थारु गाउँमा मोडलै मोडल

ठाकुरसिंह थारू

बर्दिया — केही वर्षअघिसम्म थारू भाषाका म्युजिक भिडियो वर्षमा मुस्किलले एक/दुईटा बन्थे । अहिले जमाना बदलिएको छ । एकै दिन थारू भाषाका तीन म्युजिक भिडियो सार्वजनिक भए ।


शुक्रबार चम्पन सांंस्कृतिक समूहले ‘अंग कही पाटिर धनिया रे’, गोचाली मिडियाले ‘ओ माई डियर’ र कैलाली म्युजिकले ‘कन्दरा लडियाके जुर पानी’ को म्युजिक भिडियो सार्वजनिक गरे । ‘ओ माई डियर’ डिजे गीत हो । दुई गीत थारू संंस्कृतिसँग जोडिएका छन् । थारू भाषाका फिल्मले व्यावसायिक सफलता नपाइरहेका बेला म्युजिक भिडियोले भने बजार तताएका छन् ।

म्युजिक भिडियोसँगै थारू कलाकारको माग पनि बढ्न थालेको छ । थारू समुदायमा एकसे एक मोडल देखिन थालेका छन् । म्युजिक भिडियोको लहरले थारू युवायुवतीलाई छोएको छ । कतिपय मोडल व्यावसायिक बन्दै गएका छन् । केहीले आफ्नै निजी लगानीमा लहडमै म्युजिक भिडियो निर्माण गरिरहेका छन् । केही मोडलले
रामै्र पारिश्रमिक पाइरहेकाछन् । युटयुबमार्फत सार्वजनिक हुने भिडियोका भ्युअर पनि बढेका छन् ।

पछिल्लो समय थारू भाषाको भिडियो निर्माण गर्न स्पर्धा नै चलेको छ । कलाकारहरूले आफूलाई टिकाउन प्रयासरत छन् । बारबर्दिया नगरपालिका धधवारकी आशा चौधरी निरन्तर दुई वर्षदेखि मोडलिङमै छिन् । हाल उनी चल्तीको कलाकारका रूपमा चिनिएकी छन् ।

१८ वर्षीया सुन्दरीले मोडलिङ गरेको ‘मै तो हुई गिनु दिवाना, तुहार नाउमे हुईनु कुर्बान’ लगायतका आधा दर्जन भिडियो थारू युवामाझ सामाजिक सञ्जालमा भाइरल बने । ‘थारू भाषाको भिडियो धेरै नबनेको भए मैले यो अवसर पाउन मुस्किल हुन्थ्यो । तर, सहजै भिडियो खेल्ने अवसर पाएँ,’ उनले भनिन्, ‘खासमा अहिलेका युवायुवती मोबाइलमार्फत् सामाजिक सञ्जालमा जोडिएकाले थारू भिडियोको लोकप्रियता बढेको हो ।’

एउटा म्युजिक भिडियोमा खेलेबापत् १० हजार रुपैयाँसम्म पारिश्रमिक पाउने गरेको उनले बताइन् । यसले पनि थारू म्युजिक भिडियोको व्यावसायिकता बढ्न थालेको देखाउँछ ।

बर्दिया बबई नगरपालिका–३ घर भई हाल नेपालगन्जमा होटल व्यवसाय गर्दै आएका मोडल राजकुमार थारूले आÏनै लगानीमा चार म्युजिक भिडियो खेलेका छन् । एउटा भिडियोका लागि कम्तीमा ५० हजार खर्च लाग्ने उनले बताए । आफैं मोडल भएकाले उनलाई मोडलिङको पारिश्रमिक तिर्नुपरेको छैन ।

आफ्नै लगानीमा थारू भिडियोप्रतिको यति धेरै मोह किन ? ‘थारू भाषा र संस्कृतिको संरक्षण र आफूभित्र रहेको कलालाई प्रस्तुत गर्नका लागि भिडियो बनाउँछु । कलाकारितामा मेरो रुचि छ,’ उनले भने, ‘कलाकारको पहिचान पाउनु मेरा लागि ठूलो सम्पत्ति हो ।’ उनी दसैं पर्वलाई लक्षित गरी अर्को भिडियो बनाउने तयारीमा जुटेका छन् ।

उनको ‘झुम्कावाला बठिनिया’ भिडियो युटयुबमा तीन लाख बढीले हेरेका छन् । थारू भिडियो अपलोड गर्न थुप्रै युटयुब सञ्चालनमा आएपछि प्रचारप्रसारमा सहज भएको उनले बताए । हातहातमा मोबाइलमार्फत सहजै हेर्न सकिने भएकाले पनि लोकप्रियता कमाउन सहज भएको हो ।

राजापुरकी शर्मिला चौधरी, कैलालीकी सुमित्रा चौधरी, सोनु कुस्मी, राधा चौधरी, बाँसगढी नगरपालिकाकी ऋतु नानु, बाँके च्यामाकी निर्मला चौधरीलगायतका दर्जनौं मोडल उत्पादन भएका छन् । उनीहरूले थोरै भए पनि पारिश्रमिक लिएर काम गर्छन् ।

युवा मोडल विवश चौकर, देवदास, विमल, रामदयाल, तेजराज, वीर चौधरी, सन्दीप बीसी, विकास बीआरडीलगायतका मोडल तयार भइसकेका छन् । पछिल्लो समय थारू भाषामा आधुनिक, डीजे भिडियो बढी सार्वजनिक हुने गरेका छन् । युवाहरूलाई लक्षित गरी भिडियो बनाउने गरिएका कारण डीजेले बजार पाएको हो । त्यसो त विभिन्न समूहले संस्कृति झल्काउने भिडियो निर्माण गरिहेका छन् ।

तर, युवाहरूको चासो भने डीजेमा बढी भएकाले निर्माताहरू त्यसतर्फ आकर्षित भएका छन् । ‘कलाकारका लागि दर्शक महत्त्वपूर्ण कुरा हो । बजारमा जे बिक्छ, त्यसैको बजार माग बढी हुने हो,’ थारू गायक तथा भिडियो निर्माता विश्वसागर परियारले भने, ‘अहिले डीजे गीतको माग युवाहरूमा बढी छ । त्यसैले थारू भाषाका गीत पनि त्यसैतर्फ आकर्षित छन् ।’

प्रकाशित : भाद्र ५, २०७६ ०८:५३
प्रतिक्रिया
पठाउनुहोस्

रहेनन् पहिलो सिनेमास्कोप निर्देशक

कान्तिपुर संवाददाता

काठमाडौँ — नेपाली फिल्ममा फरक विषयवस्तु उठान गर्ने सशक्त निर्देशकको छवि बनाएका किशोर रानाको ५४ वर्षको उमेरमा बुधबार निधन भएको छ ।

डेढ वर्षअघि मात्रै मृगौला फेरिएको उनको निमोनियाका कारण जावलाखेलस्थित निदान अस्पतालमा निधन भएको हो । उनका भाइ तथा चलचित्रकर्मी रञ्जित रानाका अनुसार सोमबार मात्रै उनलाई अस्पताल भर्ना गरिएको थियो ।

नेपाली फिल्म उद्योगमा सार्थक योगदान दिएबापत् उनलाई सरकारले साढे तीन लाख रुपैयाँसहित २०७४ को दीर्घसाधना सम्मान दिएको थियो । केहीअघि मात्रै राष्ट्रपति भवनमा आयोजित सम्मान समारोहमा अस्वस्थताका कारण उनी उपस्थित हुन सकेका थिएनन् । ‘उहाँ आफैं बोर्डमा आउने कुरा थियो,’ चलचित्र विकास बोर्डका अध्यक्ष केशव भट्टराईले भने, ‘हामी आफंै उहाँको घर जाने योजना बनाउँदै थियौं, अस्पताल भर्ना हुनुभएको खबर आयो । नेपाली फिल्म उद्योगमा फरक योगदानका लागि उहाँको सम्झना भइरहने छ ।’

‘कर्जा’ बाट नेपाली फिल्म थालेका उनले ‘सीमारेखा’, ‘करोडपति’, ‘राँको’, ‘एक नम्बरको पाखे’, ‘सन्तानको माया’, ‘मिस्टर मंगले’, ‘चक्र’, ‘प्रतिविम्ब’ लगायतका फिल्म निर्देशन गरेका थिए । ‘राँको’ मार्फत् नेपाली फिल्म उद्योगमा सिनेमास्कोप भित्र्याउने जस उनैलाई जान्छ । ‘सीमारेखा’ मा भने उनले लिगलिगकोटको कथामार्फत् नेपाली इतिहासलाई फरक दृष्टिकोणसहित प्रस्तुत गरेका थिए ।

उनले निर्देशन गरेको भोजपुरी फिल्म ‘कब होई मिलनवा हमार’ पनि व्यावसायिक हिसाबबाट चर्चामा आएको थियो । झन्डै डेढ दशक बलिउडमा समेत काम गरेका उनको जन्म सुनसरीमा भएको थियो । पुख्र्याैली भने गुल्मी हो । ‘सामाजिकदेखि व्यावसायिक फिल्मसम्म उहाँ सफल दरिनुभयो,’ बोर्ड अध्यक्ष भट्टराईले भने, ‘उहाँको निधन हाम्रो लागि ठूलो क्षति हो ।’

गायिका संगिता राना प्रधान किशोरकी पत्नी हुन् । उनका एक छोरा छन् । भारत बैंगलोरमा अध्ययनरत छोरा विहीबार काठमाडौं आइपुग्ने र शुक्रबार मात्रै अन्तेष्टी गरिने भाई रन्जितले बताए । उनै रन्जितले डेढ बर्ष अघि उनलाई मृगौला दिएका थिए । ‘पछिल्लो समय उहाँसँग ३ वटा जति भोजपुरी फिल्मको प्रोजेक्ट थियो’, रन्जितले भने, ‘आफ्नै नयाँ प्रोजेक्ट पनि गर्ने योजनामा हुनुहुन्थ्यो ।’

प्रकाशित : भाद्र ५, २०७६ ०८:५२
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT