नीर शाहलाई सलाम

प्रत्यक्ष प्रसारण भएको कार्यक्रममा शाहलाई साक्षी राखेर दीपक खरेल, सुवानी मोक्तान, शैलेश सिंह, सरिता शाही, सुरज थापा, सुमन श्रेष्ठ, भविन डुंगानालगायतले शाहकै विभिन्न गीत गाए, शाहले चाहिँ आफ्नो नामदेखि करिअरका अनेक घुम्तीको कथा सुनाए । ‘मेरो नाम खासमा नुरदेव थियो,’ शाहले भने, ‘म जन्मिँदै गर्दा प्रसव पीडामा आमाले आफ्नो हातको नीर औंठी मात्रै झल्झली देखिरहनुभयो रे । त्यसपछि उहाँले मेरो नाम नीरमा बदल्नु भयो । पछि उक्त औंठी मेरो र दाइको पढाइका लागि आमाले बेचिदिनुभयो ।’

शाहका अनुभूति सुनेर प्रत्यक्ष वाद्यवादन गरिरहेको समूहदेखि गायक/गायिका सबै भावुक बनेका थिए । ‘प्रेमपिण्ड’, ‘बसन्ती’, ‘सेतो बाघ’ जस्ता कृतिमा आधारित फिल्म निर्देशन गरेका शाहले थुप्रै फिल्म र नाटक खेलेका छन् । ‘शब्दले मान्छेलाई सधैं जीवित राख्ने भएकाले उहाँले गीत लेख्न छाड्नु हुन्न,’ कार्यक्रममा अर्का पाका गीतकार दिनेश अधिकारीले भने, ‘उहाँ गीत मनछुने र अर्थपूर्ण हुन्छन् ।’

नेपाली गीत/संगीतको क्षेत्रमा अतुलनीय योगदान दिने स्रष्टाका सिर्जनालाई नयाँ पुस्ताले सम्मानसहित पस्किने यो कार्यक्रममा हरेक महिनाको पहिलो शनिबार हुँदै आएको छ । ‘स्रष्टाहरूले समाजलाई मार्गनिर्देश गरिरहेका हुन्छन्,’ कार्यक्रमका परिकल्पनाकार तथा कान्तिपुर एफएमका स्टेसन म्यानेजर दिनेश डिसीले भने, ‘पुराना र नयाँ पुस्ताका स्रष्टाबीच अन्तर्घुलनको उद्देश्यले पनि यो कार्यक्रमलाई निरन्तरता दिएका हौं ।’