पवनको ‘गुरुको भेट’

कान्तिपुर संवाददाता

काठमाडौँ — गायक पवन गिरि ‘गुरुको भेट’ एल्बम लिएर पहिलोपटक दर्शकमाझ आउने भएका छन् । ‘मलाई एकछिन देउ‍‍..’ बोलको गीतमा न्हुँ बज्राचार्यको संगीत, दुर्गालाल श्रेष्ठको शब्द छ । 

‘गीतको म्युजिक भिडियोसमेत तयार भइसक्यो’, रक गीतमा रमाउने दोलखाली गायक गिरिले भने।

संगीतकार बज्राचार्यलाई गुरुको रुपमा श्रद्धा गर्दै उनले एल्बमको नामै ‘गुरुको भेट’ राखेको बताए। ‘नेपाल आइडल’को दोस्रो संस्करणमा गिरि रकस्टारका रुपमा दर्शकमाझ रुचाइएका थिए।

म्युजिक भिडियोमा उनले कविता नेपालीसँगै आफैंले अभिनय गरेका छन्। भिडियोको निर्देशन भने लोकेश बज्राचार्यले गरेका छन्। र, क्रियटिभ डाइरेक्टरको भूमिकामा योपेश प्रधान छन् ।

लगत्तै टिका दाहालको संगीतको गीत ‘मेल्टरीको जुत्ता..’ सार्वजनिक गर्न लागेको जानकारी युवा गायकले दिए। उनी अस्ट्रेलिया, कोरिया लगायत देशका कन्सर्टमा पुगिसकेका छन्।


प्रकाशित : भाद्र ३, २०७६ २१:४४
प्रतिक्रिया
पठाउनुहोस्

दुई इन्जिनियरसहित १० जनाविरुद्ध मुद्दा

कान्तिपुर संवाददाता

काठमाडौँ — भ्रष्टाचार आरोपमा अख्तियार दुरुपयोग अनुसन्धान आयोगले मंगलबार दुई इन्जिनियरसहित १० जनाविरुद्ध विशेष अदालतमा मुद्दा दायर गरेको छ ।

सडक निर्माणमा ४ लाख ५६ रुपैयाँ अनियमितता गरेको भन्दै सुर्खेतको सिम्ता गाउँपालिकाका इन्जिनियर नवीन शर्मा, सबइन्जिनियर शंकर पोखरेलसहित ५ जनालाई मुद्दा चलाइएको अख्तियारले जानकारी दिएको छ ।

मुद्दा दायर गरिएकामा दुई इन्जिनियरसँगै सडक उपभोक्ता समितिका अध्यक्ष भुवनसिंह ठकुरी, कोषाध्यक्ष श्रीमती टिगा वली र सचिव नन्दसिंह ठकुरी पनि छन् । अख्तियारले अभियोगपत्रमा ५ जनाले मिलेमतोमा सिम्ता–२ को देउली–सिर्पा–काफलकोट जोड्ने सडकमा भएभन्दा बढी काम देखाई अनियमितता गरेको उल्लेख गरेको छ । गाडी दुर्घटनाको पुलिस रिपोर्ट बनाइदिने नाममा सेवाग्राहीसँग १ लाख रुपैयाँ घूस लिएको अभियोगमा महानगरीय ट्राफिक प्रहरी नयाँ बसपार्क गोंगबुका तीन जनाविरुद्ध भ्रष्टाचार मुद्दा दायर गरेको छ । मुद्दा दायर गरिएकामा प्रहरी जवानत्रय देवेन्द्रबहादुर बलायर, हिटलर साउद र लोकेन्द्र थापा छन् ।

अख्तियारले दिव्येश्वरी जग्गा एकीकरण आयोजना भक्तपुरका नायब सुब्बा देउमान कडरियाविरुद्ध पनि मुद्दा चलाएको छ । उनले लालपुर्जा दिन सिफारिस गर्ने क्रममा सेवाग्राहीसँग ५० हजार रुपैयाँ घूस लिएको पुष्टि भएकाले मुद्दा दायर गरिएको अख्तियारको भनाइ छ ।

जुम्लाको सिञ्जास्थित चन्द्रसूर्य आधारभूत विद्यालयका शिक्षक वीरबहादुर बुढाविरुद्ध समेत अख्तियारले मुद्दा दायर गरेको छ । नक्कली शैक्षिक प्रमाणपत्रका आधारमा सेवा प्रवेश गरेको पुष्टि भएकाले बुढाविरुद्ध मुद्दा चलाइएको अख्तियारले जानकारी दिएको छ ।

प्रकाशित : भाद्र ३, २०७६ २१:२५
पूरा पढ्नुहोस्
प्रतिक्रिया
पठाउनुहोस्