‘छक्का पञ्जा’ लाई सर्वाधिक अवार्ड- मनोरञ्जन - कान्तिपुर समाचार
कान्तिपुर वेबसाईट
AdvertisementAdvertisement

‘छक्का पञ्जा’ लाई सर्वाधिक अवार्ड

कामना फिल्म अवार्ड
विपिन र सृजना उत्कृष्ट अभिनेता–अभिनेत्री
कान्तिपुर संवाददाता

काठमाडौँ — ‘छक्का पञ्जा’ लाई ८ विधाको अवार्ड दिलाउँदै मंगलबार राजधानीमा कामना फिल्म अवार्ड–२०७४ सम्पन्न भएको छ । आर्मी अफिसर्स क्लबमा सम्पन्न अवार्ड समारोहमा यो फिल्म गतवर्ष प्रदर्शन भएका सबैलाई उछिनेर उत्कृष्ट समेत घोषित भयो ।

दीपाश्री निरौलाले उत्कृष्ट नवनिर्देशकको अवार्ड यही फिल्मबाट चुमिन् । दीपकराज गिरीले उत्कृष्ट खलनायक, जितु नेपाल उत्कृष्ट सहअभिनेता र केदार घिमिरे ‘माग्ने बूढा’ ले उत्कृष्ट हास्य अभिनेताको अवार्ड थाप्दा यही फिल्मबाट कविराज गहतराजले उत्कृष्ट नृत्य निर्देशकको अवार्ड उचाले ।

उत्कृष्ट संवादको अवार्ड पनि ‘छक्का पञ्जा’ कै भागमा पर्‍यो । यो विधाका लागि दीपकराज गिरी, जितु नेपाल र केदार घिमिरेले संयुक्त अवार्ड पाए । यही फिल्मको ‘सुन न चम्पा...’ गीतबाट कृष्ण

काफ्लेले उत्कृष्ट गायकको अवार्ड जिते । उत्कृष्ट अभिनेताको अवार्ड भने फिल्म ‘जात्रा’ का लागि विपिन कार्कीलाई दिइयो । ‘जात्रा’ बाटै प्रदीप भट्टराईले उत्कृष्ट पटकथाकारको अवार्ड पाए । रंगकर्ममा भिन्न छवि बनाएकी सृजना सुब्बाले फिल्म ‘डाइङ क्यान्डिल’ बाट उत्कृष्ट अभिनेत्रीको अवार्ड उचालिन् । जुरी अवार्ड पनि ‘डाइङ क्यान्डिल’ नै पायो । यही फिल्मबाट रवीन आचार्य उत्कृष्ट छायांकार, लाक्पा सिंगे तामाङ उत्कृष्ट बाल कलाकार, र सरोज बुढाथोकी उत्कृष्ट मेकअप आर्टिस्ट दरिए ।


‘डाइङ क्यान्डिल’ ले जस्तै फिल्म ‘गाजलु’ ले पनि पाँच अवार्ड जित्यो । उत्कृष्ट निर्देशकको अवार्ड ‘गाजलु’ बाट हेमराज बिसीले पाए भने उनैले उत्कृष्ट कथाको अवार्ड पनि थापे । यही फिल्मबाट सृष्टि श्रेष्ठले नवअभिनेत्रीको अवार्ड, उत्तम न्यौपानेले उत्कृष्ट ध्वनि मिश्रणको अवार्ड र सुरेन्द्र पौडेलले उत्कृष्ट फिल्म सम्पादकको अवार्ड जिते । उत्कृष्ट नवअभिनेताको अवार्ड भने ‘के म तिम्रो हैन र ?’ बाट आर्यन अधिकारीले पाए । हिमाल केसीले यही फिल्मबाट उत्कृष्ट द्वन्द्व निर्देशकको अवार्ड र एलिस कार्कीले उत्कृष्ट पाश्र्व संगीतको अवार्ड पाए । यस वर्षको अभिनेत्रीतर्फ पपुरल च्वाइस अवार्ड एसएमएस भोटिङका आधारमा केकी अधिकारी अब्बल ठहरिइन् ।


त्यस्तै, उत्कृष्ट सहअभिनेत्रीको अवार्ड फिल्म ‘होमवर्क’ का लागि गौरी मल्लले, उत्कृष्ट गायिकाको अवार्ड ‘किस्मत–२’ का लागि अञ्जु पन्तले र उत्कृष्ट गीतकारको अवार्ड ‘शब्द’ फिल्मका लागि डा. कृष्णहरि बरालले पाए । उत्कृष्ट संगीतकारको अवार्ड भने ‘लुट–२’ को ‘ठमेल बजार...’ का लागि कालीप्रसाद बाँस्कोटाले पाए । समारोहमा संगीत विधाको क्रिटिक्स अवार्डबाट गायिका इन्दिरा जोशी, कोरियोग्राफी तथा फेसनतर्फको क्रिटिक्स अवार्डबाट कोरियोग्राफर रचना गुरुङ शर्मा र रंगमञ्चतर्फको क्रिटिक्स अवार्डबाट नाटयकर्मी राज शाह सम्मानित भए ।


कामना पब्लिकेसनले सिजी इन्टरटेनमेन्टको सहकार्यमा गरेको अवार्डमा नेपाली फिल्म तथा रंगमञ्चमा पाँच दशकभन्दा लामो समयदेखि योगदान पुर्‍याएबापत् तीन अग्रज फिल्मकर्मीलाई ‘कामना कीर्तिमय दीर्घ योगदान सम्मान–२०७४’ दिइयो । अग्रज रंगकर्मी दम्पती हरिहर शर्मा र शकुन्तला शर्मासँगै अग्रज छायाकार मञ्जुकुमार श्रेष्ठलाई यो सम्मान दिइएको हो ।


समारोहमा वरिष्ठ गायक प्रेमध्वज प्रधान र वरिष्ठ गायिका तारा थापाले फिल्म ‘माइतीघर’ को ‘न आऊ सामु यसरी...,’ वरिष्ठ संगीतकार शम्भुजित बाँस्कोटा र मीना निरौलाले ‘चट्ट रुमाल क्यामालुम...’ गीत गाएका थिए । त्यस्तै, मदनकृष्ण श्रेष्ठले ‘हे भगवान् मेरो खल्तीको घाउ...’, आनन्द कार्कीले ‘वनमा फुल्यो फूल...’ गीत गाएका थिए । रामकृष्ण ढकाल, यम बराल, युवराज चौलागाईं, कृष्ण काफ्ले, ताराप्रकाश लिम्बूले पनि आफ्ना चर्चित गीत गाएका थिए ।


कामना पब्लिकेसनका अध्यक्ष पुष्करलाल श्रेष्ठ र गीतकार एवं कवि वसन्त चौधरीले कामना अवार्डबारे प्रकाश पारे । अवार्डका निर्णायकमा भने वरिष्ठ चलचित्रकर्मी लक्ष्मीनाथ शर्मा, रंगकर्मी हरिहर शर्मा, संगीतकार किरण प्रधान, रंगकर्मी अशेष मल्ल र करुण थापा थिए ।

प्रकाशित : माघ १७, २०७४ ०७:४८
प्रतिक्रिया
पठाउनुहोस्

साउदी र ओमनमा रोजगारको क्षेत्र कटौती

होम कार्की

काठमाडौँ — आफ्ना नागरिकलाई रोजगारको व्यवस्था गर्न साउदी अरब र ओमनले विभिन्न क्षेत्र र पेसामा विदेशी कामदार राख्न नपाउने नीति ल्याएको छ ।

साउदी र ओमनले सामान्य काममा पनि आफ्ना नागरिकलाई प्रोत्साहन गर्ने नीति ल्याएपछि विदेशीले अवसर नपाउने भएका हुन् । साउदीले १२ वटा क्षेत्र र ओमनले ८७ वटा पेसामा विदेशी कामदार राख्न नपाउने नीति लागू गरेको हो ।
साउदीको श्रम तथा सामाजिक विकासमन्त्री अली अल घफिसले आउँदो सेप्टेम्बरदेखि नियम लागू हुने जानकारी दिएका हुन् । घडी, चस्मा, मेडिकल औजार तथा उपकरणहरू, इलेक्ट्रिकल तथा इलेक्ट्रोनिक उपकरणहरू, गाडीका पार्टपुर्जा, निर्माण सामग्री, कार्पेट, गाडी तथा मोटरसाइकल, घर तथा कार्यालयका फर्निचर, बच्चाका लुगाफाटा तथा पुरुषका सरसामान, घर तथा भान्सामा प्रयोग हुने भाँडाकुँडा र चकलेट बेच्ने पसलमा विदेशी कामदार राख्न नपाउने निर्णय लिएको साउदी प्रेस एजेन्सीले जनाएको छ ।
मन्त्रीस्तरको यो निर्णयलाई प्रभावकारी रूपमा कार्यान्वयन गरिने मन्त्रालयका प्रवक्ता खालिद अवलखालीले बताए । यसअघि जनवरीदेखि नै साउदीले १९ वटा पेसामा विदेशी कामदारको भिसा नवीकरणमा रद्द गर्नुको साथै नयाँ आपूर्ति बन्द गरिसकेको छ ।
यी पसलमा धेरैजसो नेपालीसहित विदेशी कामदार रहेको साउदीमा कार्यरत काठमाडौंका महेश श्रेष्ठ बताउँछन् । ‘साउदीका आफ्ना नागरिकलाई रोजगारका अवसर बढाउँदा नेपालीजस्ता विदेशी कामदारको रोजगार खोसिन पुगेको छ,’ उनले भने, ‘यी क्षेत्रमा कार्यरत कामदारको भविष्य के हुन्छ भन्नेमा अन्योलमा छ ।’
साउदीको श्रम बजार लेवरमा केन्द्रित हुनुको साथै ठूला प्रोजेक्ट लागू नभएपछि नयाँ कामदारसमेत गएका छैनन् । वैदेशिक रोजगार विभागका अनुसार पछिल्लो ६ महिनामा ५९ हजार कामदार साउदी गएका थिए । गत वर्ष यसै अवधिमा ७८ हजार कामदार साउदी गएका थिए ।
ओमनका जनशक्तिमन्त्री अब्दुल विन नासिर विन अब्दुल्लाह अल बर्खीले ८७ पेसाका लागि आगामी ६ महिनाका लागि नयाँ भिसा जारी नगर्ने निर्णय लिएका छन् । मन्त्री बर्खीले सूचना प्रणाली, मिडिया, प्रविधि, हवाई उडान, लेखा र अर्थ, इन्जिनियर, बिमा, मार्केटिङ, मेडिकल र मानव संसाधन क्षेत्रका ८७ पेसाका लागि भिसा जारी नगर्ने जानकारी दिए ।
यी पेसामा झन्डै २५ हजार ओमनी नागरिकलाई व्यवस्थापन गर्ने ओमन सरकारको योजना छ । ‘नयाँ कामदारका लागि भिसा जारी नगर्ने भएकाले हामी पुरानालाई असर पर्छ जस्तो लाग्दैन,’ १२ वर्षदेखि ओमनमा इन्जिनियरको काम गर्दै आएका एक नेपालीले भने, ‘हाम्रो आवासीय भिसा नै नवीकरण नगरेमा फर्कनुको विकल्प छैन ।’ ओमनले आफ्नो राजस्व वृद्धिका लागि विदेशी कामदारको सवारी चालक अनुमति हरेक दुई वर्षमा नवीकरण गर्नुपर्ने निर्णयसमेत गरेको छ । यसअघि १० वर्षमा मात्रै नवीकरण गर्नुपथ्र्यो ।

प्रकाशित : माघ १७, २०७४ ०७:४३
पूरा पढ्नुहोस्
प्रतिक्रिया
पठाउनुहोस्
×