राधिका वेब सिरिज क्विन

कान्तिपुर संवाददाता

काठमाडौँ — नायिका हुनका लागि बलिउडमा अझै पनि आकर्षक जिउडाल र सुन्दर अनुहारै चाहिन्छ । प्राथमिकतामा यस्तै युवती पर्ने गर्छन् तर अपवाद कसैका लागि छ भने त्यो राधिका आप्टे पनि एक हुन् ।


उनी आकर्षक र ग्ल्यामर लुकका कारणले भन्दा पनि अभिनयको दमले बलिउडमा छाएकी अभिनेत्री हुन् । राधिका यतिबेला नेटफ्लिक्स सिरिज ‘सेक्रेड गेम्स’ मा पनि महत्त्वपूर्ण भूमिकामा देखिएकी छन् । अधिकांश नायिका ग्ल्यामर र नायकको प्रेमिकाको भूमिकामा खेल्न रुचाइरहँदा उनी भने बोल्ड भूमिकामा बढी विश्वास गर्छिन् ।

सन् २००५ मा ‘वाह, लाइफ हो तो ऐसी’ मार्फत् बलिउड डेब्यु गरेकी आप्टेले मुख्य नायिकाका रूपमा भने त्यसको चार वर्षपछि मात्रै बंगाली सोसल ड्रामा फिल्म ‘अन्तहीन’ मा मात्रै मौका पाइन् तर चर्चा भने सन् २०१५ मा रिलिज उनका दुई फिल्म ‘हन्टर’, ‘बदलापुर’ र ‘माझी ः द माउन्टेन म्यान’ बाट मिल्यो ।

त्यसपछि करिअरको रफ्तारले उकालो लागिरहेका बेला आप्टेले सन् २०१६ मा रजनीकान्तको फिल्म ‘कबाली’ खेल्न पाइन् । यस फिल्मले उनलाई आम दर्शकमाझ पुर्‍याएको थियो तर यसैबेला उनको करिअरमा एउटा धक्का लाग्यो, फिल्म ‘पार्च्ड’ को न्युड सिन लिक भएपछि । आप्टे यतिबेला वेब सिरिजमा समेत व्यस्त हुन थालेकी छन् ।

नेटफ्लिक्सले नै उनलाई ‘सेक्रेड गेम्स’ पछि लगातार अरू दुई ‘लस्ट स्टोरिज’ र ‘घोल’ मा पनि लिएको छ । यतिबेला उनलाई वेब सिरिजको क्विन भन्न थालिएको छ ।

प्रकाशित : भाद्र २३, २०७६ ०८:१०
ADVERTISEMENT
प्रतिक्रिया
पठाउनुहोस्

पुर्बेली भाका जोगाउँदै

अर्जुन राजवंशी

दमक — पैसा कमाउनु छैन । सम्मान, पुरस्कारका लागि कसैलाई चाप्लुसी गर्नु पनि छैन । लोक गीत–संगीतका लागि निरन्तर लागिरहनु छ ५९ वर्षीय लक्ष्मीप्रसाद खनाललाई । 

उमेरले ‘वृद्ध’ बनाइसक्यो तर गीत संगीतले अझै तन्नेरी बनाइराखेको छ उनलाई । झापाली भएर होला, उनलाई ‘पुर्बेली’ भाका असाध्य मन पर्छ । समय परिवर्तनशील छ ।

गीत संगीतमा नयाँ पुस्ताको रुचि पनि फरक हुँदै गएको छ । सरल र सुरिलो पुर्बेली लोकभाकातर्फ नयाँ पुस्ता लाग्नुपर्ने जति सक्रिय नभएको उनको ठम्याइ छ । पुर्बेली भाकाको संरक्षण तथा नयाँ पुस्तामाझ पुस्तुत गर्न खनालले ‘पुर्बेली स्वाद’ भाग १ देखि ४ सम्म एल्बम निकालेका छन् ।

उनले ०६९ मंसिरमा पहिलो एल्बम ‘पुर्बेली स्वाद’ भाग १ सार्वजनिक गरेका थिए । ६ वटा गीत समावेश उक्त एल्बमका सबै गीतको लेखन, संकलन र स्वर खनाल आफैंले गरेका थिए । उनलाई जुना प्रसाईं र अमृता बिकले स्वरमा साथ दिएका थिए । २०७० मा खनालले दोस्रो एल्बम ‘पुर्बेली स्वाद’ भाग २ आफ्ना दर्शक श्रोतामाझ ल्याएका थिए । उक्त एल्बममा ५ वटा लोकगीत समावेश छन् ।
२०७३ मंसिरमा भाग ३ र २०७६ जेठमा भाग ४ विमोचन गरेका छन् । एल्बममा समावेश सबै गीतको लेखन, संकलन र स्वर खनाल आफ्नै रहेको छ । गायक खनालले ३ सयभन्दा बढी गीतमा स्वर दिएका छन् । २०३० सालदेखि निरन्तर लोक गीत संगीतमा क्रियाशील छन् । गायिक जुना प्रसाईं र गीतादेवीसँग १० बढी गीतमा स्वर भरेका छन् ।

पाँचथरको सिबुवा पञ्चमीमा खेती किसानीकै क्रममा लोक गीत संगीतले उनलाई लट्ठ बनाइसकेको थियो । पहिलो पटक २०४२ सालमा उनले धनकुटामा उच्च शिक्षा अध्ययन क्रममा ‘सम्झना त राख है छोडिगए पनि...’ बोलको गीत सार्वजनिक कार्यक्रममा गाएका थिए ।

त्यसपछि घरगाउँका साना–ठूला स्टेजहरूले उनलाई गायकको परिचय दियो । झापा, मोरङ, इलाम, धनकुटालगायत पूर्वका विभिन्न स्थानमा हुने लोक सांगीतिक कार्यक्रमहरूमा निमन्त्रणा होस् या नहोस् तर उनको उपस्थिति भएकै हुन्छ । दमकमा नियमित हुने साहित्यिक कार्यक्रममा उनले मीठो पुर्बेली भाका पस्किने गर्छन् । उनको पूर्वी लोकभाकाको अहिले प्रचलित गीत हो–
‘रुमाल चिनो छ,
बुट्टे रुमाल चिनो छ
यही रुमाल कान्छीलाई
हातमा दिनु छ...’

गायक लक्ष्मी गीतसंगीतको फुर्सतबाहेक अचेल ‘हार्मोनियम’ मर्मतसम्भार गरेर दैनिकी बिताइरहेका छन् । दमक–५ स्थित घरमै हार्मोनियम मर्मत सेन्टर सञ्चालन गरेका खनाल चुनावी समयमा निकै सक्रिय हुन्छन् । उनलाई विभिन्न राजनीतिक पार्टीका चुनावी गीत गाउन भ्याइनभ्याइ हुन्छ ।

फुर्सदमा स्थानीय तहमा लोकल आयुर्वेद डक्टरका रूपमा पनि उनको ख्याति छ । विशेष गरी पिनास रोगका पीडितहरू
उनीकहाँ नाम टिपाएरै उपचारमा आउँछन् ।

‘मैले गीत संगीतमा लागेर पैसा त कमाइनँ तर सामाजिक प्रतिष्ठा र नाम कमाएको छु,’ खनाल भन्छन्, ‘लोक गीत संगीतमा लागेर प्राप्त गरेको यो नै मेरो ठूलो सम्पत्ति हो । यसैमा आफूलाई गर्व महसुस हुन्छ ।’

दुई छोरी र एक छोराका पिता खनाललाई सांगीतिक क्षेत्रमा लागिरहन श्रीमती डुकादेवीको ठूलो साथ र हौसला छ । ‘उमेर बूढो भए पनि गीत संगीतमा लागिरहन प्राध्यापक गोविन्दराज भट्टराई, गायक लक्ष्मी जोशीलगायत व्यक्तित्वले सधैं हौसला दिइरहनुहुन्छ,’ उनले भने ।

प्रकाशित : भाद्र २३, २०७६ ०८:०९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT