कान्तिपुर वेबसाईट
AdvertisementAdvertisement
२४.१२°C काठमाडौं
काठमाडौंमा वायुको गुणस्तर: १४९

लिम्बू फिल्ममा ख्याली र पालाम

प्रदीप मेन्याङबो

सुनसरी — लिम्बू समुदायका लागि ख्याली र पालाम भावना व्यक्त गर्ने सांस्कृतिक माध्यम हुन् । युवायुवतीहरू ख्याली र पालामकै माध्यमबाट विपरीतलिंगीलाई फकाउने, घुक्र्याउनेदेखि आकाशका जूनतारा झारिदिनेसम्मका वाचा गर्छन् ।

लिम्बू फिल्ममा ख्याली र पालाम

सात पुस्तासम्म कुनै साइनो नलाग्ने युवायुवतीले दह्रोसँग एकअर्काका हात समाएर यालाङ गर्दै धान नाच्दा सुरिलो स्वरमा प्रेमगीत पालाम गाउँदै एकअर्कालाई फकाउने कसरत गर्छन् ।


यही लिम्बू संस्कृतिलाई आधार बनाएर फिल्म निर्देशक लोकेन साँवाले गीतकार तथा गायिका रीता फोम्बो ठूलीको कथामा लघु लिम्बू फिल्म ‘ख्याली नु पालाम’ तयार पारेका छन् ।


फिल्ममा लिम्बू समुदायको सांस्कृतिक विरासतसँग जोडिएका पूर्वका ऐतिहासिक स्थलहरू तेह्रथुमको पोक्लाबाङ, सिम्ले, जलजले तोक्मा, आठराई संक्रान्ति बजार, म्याङलुङ, वसन्तपुर, लालीगुराँस नगरपालिकाको चोत्लुङ पार्क र तीनजुरे मिल्के जलजले लगायतलाई देख्न पाइन्छ ।


‘ख्याली नु पालाम’ १५ मिनेटको छोटो फिल्म भए पनि छायांकन गर्न दुई साता लागेको निर्देशक साँवाले बताए । ‘यो फिल्म पूर्वेली लिम्बू समुदायको जीवनशैलीसँग जोडिएको सांस्कृतिक संस्कार भएकाले निकै मिहिनेत गर्नुपर्‍यो,’ उनले भने, ‘आधुनिकताले ख्याली र पालामलाई निले पनि पहाडका कुनाकाप्चामा अझै जीवित छ । ख्याली र पालाम लिम्बूले जन्मँदै लिएर आएको हुन्छ ।’


कथा र पालाम गायनमा रीता र भक्ति आङदेम्बेको स्वर सुन्न सकिन्छ । पुष्पा तिलिङ मादेन लिम्बू र दीपेन्द्र लिम्बूको मुख्य भूमिका रहेको फिल्ममा गीता फोम्बो (माइली), ओझाहाङ चेम्जोङ, युनिशा निङलेकु, निशा माङ्युङ, भावना निङ्लेकु, विमला सिङगक, आँसु सिङगक, उषा सिङगक, अभिषेक लिम्बू, विवेक लिम्बू, रोसन लिम्बू, सुदेश तुम्बाहाङफे, लीलाप्रसाद पयाङगु, रामरोति लिम्बूको पनि अभिनय छ ।

फिल्मलाई मंसिरपछि विभिन्न फेस्टिभलमा प्रदर्शन गर्ने निर्देशक साँवाले जनाए ।

प्रकाशित : कार्तिक २६, २०७५ ०८:५२
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?