फेरि बिग्रियो सलमान–सञ्जय सम्बन्ध

कान्तिपुर संवाददाता

काठमाडौँ — ठिक पाँच महिनाअघि सलमान खानले ट्वीट गरेका थिए, ‘२० वर्ष भएछ । तर पनि म खुसी छु, सञ्जयलीला (भन्साली) र म अन्ततः नयाँ फिल्मसहित आउँदै छौं, इन्साअल्लाह ।’ 

सन् १९९९ मा ‘हम दिल दे चुके सनम’ पछि सलमान र सञ्जयको फिल्म ‘इन्साहल्लाह’ मा टिमअप हुँदै थियो । सलमानको अपोजिटमा खेल्ने भनिएकी आलिया भट्टका लागि भने निर्देशक र अभिनेता दुवैसँग पहिलोपटक सहकार्य हुँदै थियो । आलियाले खुसी हुँदै भनेकी थिइन्, ‘म नौ वर्षकी थिएँ, जब पहिलो पटक सञ्जयलीला भन्सालीको अफिस गएकी थिएँ । सपना साकार हुँदै छ ।’

तर यो खुसी पाँच महिना पनि टिकेन । यतिबेला ‘इन्साअल्लाह’ निर्माण स्थगित भएको घोषणा गरिएको छ । सलमान–सञ्जयबीचको उतार–चढावपूर्ण सम्बन्धले दुई दशकपछि पुनः हुन लागेको सहकार्यले मूर्त रूप लिन पाएन । सञ्जयले सलमानलाई फिल्मको पहिलो भाग मात्रै थाहा दिएर क्लाइमेक्स गोप्य राखेकोदेखि २०२० को ईदमा रिलिज गरिने सलमानको घोषणामा आपत्ति जनाउँदै उक्त मितिमा फिल्म ल्याउन नसक्ने बताएको भन्नेअड्कलबाजी गरिएको छ । ‘इन्साअल्लाह’ रोकिएपछि खानले भनेका छन्, ‘मेरो बारेमा यति धेरै नसोच्नुस्, म दिलमा आउँछु र ईदमा पनि ।’

अभिनेता सलमान र निर्देशक सञ्जयबीचको सम्बन्धमा आएको आरोहअवरोह यो पहिलो भने हैन । सञ्जयले सन् १९९६ मा फिल्म ‘खामोसी’ बाट निर्देशनमा डेब्यु गरेका थिए जसमा सलमान र मनीषा कोइरालाले अभिनय गरेका थिए । त्यसपछि सञ्जयले दोस्रो फिल्म ‘हम दिल दे चुके सनम’ मा पनि सलमानलाई दोहोर्‍याए भने यसपटक अभिनेत्रीमा ऐश्वर्या रायलाई लिए ।

फिल्म सफल भयो । छायांकनकै क्रममा सलमानले फिल्मको इन्डिङ ऐशले अर्का अभिनेता अजय देवगणसँग नगईआफूसँग आउनुपर्ने माग गरेपछि सम्बन्ध बिग्रियो । सञ्जयले ‘देवदास’ मा ऐश्वर्यालाई दोहोर्‍याए । पछि फेरि सम्बन्ध सुध्रिँदै गइरहेका बेला सञ्जयले ‘बाजिराव मस्तानी’ प्रोजेक्टका लागि ऐश्वर्या र सलमानलाई लिने मोटामोटी तय भएको थियो ।

तर दुवैको ब्रेकअपपछि सञ्जयले ऐशको रोल करिनालाई अफर गरे । तर जब सलमान र करिनाले ‘क्यूँकी’ साइन गरिदिए, सञ्जयले उक्त प्रोजेक्ट नै रोकिदिए । १२ वर्षपछि पुनः उक्त प्रोजेक्ट ब्युँताएका सञ्जयले यसपटक भने दीपिका पादुकोण र रनवीर सिंहलाई लिइदिए । यसले पनि सलमानलाई क्षुब्ध बनायो । निर्देशनमा सञ्जय चम्कँदै थिए, अभिनेतामा सलमानको जगजगी थियो । यस्तोमा दुईजना दुई ध्रुवमा सधैं बसिरहन सक्ने अवस्था पनि थिएन ।

सम्बन्ध सुधार्न सलमानले फेरि नयाँ उपाय अपनाए । सञ्जयलाई क्रिस्टोफर नोलानको फिल्म ‘द प्रेस्टिज’ को डीभीडी उपहार दिए । सञ्जयले उक्त फिल्मको रिमेक बनाउने भए, ‘गुजारिस’ । सलमानको आशा तब टुट्यो, जब सञ्जयले उक्त फिल्मका लागि हृतिक रोशन र ऐशको जोडी लिए । फिल्म रिलिजपछि सलमानले फेरि कटाक्ष गरे, ‘फिल्म हेर्न एउटा माखो पनि गएन ।’

तैपनि, रिसराग, छेडखानी एकातिर पन्छाएर फेरि एकपटक सहकार्यका लागि दुवैबाट प्रयास भयो । ‘इन्साअल्लाह’ बन्ने घोषणासँगै दुवैका फ््यानहरू उत्साहित भए । तर अवस्था फेरि उही दोहोरियो । यतिबेला पनि सलमान र सञ्जयबीचको जुँगाको लडाइँमा फिल्म पर्‍यो । रचनात्मक विमति देखाउँदै फिल्म निर्माण नै थाँती राखियो ।

प्रकाशित : भाद्र ११, २०७६ ०८:२८
प्रतिक्रिया
पठाउनुहोस्

अमेजन डढेलो : ब्राजिलद्वारा सहयोग अस्वीकार 

एजेन्सीहरू

ब्रासिलिया — ब्राजिलले अमेजन वनक्षेत्रमा फैलिएको डढेलो नियन्त्रणका लागि सात ठूला औद्योगिक राष्ट्रहरूको समूहको सहयोग अस्वीकार गरेको छ । 

फ्रान्सका राष्ट्रपति इम्यानुएल म्याक्रोंले सोमबार जी–७ राष्ट्रले अमेजनको डढेलो नियन्त्रणका लागि ब्राजिललाई ‘प्राविधिक र आर्थिक सहयोग’ गर्ने निर्णय भएको जनाएका थिए । उनका अनुसार जी–७ राष्ट्रहरू ब्राजिललाई तत्काल २ करोड २० लाख डलर सहयोग गर्न सहमत भएका हुन् ।

तर ब्राजिलका मन्त्रीहरूले मंगलबार‘जी–७ को रकम आवश्यक नभएको बताउँदै विदेशी शक्तिले अमेजनमाथि नियन्त्रण कायम गर्न खोजेको’आरोप लगाएका छन् । ब्राजिली राष्ट्रपतिका चिफ अफ स्टाफले भनेका छन्, ‘धन्यवाद, तर सम्भवतःउक्त स्रोत युरोपमा वृक्षरोपण गर्न खर्चिनुसान्दर्भिक हुन्छ ।’

ब्राजिलका राष्ट्रपति जैर बोल्सोनारोले यसअघि ‘आफ्नो देशका सार्वभौमिकताको सम्मान’ हुनुपर्ने बताउँदै सहयोग गर्ने निर्णयको आलोचना गरेका थिए । अमेजन वनक्षेत्रमा फैलिएको डढेलो नियन्त्रणका लागि अन्तर्राष्ट्रिय समुदायले ब्राजिलका राष्ट्रपति जैर बोल्सोनारोमाथि दबाब दिएलगत्तै जी–७ नेताहरूले सहयोगको निर्णय गरेका थिए ।

सम्मेलनका क्रममा बेलायती प्रधानमन्त्री बोरिस जोन्सनले ‘एक करोड पाउन्ड उपलब्ध गराउने’ प्रतिबद्धता जनाएका थिए । उनले डढेलो नियन्त्रणका लागि प्राविधिक स्रोतसाधन र आर्थिक सहयोग उपलब्ध गराउनेबारे युरोपका अन्य देशहरूसँग समन्वय गरिरहेको समेत बताएका थिए ।

ब्राजिलको ‘नेसनल इन्स्टिच्युट फर स्पेस रिसर्च’ ले ब्राजिलमा यसैवर्षमात्र डढेलोका घटनामा ८२ प्रतिशतले वृद्धि भएको बताएको छ । यद्यपि, बोल्सोनारोले उक्त दाबी अस्वीकार गर्दै बाहिर सार्वजनिक भएजस्तो भयावह स्थिति नभएको बताउने गरेका छन् ।
‘विश्वको फोक्सो’ रूपमा परिचित ‘अमेजनको डढेलो नियन्त्रण गर्न ब्राजिलले कुनै प्रयास नगरेको’ भन्दै आलोचना भएपछि बोल्सोनारोले सेना परिचालनको निर्णय गरेका थिए । बीबीसीका अनुसार उक्त क्षेत्रमा हाल ४४ हजार सेना खटाइएको छ ।
विश्वकै ठूलो ‘रेन फरेस्ट’ अमेजनमा संग्रहित हुने कार्बनले विश्वमा हुने तापमान वृद्धि घटाउँछ । अमेजनमा ३० लाख प्रजातिका वनस्पति तथा वन्यजन्तु छन् । विश्वको २० प्रतिशत अक्सिजन अमेजनले उत्पादन गर्छ ।

बोल्सोनारोले देशका संरक्षित प्राकृतिक क्षेत्र, आदिवासी बसोबास गर्ने भू–भाग र सीमावर्ती क्षेत्रमा लागेको डढेलो नियन्त्रणमा लिन सेनालाई आदेश दिएका हुन् ।

ब्राजिलले अमेजनमा फैलिएको डढेलो निभाउने प्रयास नगरे फ्रान्स र आयरल्याण्डले दक्षिण अमेरिकी देशहरूसँगको व्यापार सम्झौता नवीकरण नगर्ने चेतावनी दिएपछि बोल्सोनारो सेना परिचालनका लागि बाध्य भएका हुन् ।

वन क्षेत्रमा ढडेलो फैलिनुमा किसान तथा गोठालाहरूलाई मुख्य जिम्मेवार ठानिएको छ । वन मासेर खेतीयोग्य जमिन बताउनका लागि उनीहरूले जानाजान लगाएका हुन सक्ने आशंकासमेत गरिएको छ । विभिन्न वातावरण सम्वद्ध संस्थाहरूले अमेजन क्षेत्रलाई कृषि र खानीको लागि प्रयोग गर्न दिने बोल्सोनारूको नीतिका कारण पछिल्लो संकट उत्पन्न भएको बताउने गरेका छन् ।

प्रकाशित : भाद्र ११, २०७६ ०८:२५
पूरा पढ्नुहोस्
प्रतिक्रिया
पठाउनुहोस्