धेरै दर्शकमाझ चिनिन ड्रिमगर्ल

कान्तिपुर संवाददाता

काठमाडौँ — रोमान्टिक कमेडी फिल्म ड्रिमगर्ल आयुष्मानको नजरमा धेरै दर्शकलाई मन पर्ने खालको फिल्म हो । त्यसैले पनि क्लास अडियन्समा चिनिएका उनी अब मास अडियन्समा पनि पुग्न लोभिएका रहेछन् । यसको अर्को कारण खोतल्दै आयुष्मानले थपे, ‘हुन त म विचारप्रधान र जागरण दिने खालका फिल्म नै खेल्ने हो ।

र, मलाई दर्शकले पनि त्यस्तै रूपमा चिन्न थालेका छन् । तर ती फिल्म खासमा आम दर्शकमाझ पुग्नुपर्ने हो । यदि म ड्रिमगर्लजस्ता फिल्म खेलेर मासमा पनि चिनिन सकें भने ती दर्शक मेरा अरू खालका फिल्म हेर्न पनि आउन सक्छन् । ताकि सामाजिक मुद्दामा बनेका मेरा फिल्ममा कम्तीमा धेरैभन्दा धेरै दर्शक तान्न सकूँ ।’बलिउड अभिनेताको करिअर पछिल्ला वर्ष निकै चम्केको छ ।


पछिल्लो पटक रिलिज उनको आर्टिकल १५ ले पनि राम्रै तारिफ कमायो । आयुष्मानको अभिनयको त चर्चा हुने नै भइहाल्यो ।

खासगरी आयुष्मान विचारप्रधान र शिक्षाप्रद् फिल्ममा बढी देखिएका छन् भने आफूलाई पनि जिम्मेवार अभिनेताको रूपमा स्थापित गरिरहेका छन् ।


यति बेला भने आयुष्मान फिल्म ड्रिमगर्लमा फरक भूमिकामा देखा पर्दै छन् । ट्रलरमा उनलाई युवतीको भेषमा देखाइएको छ । वैकल्पिक धारका फिल्महरूमा खेल्दै आइरहेका आयुष्मानले ड्रिमगर्ललाई भने मसलेदार फिल्म भनी टिप्पणी गरेका छन् ।


फरक धारका फिल्मबाटै आफूलाई मूलधारमा चिनाएका आयुष्मानले यति बेला आएर किन मसलेदार फिल्म खेल्न लालायित भए त ? जवाफमा अभिनेता भन्छन्, ‘मैले यो फिल्म खेल्न राजी हुनुको पछाडि मेरै स्वार्थ छ । किनभने म राम्रो व्यावसायिक फिल्म खेल्न चाहन्थें । जसले गर्दा म धेरैभन्दा धेरै दर्शकमाझ पुग्न सकूँ र चिनिन सकूँ ।’ – एजेन्सी

प्रकाशित : भाद्र २९, २०७६ ०९:०५
प्रतिक्रिया
पठाउनुहोस्

धुलिखेलमा सांगीतिक जात्रा

कान्तिपुर संवाददाता

काभ्रे — अपांगता भएका बालबालिकालाई सांगीतिक क्षेत्रमा सहयोग गर्ने उद्देश्यले धुलिखेलमा ‘म्युजिकल जात्रा’ गरिएको छ । रमाइलो छत्रछायामुनि नामक संस्थाले धुलिखेलस्थित हिमालयन मोटर ल्यान्ड (बेजिङ प्लान) मा गरेको सांगीतिक कार्यक्रममा चर्चित ब्यान्ड कब वेव, द एक्स, द एक्ट, इलेक्ट्रिक एयर, द सफ टोन्स, द नर्ट एन्ड ब्याडलगायत स्थानीय ब्यान्डले प्रस्तुति दिए । 

संस्थाले आफ्नो खर्चमा ३ जना दृष्टिविहीनसहित ६ जनालाई सांगीतिक प्रशिक्षण दिँदै आएको छ । शनिबार दृष्टिविहीन प्रवीण तामाङ, सरोज विक, शिवराज विक र साजन सोनार, दिनेश परियार र सुष्मा परियारले पनि सांस्कृतिक प्रस्तुति दिए । स्थानीय सञ्जीवनी माध्यमिक विद्यालयमा पढ्दै आएका दृष्टिविहीन प्रवीण गायनसँगै गितार पनि बजाउँछन् ।

दृष्टिविहीन शिवराज गाउँछन् भने सरोज क्याजोन बजाउँछन् । सुष्मा गाउँछिन्, दिनेशले गितार र साजन बाँसुरी बजाउँछन् । ६ जनाको प्रशिक्षणको निरन्तरताका लागि स्रोत जुटाउन कन्सर्ट गरिएको अध्यक्ष श्रेयविक्रम ब्याञ्जुले जनाए ।

प्रकाशित : भाद्र २९, २०७६ ०९:०३
पूरा पढ्नुहोस्
प्रतिक्रिया
पठाउनुहोस्
×