अन्जु पन्त भन्छिन्, ‘बोनस जीवन खुसीले बाँच्छु’

डिप्रेसनबाट हारेपछि आत्महत्या प्रयास
रामजी ज्ञवाली

काठमाडौँ — उनी फेरिएकी छन् । जीवनप्रति असाध्यै माया गर्छिन् । फुर्सदमा छोरीसहित परिवारका अन्य सदस्यलाई लिएर घुम्न निस्कन जान थालेकी छन् । उनी खुसी भए पनि यादहरु भने पखाल्न सकेकी छैनन् । घाउ त निको भयो तर खोटहरु अझै बाँकी छन् । कहिलेकाहीं तिनै घाउका खोटहरु भेट्छिन् र नरमाइलो लाग्छ, उनलाई ।

उज्यालो अनुहारमा एकाएक बादल लाग्यो। एकछिन मौन रहिन्। रुन्चे अनुहारबाट आउने आवाजहरु निकै कारुणीक छन्। सुन्दा पनि पत्याउनै नसकिने। मौन अन्जु एकछिनपछि बोलिन्, ‘हो, जीवनमा एकपटक आत्महत्या प्रयास गरेकै हो, तर असफल भएँ।’

नाम–दामको कुनै कमी थिएन। सडकमा हिड्यो भने फ्यानहरुले घेरा हाल्छन्। स्टेजमा चढ्यो कि सयौं दर्शक आइपुग्छन्। सवारीसाधनमा उनकै गीत घन्किन्छन्।सयौँ गीत मार्फत् श्रोताको मन जितेकी अन्जु पन्त नेपाली संगित उद्योगकी चर्चित गायिक हुन्। अपुग केहि थिएन। हरेक कुरा हुँदा हुँदै पनि केहि नभएजस्तो गरी किन आत्महत्याको बाटो रोजिन् उनले?

केहि ढिलाई गरेर जवाफ आयो, ‘सायद यो मेरो लागि त ठुलै पाठ हो, मेरा फ्यानहरुका लागि पनि ठुलो कुरा हुन सक्छ। पारिवारिक रुपमा धेरै दुःखी भएँ, खुसी खोज्न आत्महत्या प्रयास गरेकी हुँ तर भगवानले मर्न दिएनन्।’ घटना ठ्याक्कै यो दिनको हो भन्ने कुरा बिर्सिइन् उनले। तर, पाँच वर्ष भन्दा धेरै पुरानो घटना हो। तर घटना बिर्सिन उनले धेरै मिहेनत गरेकी छिन्। तर, कहिलेकाहिँ सम्झना आइहाल्छ।

त्यसदिन घरमा कोही थिएन। घाम अस्ताइसकेको थियो। च्यातिएको ब्लाउज र साडि लगाएर अन्जु घरबाट निस्किइन्। सरासर पशुपतीतर्फ लागिन्। मन्दिर भन्दा धेरै माथि गएर हाम फालिन्। तर, बजारिइन् माटो मात्रै रहेको भुईंमा। एउटा खुट्टा र नाक भाँचियो। शरिरका अन्य भागहरुमा पनि चोट लाग्यो।

भीडभाड कम हुने क्षेत्रमा भएकाले उनलाई कसैले देखेन। एकछिन छटपटाइरहिन्। तर, सँगै लगेको मोबाइल अलिकति पर थियो, उनले देखिन्। मोबाइल ठिक थियो, घरमा फोन गरिन्। तुरुन्तै परिवारका केहि सदस्य आएर उनलाई अस्पताल लगे।

निको हुन धेरै समय लाग्यो। लामो समयपछि अन्जु घर फर्कदा खुसी थिइन्। उनका घरका सदस्य पनि खुसी थिए। अन्जु थप्छिन्, ‘जब म घर फर्किएँ, आफ्नो शरिरको कुनै काम नलाग्ने अंक फ्याकेर आए जस्तै भयो।’ पारिवारिक लफडाकै कारण अन्जुले आफू डिप्रेशनमा गएको बताउँछिन्। ‘जब मानिसले चोटमाथि चोट पाउँछ त्यसपछि आत्महत्या भन्दा अर्को उत्तम विकल्प नदेख्ने रहेछ’, उनले थपिन्, ‘जब डिप्रेसन जितिन्छ, त्यसपछि जीवनलाई हेर्ने दृष्टिकोण बदलिँदो रहेछ।’ उनलाई के लाग्छ भने खुसी जीवनको कारण आफू नै हो, जीवनलाई सहि तरिकाले अगाडि बढाउन सकिएन भने आइपर्ने क्षति आफैँले भोग्नुपर्छ।

श्रीमान् मनोजराज शिवाकोटीसँगको दाम्पत्य जीवन सफल हुन सकेन। आवाज सुक्दै भएपछि गीत गाउन सकिनन्। माइग्रेन र पिनासले पेल्दै लग्यो। ‘घरमा बस्दा–बस्दै ब्याक पेन हुन थाल्यो। तल्लो पेट दुख्ने अर्को समस्या पनि थपियो। यस्तै–यस्तै तनावको चोट सहन नसकेपछि मैले आत्महत्या गर्छु भन्ने गलत निर्णय लिएँ’, अन्जुले भनिन्, ‘असफल भएँ, जीवनमा आफूले गरेका प्रयासहरु कहिलेकाहि असफल हुँदा पनि फाइदा हुँदोरहेछ, कहिलेकाहि असफलता पनि मिठो हुँदोरहेछ।’

कुनै बेला जिन्दगी केहि होइन भन्ने अन्जुलाई आजभोली हरेक सेकेण्डको महत्व लाग्छ। साथीभाई, आफ्ना आफन्त, यो दुनियाँ, समाज के नै हो ∕ भन्ने अन्जुलाई आजभोली सबथोक हो जस्तो लाग्छ। कुनै बेला रातभर ब्युँझिएर नानाथरी कुरा मनमा खेलाएर बिहान घाम उदाउने बेला सुत्ने अन्जु अहिले समयमै सुत्छिन्, समयमै उठ्छिन्।

‘दिदी, छोरी, आमा, छोरो लगायत हुनुहुन्छ घरमा, उनिहरुसँग समय बिताउँछु’, अन्जुले भनिन्, ‘तर, छोरीसँग धेरै समय खर्चिन्छु।’ घर बाहिर भएका बेलामा समेत छोरीसँग फोनमा कुरा भैरहन्छ उनको। अनुहारमा चमकता थप्दै उनले भनिन्, ‘वास्तवमा छोरीले हरेक कुरा बुझ्छ, छोरीका लागि म खुल्ला किताब हो।’

६ हजार भन्दा धेरै गीतमा स्वर दिइसकेकी अन्जुलाई आजभोली पहिले जे जे कुराको बोझ लाग्थ्यो, तिनै कुराप्रति मोह लाग्छ। ‘जीवन त सुन्दर गिफ्ट हो नि। ’ चम्किलो अनुहारका साथ अन्जु थप्छिन्,‘आजभोलि म निराश छैन, एकपटक पाएको जिवनलाई सुन्दर तरिकाले बिताउनुपर्छ भन्ने सोच आएको छ।’ अझ अन्जु भन्छिन्, ‘बोनस जीवन खुसीले बाँचिरहेकी छु।’

प्रकाशित : श्रावण १८, २०७६ १९:२२
प्रतिक्रिया
पठाउनुहोस्

हलिउड अभिनेत्री मेरिल स्ट्रिपसँग डेट जान मन छ : अर्पण थापा

रामजी ज्ञवाली

काठमाडौँ — अभिनयमा अब्बल मानिएका अर्पण थापाको परिचय त्यतिमा मात्रै सीमित छैन । उनी लेखन र निर्देशनमा पनि उत्तिकै सक्रिय छन् । उनी निर्देशित चौथो फिल्म ‘घर’ गत शुक्रबारदेखि प्रदर्शन भैरहेको छ । अर्पण नेपाली चलचित्र उद्योगका आफ्नै बलबुतामा स्थापित भएका हुन् । रजतपटको यात्रामा उनले अनेकौं आरोह–अवरोह झेले पनि कहिल्यै रोकिएनन् । तीन दर्जन चलचित्रमा अभिनय गरिसकेका अर्पणसँग यसपटक रामजी ज्ञवालीले ‘महिलावार्ता’ गरेका छन् ।


अहिलेसम्म कस्ता–कस्ता महिलाहरुको संगत गर्नुभयो?
जीवनकालमा धेरै प्रकारका महिलाहरु भेटिए। घरमा हजुरआमा, आमा, दिदी, बहिनीका व्यवहार, आफ्ना आफन्तमा रहनु हुने महिलाहरुको व्यवहार, स्कुल–कलेजमा भेटिएका युवती साथीहरुका व्यवहार। सबैको व्यवहार फरक थिए।

अनि कलाकार भएपछि भेटिएका महिला पात्रहरुको व्यवहार अन्यभन्दा निकै फरक पाएँ। मैले के बुझें भने, हरेक महिलाहरुको व्यवहार एकै किसिमका नहुँदो रहेछ।

जीवनमा पहिलोपटक महिलाको रुपमा चिनेको व्यक्ति?
मेरो आमा नै हो।

जीवनमा विशेष प्रभाव पार्ने महिला?
मेरो बज्यै हो। म बच्चैदेखि दार्जिलिङमा पढें, त्यहि हुर्किएँ। उहाँसँगै बस्थें। त्यो क्रममा मैले बज्यैलाई नजिकबाट चिनेको छु। कडा मिहेनत गर्ने, मनमा लागेको कुरा फ्याट्टै बोल्ने, नढाँट्ने, छलकपट नगर्ने जस्ता स्वभाव असाध्यै मन परेको हो। उहाँबाट म सधैं प्रभावित छु।

सबैभन्दा सहयोगी महिला?
श्रीमती (निशा) नै हो। अहिले मलाई धेरै नेपालीले चिन्छन्, तर कुनै बेला मलाई नचिन्ने बेला, संघर्ष गरिरहेको बेलामा उनले निकै सहयोग गरेकी हुन्। पहिलेदेखि उनी टिचर हो, उनको कमाई हुन्थ्यो। तर, मेरो सुरुवाती अवस्थामा कमाइ भन्ने कुरा खासै हुँदैन थियो। त्यस्तो अवस्थामा उनले निकै सहयोगी साथिको भुमिका पनि निभाइन्।

सबैभन्दा धेरै माया कुन महिलाको लाग्छ?
बज्यै, आमा र मेरो श्रीमतीको।

घृणा लाग्ने महिला?
ठ्याक्कै त्यो महिलाको नाम भन्न चाहान्न। तर, कतिपय महिलाहरु हुनुहन्छ जसले आफूलाई सबैभन्दा उपल्लो दर्जामा राख्ने, मपाईं र देखावटी गर्नुहुन्छ। त्यस्ता महिला मलाई पटक्कै मन पर्दैन। अनावश्यक प्रशंसा खोज्ने महिलाहरुदेखि म सधैं टाढा रहने गर्छु।

सबैभन्दा इरिटेड (झर्को) लाग्ने महिला?
विषयभन्दा बाहिर गएर बोल्ने, अनावश्यक चासो राख्ने महिला देखेपछि असाध्यै झर्को लाग्छ।

सपनामा आएर सताउने महिला?
मेरो आमा (अनिता) हो।

कल्पनामा आईरहने महिला?
मेरो एकदमै ठुलो हलिउड अभिनेत्री मेरिल स्ट्रिप हो। मलाई एकदमै खतरा लाग्छ। सायद सबैभन्दा धेरै मन पराएकी युवती नै कल्पनामा आउँछिन् होला? त्यो तपाईंले बुझ्नुस्।

पहिलोपटक डेट गएको महिला?
नाम नभनौं है। तर, धेरै वर्षअघिको कुरा हो, एकजना थिइन्।

प्रेममा धोका दिने युवती?
उनी नै हो।

कुनै युवतीले कहिल्यै बिहेको प्रस्ताव गरिन्?
नढाटेरै भन्ने हो भने मलाई कुनैपनि युवतीले बिहेका लागी प्रस्ताव गरेको थाहा छैन। मैले भने धेरैलाई प्रस्ताव गरेको छु।

डेटमा जान मन लागेको युवती?
हलिउड अभिनेत्री मेरिल स्ट्रिप।

संसारकी सुन्दर महिला?
हजुरआमा।

चलचित्रहरुमा सर्वाधिक सुन्दर अभिनेत्री?
मेरिल स्ट्रिप।

जतिबेला पनि गफ भैरहने महिला?
चलचित्रको काम भएका बेला आफ्नो चलचित्रको अभिनेत्री होला नत्र श्रीमती नै हो कि।

सबैभन्दा मनपर्ने महिला नेतृ?
इन्दिरा गान्धी।

ड्रेस सेन्स भएकी महिला?
पहिले पहिले त कमै मात्रामा भेटिन्थे। तर, अहिले त जो युवती पनि निकै सुन्दर भएर हिँड्छन्। अधिकांश युवती सुन्दर लाग्छ।

सबैभन्दा धेरै झगडा कुन महिलासँग भयो?
हजुरआमा नै हो। यति धेरै झगडा हुन्थ्यो कि कुरै नगरौं।

प्रकाशित : श्रावण ७, २०७६ १२:४६
पूरा पढ्नुहोस्
प्रतिक्रिया
पठाउनुहोस्