्रतिमाला गाँसेको पाँच रुपैयाँ ज्याला पाउँछ,’ उनले भनिन् । एक रोपनी जग्गामा लगाएको मखमली फूलको करिब ६ हजार माला बन्नेसमेत उनले बताइन् । प्रतिमाला २० देखि २५ रुपैयाँका दरले बिक्री गर्दै आएको समेत उनीहरू बताउँछन् । गुण्डु र ताथलीका महिलाहरूले वर्षमा दुईदेखि सात हजार माला बेच्दै आएको जनाएका छन् ।

विशेषगरी तिहारका लागि मात्र प्रयोग हुँदै आएको मखमली फूल छठपर्वका लागि समेत माग हुँदै आएको कृषकहरू बताउँछन् । भक्तपुरको मखमली फूलको माग स्वदेशमा मात्र नभई विदेशमा समेत उत्तिकै छ । ‘प्रत्येक वर्ष तिहारका लागि जापान, क्यानडा, अस्ट्रेलिया, अमेरिकालगायत देशहरूमा भक्तपुरको माला पुग्ने गरेको छ,’ कृषक रामकाजी वनमालाले भने, ‘तिहारका लागि विदेशमा बस्ने नेपालीहरूले मखमली फूल माग गर्छन् ।’

मखमली फूलमा लागेको मिहिनेतको तुलनामा आम्दानी भने सोचेजस्तो उत्साहजनक नभएको कृषकको गुनासो छ । ‘मखमली फूलको बिरुवा जोगाउनै मुस्किल पर्छ,’ चन्द्रकेशरी वनमालाले भनिन्, ‘जरा कुहिने, डढुवा रोग लाग्ने र औषधि तथा भिटामिनको प्रयोग अत्यधिक गर्नुपर्छ । फूलखेती गर्न अत्यधिक मिहिनेत चाहिन्छ, फूलखेतीको प्रोत्साहन गर्न कुनै निकाय तयार छैनन् ।’ खटिएअनुसारको बजार भाउसमेत नपाएको कृषकको गुनासो छ । ‘कृषकले दिएको दोब्बर भाउमा बाहिर बिक्री भइरहेको हुन्छ,’ उनले भनिन्, ‘कृषकले भन्दा बिचौलियाले दोब्बर आम्दानी गर्छ ।’ प्रत्येक वर्ष गुण्डु र ताथलीका करिब ७ सय महिलाले करिब ३ करोड रुपैयाँभन्दा बढीको मखमली फूल बिक्री गर्दै आएका छन् ।

पुष्प खेती प्रवर्द्वन गर्न अनुदान
सूर्यविनायक नगरपालिकाले पुष्पखेती प्रवर्द्वनका लागि अनुदान वितरण गरेको छ । नगरपालिकाले साना किसान कृषि सहकारी गुण्डुसँग समन्वय गरी गुण्डु क्षेत्रका ६ सय ८७ कृषकलाई फूलको बेर्ना वितरण गरेको जनाएको छ ।

फूलखेती गर्ने व्यावसायिक किसानलाई ६० देखि ५ सय बेर्ना वितरण गरेको सूर्यविनायक–७ का वडाध्यक्ष रवीन्द्र सापकोटाले बताए । नगरपालिकाले गतआर्थिक वर्ष ०७५/७६ मा पुष्पखेती प्रवर्द्वनका लागि कृषकलाई ४ लाख रुपैयाँ अनुदान दिएको उनले बताए ।

प्रकाशित : कार्तिक ३, २०७६ ०९:१२
पूरा पढ्नुहोस्
प्रतिक्रिया
पठाउनुहोस्
ADVERTISEMENT
×